ຮື້ຖອນ ປ້າຍໂຄສະນາ ທີ່ຜິດລະບຽບ ຢູ່ນະຄອນຫຼວງ

ເຈົ້າໜ້າທີ່ຫ້ອງການຖແລງຂ່າວ, ວັທນະທັມ ແລະທ່ອງທ່ຽວ ເມືອງໄຊທານີ ນະຄອນຫລວງວຽງຈັນ ໄດ້ເກັບກູ້ປ້າຍໂຄ​ສະ​ນາ​ຕ່າງໆ ຮວມ​ທັງ​ປ້າຍເກົ່າ, ປ້າຍຈີກຂາດ ທີ່ຕິດແບບຊະຊາຍ ໂດຍບໍ່ໄດ້ຮັບອະນຸຍາດ ຈໍານວນ 61 ປ້າຍ ຢູ່ຕາມ​ຖ​ນົນ ເລກທີ 13 ໃຕ້, ທາງເລກ 10 ແລະເສັ້ນທາງດົງໂດກ-ໜອງບຶກ ເມື່ອວັນ ທີ 10 ກັນຍານີ້, ອີງຕາມການຣາຍງານຂອງໜັງສືພິມ ວຽງຈັນໃໝ່ ວັນທີ 10 ກັນຍານີ້.

ເພື່ອຂໍຮູ້ຣາຍລະອຽດ ​ກ່ຽວ​ກັບການເກັບກູ້ປ້າຍທີ່ວ່ານັ້ນ ວິທຍຸເອເຊັຽເສຣີ ໄດ້ຕິດຕໍ່ໄປຍັງຫ້ອງການ ຖແລງຂ່າວ, ວັທນະທັມ ແລະການທ່ອງທ່ຽວ ເມືອງໄຊທານີ​ໃນ​ມື້​ວັນ​ທີ 13 ກັນ​ຍາ​ນີ້​ ແຕ່ເຈົ້າໜ້າທີ່ທີ່ກ່ຽວຂ້ອງ ຍັງບໍ່ສະດວກທີ່​ຈະໃຫ້ຄໍາ ເຫັນ.

ແຕ່​ເຖິງຢ່າງໃດກໍຕາມ ເຈົ້າໜ້າທີ່ທ້ອງຖິ່ນ ຢູ່ເມືອງໄຊທານີ ທ່ານນຶ່ງກໍເວົ້າຕໍ່ວິທ ຍຸເອເຊັຽເສຣີ ໃນມື້ດຽວ​ກັນ​ນີ້ວ່າ ທ່ານເອງກໍບໍ່ຮູ້ຣາຍລະອຽດຄັກແນ່ ກ່ຽວກັບ ການເກັບກູ້ປ້າຍນັ້ນ, ຮູ້ພຽງແຕ່ວ່າ ກ່ອນທີ່ພາກສ່ວນໃດກໍຕາມ ຈະຕິດຕັ້ງປ້າຍ ຕາມແຄມທາງສາຍຕ່າງໆ ​ຕ້ອງໄດ້ຂໍອະນຸຍາດ ຈາກຫ້ອງການຖແລງຂ່າວ, ວັທນະ​ທັມ ແລະທ່ອງທ່ຽວ ຂັ້ນເມືອງກ່ອນ. ຫາກຕິດຕັ້ງໂດຍບໍ່ໄດ້ຮັບອະນຸຍາດ ກໍຈະຖືກເກັບກູ້ອອກ.

“ສ່ວນຫລາຍກະມີແຕ່ບັນດາຮ້ານ ເຂົາເຈົ້າສເນີຂຶ້ນໄປ ແລ້ວຕິດຕັ້ງໂລດຫັ້ນນ່າ ກະເຫັນເຂົາເຈົ້າຕັ້ງຢູ່ຕາມທາງ ບັນດາຫ້າງຮ້ານຫັ້ນແຫລະ ຄັນຜູ້ໃດຕ້ອງການ ຢາກຕັ້ງປ້າຍ ສ່ວນຫລາຍແລ້ວເຈົ້າຂອງຮ້ານເຂົາເຈົ້າສເນີຂຶ້ນໄປ ແລ້ວເພິ່ນມາຕັ້ງໃຫ້.”

ພ້ອມດຽວກັນນັ້ນ ຄົນທີ່ໄດ້ຕິດຕັ້ງປ້າຍຢູ່ແຄມເສັ້ນທາງ ດົງໂດກ-ໜອງບົກ ຜູ້ນຶ່ງ ເວົ້າວ່າ ຕົນເອງກໍຫາຮູ້ຂ່າວວ່າ ປ້າຍຂອງຕົນໄດ້ຖືກເກັບກູ້ໄປແລ້ວ ຍ້ອນໄດ້ ເຫັນປ້າຍ ທີ່ຖືກເຜີຍແຜ່ທາງສື່ສັງຄົມອອນລາຍນ໌. ແຕ່ບໍ່ຮູ້ຄັກແນ່ວ່າ ເປັນຍ້ອນ ຫຍັງ ເຈົ້າໜ້າທີ່ຈຶ່ງເກັບກູ້ປ້າຍຂອງຕົນອອກໄປ ທັງໆທີ່ຕົນກໍໄດ້ຂໍອະນຸຍາດຕິດ ປ້າຍແບບຖືກຕ້ອງແລ້ວ ແລະເຈົ້າໜ້າທີ່ກໍບໍ່ໄດ້ຕິດຕໍ່ມາຊີ້ແຈງໃຫ້​ຮູ້ກ່ອນທີ່ຈະ ເກັບກູ້ປ້າຍນັ້ນ.

“ເພິ່ນຢາກໃຫ້ເຮັດແນວໃດຊັ້ນນ່າ ເພິ່ນຈຶ່ງໄປມ້າງ ເຮົາກໍ ໄດ້ເສັຽຄ່າທໍານຽມ ບໍ່ຮູ້ວ່າຜິດລະບຽບເພິ່ນແນວໃດ ພວກເຮົາກະຕິດແຄມທາງພຸ້ນ ໃນທາງພຸ້ນເນາະ ຢາກ ຮູ້ເຫດຜົນກະບໍ່ເຫັນເພິ່ນໂທມາ.”

ນອກ​ຈາກເຣື່ອງການເກັບກູ້ປ້າຍໂຄ​ສະ​ນາ ທີ່ຕິດຊະຊາຍ ແລະບໍ່ໄດ້ຮັບອະນຸ ຍາດນັ້ນ​ແລ້ວ ຊາວບ້ານຢູ່ເມືອງໄຊທານີຈໍານວນນຶ່ງ ກໍຍັງຢາກໃຫ້ເຈົ້າໜ້າທີ່ ກວດກາປ້າຍພາ ສາຕ່າງປະເທດ ໂດຍສະເພາະພາສາຈີນ ແລະພາສາວຽດ ນາມນໍາດ້ວຍ ຍ້ອນເຫັນວ່າ ທຸຣະກິຈຈໍານວນນຶ່ງ ຂອງຄົນຕ່າງປະເທດ ມັກເຮັດປ້າຍບໍ່ຖືກຕ້ອງ ຕາມກົດໝາຍຂອງລາວ ເປັນຕົ້ນຂຽນໂຕ​ໜັງ​ສືພາສາຕ່າງ ປະເທດໃຫຍ່ກວ່າພາສາລາວ, ປ້າຍແບບບໍ່ມີພາສາລາວຢູ່ນໍາເລີຍ ຫລືຂຽນພາ ສາລາວບໍ່ຖືກຕ້ອງກໍ​ມີ.

ດັ່ງເຈົ້າຂອງເຮືອນພັກນາງນຶ່ງເວົ້າວ່າ:

“ໂຕຢ່າງວ່າມາເຊົ່າເນາະ ມາເຊົ່າຊິປ່ຽນເປັນພາສາຈີນ ກໍບໍ່ທັນຮູ້ວ່າຊິເຮັດຈັ່ງໃດ ເພາະວ່າເຫັນເຂົາເຈົ້າມາເຊົ່າບ່ອນບ້ານພັກສ່ວນນຶ່ງ ຢູ່ບ້ານນາສ້ຽວນີ້ ແມ່ນເຂົາເຈົ້າກໍເອົາປ້າຍຂອງຄົນຈີນ ມາໃຊ້ກ່ອນ ຄັນເປັນຂອງຈີນຂອງອີ່ຫຍັງ ເຂົາເຈົ້າບໍ່ອະນຸມັດເດ໋.”

ເວົ້າ​ເຣື່ອງ​ປ້າຍ​ໂຄ​ສະ​ນາ ຊາວບ້ານຢູ່ເມືອງໄຊທານີຜູ້ນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 13 ກັນຍານີ້ວ່າ ສໍາລັບຢູ່ເມືອງໄຊທານີນີ້ ຕົນເອງຍັງບໍ່ເຫັນ ປ້າຍພາສາຈີນ ແລະພາສາວຽດນາມ ຫລາຍປານໃດ, ມີແຕ່ເຫັນຢູ່ເຂດອື່ນໆ ໃນນະຄອນຫລວງວຽງຈັນ ແລະແຂວງອື່ນໆ ຊຶ່ງຮ້ານອາຫານ, ໂຮງແຮມ, ເຮືອນພັກບາງແຫ່ງ ມັກຕິດປ້າຍເປັນຊື່ພາສາຈີນ ຫລືພາສາວຽດນາມ ຢູ່ທາງ ເທິງ, ​ເອົາພາສາລາວ​ໄວ້ຢູ່ທາງລຸ່ມ ຊຶ່ງທາງພາກສ່ວນທີ່ກ່ຽວຂ້ອງຕ້ອງໄດ້ກວດກາ.

“ປ້າຍຈີນປ້າຍວຽດ ກະບໍ່ມີແຖວຕານມີໄຊ ແຕ່ວ່າຄັນຄົນຈີນກະແຖວຫັ້ນ ພຸ້ນແຫລະ ແຖວຊັງຈຽງ ແຖວຫັ້ນ. ຫລັກການຂອງມັນກະຄື ຕ້ອງແມ່ນພາສາລາວ ຢູ່ທາງເທິງ, ພາສາຕ່າງປະເທດ ຢູ່ທາງລຸ່ມ ຄັນເຮົາຊິເຮັດ, ເຮົາຢູ່ບ່ອນໃດ ເຮົາກໍສເນີຢູ່ບ່ອນຫັ້ນ. ເຂົາເຈົ້າຈະແນະນໍາລະບຽບການ ໃຫ້ເຮັດນີ້ ເຮັດໄດ້ ແຕ່ວ່າຕາມລະບຽບການ.”

ຜູ້ມີຄວາມຮູ້ ເຣື່ອງການອອກແບບປ້າຍ ​ຜູ້ນຶ່ງ ເວົ້າໃນມື້ດຽວກັນນີ້ວ່າ ຖ້າຜູ້ ປະກອບການຄົນໃດ ມີຄວາມປະສົງ ຢາກເຮັດປ້າຍເປັນພາສາຕ່າງປະເທດ, ນອກເໜືອຈາກພາສາອັງກິດ ກໍຕ້ອງໄດ້ໄປພົວພັນຂໍອະນຸຍາດ ຈາກຫ້ອງການ ຖແລງຂ່າວ, ວັທນະທັມ ແລະທ່ອງທ່ຽວ ເມືອງຮວມ​ທັງປ້າຍ ເປັນພາສາຈີນ ຊຶ່ງ​ຕາມ​ຫລັກ​ການ ແມ່ນ​ຕ້ອງ​​ຂຽນພາສາລາວ ຢູ່​ເທິງ​ພາ​ສາ​ຕ່າງ​ປະ​ທດ.

“ຖ້າວ່າຊິໃຊ້ພາສາຈີນ ຕ້ອງໄດ້ໄປປະສານຫາ ຕາມຫ້ອງການຖແລງຂ່າວ, ວັທນະທັມ ວ່າໃຫ້ໃຊ້ລະດັບໃດໆ ຕາມຫລັກຕ້ອງໃສ່ ພາສາລາວກ່ອນ ຂຶ້ນເທິງກ່ອນໝູ່ ແລ້ວກະພາສາອັງກິດ ຖ້າວ່າເປັນພາສາຈີນ ພາສາໄທຍ ກະແຖວທີ 3.”

ເມື່ອກ່ອນໜ້ານີ້ ກະຊວງຖແລງຂາວ, ວັທນະທັມ ແລະທ່ອງທ່ຽວ ກໍໄດ້ມີຄໍາສັ່ງ ໃຫ້ເກັບກູ້ປ້າຍຮ້ານ ແລະປ້າຍໂຄສະນາທີ່ຜິດກົດໝາຍ ເປັນ​ຕົ້ນປ້າຍພາສາຈີນ ຢູ່ແຂວງບໍ່ແກ້ວ ແລະແຂວງຫລວງນໍ້າທາ. ເມື່ອເດືອນມິຖຸນາ 2020 ທາງການ ແຂວງບໍ່ແກ້ວ ​ກໍໄດ້ສົມທົບກັບ ຄະນະຄຸ້ມຄອງເຂດເສຖກິຈ ພິເສດ ແຂວງບໍ່ແກ້ວ ຮື້ຖອນປ້າຍໂຄສະນາທີ່ຜິດກົດໝາຍ ຈໍານວນ 89 ປ້າຍ ໃນເຂດເມືອງຕົ້ນເຜິ້ງ ແລະເຂດເສຖກິດພິເສດສາມຫລ່ຽມຄໍາ ເປັນຕົ້ນ ປ້າຍ ທີ່ບໍ່ມີພາສາລາວ, ປ້າຍ ທີ່ພາສາຕ່າງປະເທດ ຢູ່ເທິງພາສາລາວ, ປ້າຍທີ່ພາສາລາວ ມີຂນາດນ້ອຍກວ່າ ພາສາຕ່າງປະເທດ ແລະອື່ນໆ.