ຊາວບ້ານເຂື່ອນແຕກຖ້າເງິນ 3 ເດືອນ ທ້າຍປີ 2020 ຮວມທັງ ຣົດໄຖນາ

ມາຮອດປັດຈຸບັນ ຊາວບ້ານ ຜູ້ປະສົບພັຍເຂື່ອນແຕກ ຢູ່ເມືອງສນາມໄຊ ແຂວງອັດຕະປື, ທີ່ລໍຖ້າເງິນເບັ້ຽລ້ຽງ ແລະເງິນແຮຖົງ ຮວມທັງໝົດ 250,000 ກີບ ຕໍ່ຄົນຕໍ່ເດືອນ ຂອງເດືອນ 6,7,8,9 ນັ້ນ, ຖືວ່າໄດ້ຮັບໝົດທັງ 4 ເດືອນແລ້ວ, ໃນທ້າຍເດືອນ 11 ປີ 2020, ແຕ່ຍັງອີກ 3 ເດືອນ ບໍ່ທັນໄດ້ຮັບ, ດັ່ງຊາວບ້ານ ໃນສູນດົງບາກ ຜູ້ນຶ່ງເວົ້າກັບວິທຍຸເອເຊັຽເສຣີ ເມື່ອ ວັນທີ 28 ເດືອນ ທັນວາ 2020 ວ່າ:

“ຮັບລະເດ້, ບ້ານໃດກະຮັບໝົດລະເດ້, ປະຊາຊົນກະດີໃຈຫັ້ນແຫຼະ ໄດ້ເງິນເນາະ, ພໍໄດ້ໃຊ້ ດີໃຈຫຼາຍ ໃຜກະວ່າດີໃຈ ຫາກແຕ່ວ່າ, ມັນກະບໍ່ທັນກັບຄວາມໃຊ້ຫັ້ນແຫຼະ ເພິ່ນເຫິງ ເພິ່ນຈັ່ງໃຫ້ເທື່ອນຶ່ງ ຫັ້ນນ່າ, ຄືດຽວນີ້ແຮງຮ້າຍ, ປະຊາຊົນນິ່ ສ່ວນຫຼາຍກະມາ ປະກອບສ່ວນກັບເຮືອນ, ສິ່ງໃດເຮົາບໍ່ມັກ ເຮົາບໍ່ມັກທາງໃນ ຫັ້ນນ່າ, ແບບວ່າ ຂອງບໍຣິສັດ ຂອງເພິ່ນນິ່ ພໍຢູ່ ແຕ່ວ່າໃຈຂອງ ປະຊາຊົນ ເຮົາຢາກໄດ້ ມາຊື້ຕື່ມ ໂຕໃດເຮົາຢາກໄດ້ຫັ່ນນ່າ.”

ຊາວບ້ານຜູ້ນີ້ ເວົ້າອີກວ່າ, ເງິນທີ່ໄດ້ຮັບນັ້ນ ແມ່ນສະເພາະແຕ່ 4 ເດືອນ, ສໍາລັບເງິນຂອງເດືອນ 10-11-12 ແມ່ນຍັງບໍ່ທັນໄດ້ຮັບ ເທື່ອ ແລະບໍ່ຮູ້ວ່າ ເພິ່ນຈະຈ່າຍໃຫ້ແບບໃດ ແລະ ມື້ໃດແທ້:

“ເພິ່ນຊິໃຫ້ ແຕ່ລະເດືອນ ລະເດືອນ ດຽວນີ້ເພິ່ນວ່າ, ເພິ່ນຊິໃຫ້ເປັນເດືອນ ເປັນເດືອນ, ເພິ່ນບໍ່ໃຫ້ຫຼາຍເດືອນ, ໃຫ້ບາດດຽວແລ້ວ ມັນຍາກ ເພິ່ນວ່າເດ້, ໄດ້ຍິນເພິ່ນເວົ້າຢູ່ ຫາກແຕ່ວ່າ ຈັກມື້ໃດ ວັນທີໃດ, ເຮົາກະບໍ່ຮູ້ ຈັກເພິ່ນເຮັດແນວໃດນ່າ ຫຼົບໄປຫຼົບມາ.”

ຊາວບ້ານ ອີກຄົນນຶ່ງ ໃນສູນດຽວກັນນີ້ ທີ່ໄດ້ຮັບເງິນນັ້ນ ກໍເວົ້າວ່າ ດີໃຈຫຼາຍ ເພາະຄອງຖ້າມາດົນແລ້ວ:

“ເອີ່ໆ ໄດ້ຮັບແລ້ວ ເຂົ້າບັນຊີໃຫ້ລະເດ້ ໃຄແຫຼະ ກະດີໃຈແຫຼະ.”

ຊາວບ້ານ ບ້ານທ່າແສງຈັນ ທີ່ຄອງຖ້າເງິນ ອັດຕາກິນ ແລະ ເງິນແຮຖົງ ຂອງເດືອນ 10-11-12 ກໍຖາມນາຍບ້ານທຸກມື້ວ່າອີກດົນ ປານໃດ, ເພິ່ນຈະເບີກຈ່າຍໃຫ້ ເພາະຄອບຄົວຕົນ ມີຄວາມຈໍາເປັນຕ້ອງໃຊ້ຈ່າຍ, ແຕ່ກໍໄດ້ຄໍາຕອບວ່າ ເງິນນັ້ນຍັງບໍ່ທັນອອກ:

“ເອີ ວ່າງຊຸດກ່ອນຫັ່ນ ໄດ້ຮັບແລ້ວ ຊຸດນີ້ຫັ່ນ ບໍ່ທັນໄດ້ຮັບ 3 ເດືອນ ບໍ່ທັນໄດ້ຮັບ ໄປຖາມຍາມໃດ ນາຍບ້ານເພິ່ນວ່າບໍ່ທັນອອກ ພໍ່ຫັ່ນຈັ່ງວ່າ ນຶກໃນໃຈວ່າ ບໍ່ທັນອອກ ລະບໍ່ອາດສາມາດໄປຫາ ທະນາຄານ.”

ຊາວບ້ານ ບ້ານໃໝ່ ຜູ້ນຶ່ງ ເວົ້າກັບວິທຍຸເອເຊັຽເສຣີ ໃນວັນທີ 6 ມົກກະຣາ ນີ້ວ່າ, ຈັກຊິເປັນແນວໃດ, ຈັກຊິໄດ້ຫຼືບໍ່ ກໍບໍ່ຮູ້ ເພາະວ່າ ເພິ່ນມິດງຽບຢູ່:

“ຈັກແນວໃດ ບໍ່ທັນໄດ້ຊໍ້າ, ຢາກຈັກຢູ່ດອກ ຫາກບໍ່ເຫັນວ່າແນວໃດ ມິດຢູ່, ແຕ່ສອງທິດເມືອຫຼັງຫັ່ນເພິ່ນວ່າ 2-3 ມື້ຊິໃຫ້ວ່າຊັ້ນນະ ແຕ່ຫາກມິດຢູ່ ກະກາຍເປັນທິດລະ ຄືບໍ່ເຫັນວ່າແນວໃດ.”

ໃນມື້ດຽວກັນນີ້ ເອເຊັຽເສຣີ ໄດ້ໂທສອບຖາມໄປຍັງ ເຈົ້າໜ້າທີ່ ກ່ຽວຂ້ອງ ທີ່ແຂວງອັດປື ເຈົ້າໜ້າທີ່ທ່ານນັ້ນ ກ່າວກ່ຽວກັບເຣື່ອງນີ້ວ່າ:

“ພວກເຮົາ ແມ່ນໄດ້ ອະນຸມັດວ່າງທ້າຍປີໃໝ່ນີ້, ພໍດີມັນຖືກຊ່ວງປີໃໝ່ ລະກະມີພັກ ຈົນຮອດວັນທີ 5 ເດ້, ເຂົາກະດໍາເນີນການ ແລ້ວດຽວນີ້ ກະທາງຜແນກແຮງງານ ແລະສວັດດີການ ສັງຄົມ ກໍາລັງດໍາເນີນການ ເງິນຮ່ວງໂຕນີ້ ກະບໍ່ທັນມາ ພວກເຮົາກະຢືມ ຮ່ວງອື່ນກ່ອນວ່າຊັ້ນຊະ, ມາຈ່າຍໃຫ້ມັນທັນ ຮອດເດືອນ 12 ແລ້ວ, ເຮົາກໍາລັງກຽມໂອນເຂົ້າບັນຊີ ໃຫ້ແຕ່ລະບັນຊີ ບັນຊີເບີດ, ໂອນເຂົ້າບັນຊີຄືເກົ່າ, ເພື່ອຮັບປະກັນຄວາມປອດພັຍ ລະກະເພື່ອເປັນຫຼັກຖານຫັ້ນແຫຼະ ວ່າໃຜໄດ້ຮັບບໍ່ໄດ້ຮັບ.”

ນອກຈາກເຣື່ອງ ເງິນອັດຕາກິນ ແລະ ເງິນແຮຖົງ ຂອງ 3 ເດືອນນີ້ ທີ່ຈະໄດ້ຮັບມື້ໃດ ແລ້ວນັ້ນ, ຜູ້ປະສົບພັຍເຂື່ອນແຕກ ກໍຍັງ ຢາກຮູ້ຄໍາຕອບ ກ່ຽວກັບເງິນຊົດເຊີຍ ພາຫະນະ ຣົດຈັກ, ຣົດໄຖ ທີ່ ປະຊາຊົນ ນໍາມາສ້ອມແປງ ແລະ ສູນຫາຍ ຫຼື ບໍ່ສາມາດ ນຳໃຊ້ໄດ້ນັ້ນ, ປະຊາຊົນ ແມ່ນໄດ້ສົ່ງຂໍ້ມູນ ແລະໄດ້ເຊັນຮັບຮອງໄປແຕ່ດົນແລ້ວ ແຕ່ເປັນຫຍັງ ຄືມິດຫາຍໄປດົນແທ້, ດັ່ງຊາວບ້ານ ບ້ານໃໝ່ ຜູ້ດຽວກັນນີ້ ເວົ້າວ່າ:

“ເງິນໂຕເພິ່ນຊິຊົດເຊີຍ ອັນເງິນຣົດຈັກ, ຣົດໄຖ ອັນສ້ອມແປງຫັ່ນນ່າ ຫາກເພິ່ນໃຫ້ປະຊາຊົນ ໄປເຊັນຮັບເອົາແລ້ວ ເງິນຫັ່ນນ່າ ຫາກແຕ່ວ່າບໍ່ເຫັນເງິນມາຈັກເທື່ອຫັ່ນນ່າ ປະຊາຊົນ ກະວ່າຢູ່ ເປັນແນວໃດ, ຄືວ່າມິດບັກດົນໆນຶ່ງ, ຄັນວ່າໃຫ້ກະພໍໃຫ້ແລ້ວ, ພໍໄດ້ມາຊື້ຣົດລົງໄຮ່ລົງນາແຫຼະ, ຖ້າຮອດຍາມານາລະມັນກະແພງແຫຼະ ,ຊື້ຕອນນີ້ໄຄແນ່ ໃຜກະວ່າເດ້.”

ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ກ່ຽວຂ້ອງ ແຂວງອັດຕະປື ທ່ານດຽວກັນນີ້ ກ່າວວ່າ:

“ສໍາລັບການສ້ອມແປງຣົດຫັ່ນ, ກໍາລັງເກັບກໍາຂໍ້ມູລ ເພາະວ່າມັນ ຕອນລົມກັນເບື້ອງຕົ້ນ, ເຮົາບໍ່ໄດ້ເວົ້າ ກັບຜູ້ພັທນາໂຄງການ ຕອນນີ້ ມັນມີຄວາມຈິງມັນຄືແນວນັ້ນ, ຄວາມຮຽກຮ້ອງ ຕ້ອງການ ແລະ ພວກເຮົາກະໄດ້ເກັບກໍາຂໍ້ມູລ ເອົາໄດ້ຈໍານວນ 6 ບ້ານ ຖືກຜົລກະທົບແຮງແລ້ວລຽບລ້ອຍ ລະຍັງອີກ 13 ບ້ານ ຖືກຜົລກະທົບຄ່ອຍ ບ້ານໄກໆຫັ່ນເດ້ ລວບລວມເອົາ ບິນຂະເຈົ້າຫ່ັນ ສິສເນີຫາ PNPC ຜູ້ພັທນາໂຄງການຫັ່ນຕື່ມ, ເພື່ອເພິ່ນພິຈາຣະນາຊ່ວຍ ເຮົາຕ້ອງສເນີສົ່ງໃຫ້ຜູ້ປະກອບການ, ຜູ້ພັທນາໂຄງການ ເຊປຽນ-ເຊນໍ້ານ້ອຍ, ມັນກະມີ 4 ຂາຫຸ້ນ, ຫຼັງຈາກໄດ້ຮັບຄໍາຮ້ອງ ລະກະເຂົາກະປຶກສາ ທີ່ປຶກສາຫຍັງຕ່າງໆ, ຫຼາຍຂະບວນການ ພາຍໃນເຂົາອີກເດ້, ເອີ້ນກັນປະຊຸມບໍ, ມັນກະໃຊ້ເວລາໜ້ອຍນຶ່ງ.”

ເຖິງແນວໃດກໍຕາມ, ຊາວບ້ານຜູ້ປະສົບພັຍເຂື່ອນແຕກກໍຫວັງວ່າ ເຈົ້າໜ້າທີ່ທາງການລາວ ຈະຊ່ອຍຊຸກຍູ້ ເຈຣະຈາ ກັບ ບໍຣິສັດ ຜູ້ພັທນາໂຄງການ ເຂື່ອນ ເຊປຽນ-ເຊນໍ້ານ້ອຍ ເພື່ອໃຫ້ໄດ້ເງິນຊົດເຊີຍໂຕນີ້, ໃຫ້ໄວຂຶ້ນ ເພາະຄວາມລໍາບາກຂອງຊາວບ້ານ ກໍຍັງມີຫຼາຍສິ່ງຫຼາຍຢ່າງ ທີ່ຕ້ອງກັງວົນນໍາ, ແລະ ອີກຢ່າງນຶ່ງ ຣະດູການເຮັດໄຮ່ ເຮັດນາ ກໍໃກ້ຈະມາເຖິງແລ້ວ, ປະຊາຊົນ ຈຶ່ງຕ້ອງການເງິນມາຊື້ເຄື່ອງອຸປກອນເຮັດນາ.