ກຸ່ມລົງທຶນເຂື່ອນນໍ້າງື່ມ 2 ຍັງບິດເບືອນຊາວບ້ານ

ເຈົ້າໜ້າທີ່ ປົກຄອງ ແຂວງວຽງຈັນ ຜູ້ບໍ່ປະສົງ ອອກຊື່ ທ່ານນຶ່ງ ເປີດເຜີຍຕໍ່ ເອເຊັຍເສຣີ ເມື່ອມໍ່ໆມານີ້ວ່າ, ຈົນມາເຖິງ ປັດຈຸບັນນີ້ ປະຊາຊົນ ທີ່ໄດ້ຮັບ ຜົນກະທົບ ຈາກ ໂຄງການເຂື່ອນ ນໍ້າງື່ມ 2 ທີ່ການກໍ່ສ້າງ ກໍສິ້ນສຸດ ລົງແລ້ວ ແລະ ໄດ້ຂາຍ ກະແສໄຟຟ້າ ໃຫ້ໄທ ແຕ່ປີ 2011 ນັ້ນ ຍັງມີຊາວບ້ານ ທີ່ບໍ່ທັນໄດ້ຮັບ ທີ່ດິນປູກຝັງ ຄົບຕາມສັນຍາ ທີ່ກຸ່ມລົງທຶນ ໄດ້ຕົກລົງວ່າ ຈະຈັດສັນໃຫ້. ປະຊາຊົນ ທີ່ຖືກໂຍກຍ້າຍ ຈາກເຂດ ກໍ່ສ້າງເຂື່ອນ ໄປຢູ່ເຂດຈັດສັນ ທີ່ເມືອງເຟືອງ ແຂວງວຽງຈັນ ມາແຕ່ປີ 2010 ນັ້ນ ໄດ້ຮັບທີ່ດິນ ປູກຝັງ ພຽງເຄິ່ງນຶ່ງ ຂອງເນື້ອທີ່ ທີ່ກຸ່ມລົງທຶນວ່າ ຈະຈັດສັນໃຫ້. ເຈົ້າໜ້າທີ່ ທ່ານນີ້ ເວົ້າວ່າ:

"ປະຊາຊົນ ທີ່ໂຍກຍ້າຍ ມາໃໝ່ ຄືເອົາຈາກ ປະຊາຊົນ ທີ່ນໍ້າງື່ມ 2 ເຂົາເຈົ້າ ຈາກເຂື່ອນນໍ້າງື່ມ 2 ຫັ້ນຍົກຍ້າຍ ມາຢູ່ເມືອງເຟືອງ 16 ບ້ານ ມາເປັນບ້ານ ດຽວກັນ. ເຂົາເຈົ້າກໍ ຕອບສນອງເນື້ອທີ່ ໂຕນີ້ ທັມມະດາ ຕ້ອງໃຫ້ໄດ້ ຄອບຄົວນຶ່ງ 1 ເຮັກຕາ ແຕ່ມາຮອດ ປັດຈຸບັນນີ້ ຫາກໍໄດ້ ຄອບຄົວລະ ເຄິ່ງເຮັກຕາ ກະຊັ້ນຍັງ ບໍ່ສາມາດ ເປັນນາໄດ້ ໂຕນີ້".

ເຂື່ອນນໍ້າງື່ມ 2 ຜລິດໄຟຟ້າໄດ້ 615 MW. ມີກໍານົດສົ່ງຂາຽ ໃຫ້ໄທເປັນເວລາ 25 ປີ. ເຖິງແມ່ນວ່າ ຕລອດອາຍຸ ສໍາປະທານ ຣັຖບານລາວ ຈະມີຣາຍໄດ້ ເປັນມູນຄ່າ ທັງໝົດ 1,500 ລ້ານ ໂດລາ ສະຫະຣັດ ກໍຕາມ ແຕ່ປະຊາຊົນລາວ ຫລາຍກວ່າ 6,100 ຄົນ ທີ່ຢູ່ ໜ້າເຂື່ອນ ໄດ້ຮັບຜົນກະທົບ ໂດຍທີ່ຣັຖບານ ໃຫ້ຄ່າຊົດເຊີຍ ແບບບໍ່ເປັນທັມ ຍິ່ງໄປກວ່ານັ້ນ ເຂື່ອນນໍ້າງື່ມ 2 ຍັງສົ່ງຜົນກະທົບ ຢ່າງຫລວງຫລາຍ ຕໍ່ ປະຊາຊົນ ທີ່ຢູ່ເຂດ ລຸ່ມເຂື່ອນ ນໍາອີກ. ໃນປີກ່ອນ ຕອນຝົນຕົກໜັກ ເຂື່ອນ ໄດ້ປ່ອຍນໍ້າລົງ ມາຖ້ວມ ພື້ນທີ່ນາ ປູກເຂົ້າ ແລະ ຜົລປູກ ຂອງ ປະຊາຊົນ ຢ່າງຫຼວງຫລາຍ.