ອາຫານ ແລະ ເຄື່ອງໃຊ້ ມີລາຄາແພງຂຶ້ນ

ເຄື່ອງ​ອຸ​ປໂພກ ແລ ບໍ​ຣິ​ໂພກ ໃນ​ຊີ​ວິດ​ປະ​ຈຳ​ວັນ ມີ​ລາ​ຄາ​ແພງ​ຂຶ້ນ​ຢ່າງ​ຕໍ່​ເນື່ອງ ເປັນ​ຕົ້ນ​ແມ່ນ ປາ​ກະ​ປ໋ອງ ຂຶ້ນ​ຈາກ 5,000 ກີບ ມາ​ເປັນ 7,000 ກີບ, ແປ້ງ​ນົວ​ ຈາກ 6,000 ມາ​ເປັນ 9,000 ກີບ, ສະ​ບູ ມີ​ລາ​ຄາ​ແພງ ຈາກ​ເດີມ ກ້ອນ​ລະ 4,000 ກີບ ມາ​ເປັນ 5,000-6,000 ກີບ, ແລະ ແຟບ​ຊັກ​ເຄື່ອງຂະ​ໜາດ 120 ກຼາມ ລາຄາ​ຈາກ 6,000 ກີບ ມາ​ເປັນ 8,000 ກີບ ໃນ​ຂະ​ນະ​ທີ່ ​ຍັງ​ບໍ່​ມີ​ການ​ປັບ​ຂຶ້ນ​ເງິນ​ເດືອນ​.

ເງິນເດືອນຂັ້ນ​ຕໍ່າຂອງ​ພະ​ນັກ​ງານ ທີ່​ເຮັດ​ວຽກ​ຢູ່​ບໍ​ຣິ​ສັດ  1,100,000 ກີບ ແລະ ບໍ່​ມີ​ທ່າ​ທີ​ວ່າ ບໍ​ຣິສັດຈະ​ປັບ​ຂຶ້ນ​ໃຫ້.

ພະ​ນັກ​ງານ ກໍ​ຕ້ອງ​ໄດ້​ໃຊ້​ຈ່າຍ​ຢ່າງ​ປະ​ຢັດ ເພື່ອ​ໃຫ້​ມີ​ຊີ​ວິດ​ລອດ ຄື ບໍ່​ຊື້​ກິນ​ຕາມ​ຮ້ານ​ອາ​ຫານ ໂດຍຈະ​ແຕ່ງ​ກິນ ແລະເອົາ​ອາ​ຫານ​ມາ​ກິນ​ຢູ່​ຫ້ອງ​ການ ຍ້ອນ​ວ່າລາ​ຄາ​ເຂົ້າ​ຢູ່​ຮ້ານ​ອາ​ຫານ ​ຈານ​ລະ 25,000 –  30,000 ກີບ.

ພະ​ນັກ​ງານ​ບໍ​ຣິ​ສັດ​ເອ​ກະ​ຊົນ ຢູ່​ນະ​ຄອນ​ຫລວງວຽງ​ຈັນ ໄດ້​ກ່າວ​ຕໍ່​ ວິທຍຸເອ​ເຊັຽ​ເສ​ຣີ ໃນ​ວັນ​ທີ 24 ມີ​ນາ ວ່າ:

“ແພງ​ຂຶ້ນ​ຫຼາຍ ທຽບ​ໃນ​ເງິນ​ເດືອນ ເງິນ​ເດືອນເຮົາ ຍັງ​ບໍ່​ຂຶ້ນ​ປານນີ້ເດ້ ເງິນ​ເດືອນ​ຍັງ​ບໍ່​ຂຶ້ນ ປະ​ຢັດ​ກິນ ປະ​ຢັດ​ໃຊ້ເອົາ ຊື້​ມາ​ແຕ່ງ​ເອງ ສ່ວນ​ຫຼາຍ ຖ້າ​ໄປ​ຊື້​ເຂົາ​ເຈົ້າ​ກິນ ມັນ​ຈະ​ແພງກວ່າ ປະ​ມານ 25,000 -30,000 ກີບ.”

ຢູ່​ແຂວງວຽງ​ຈັນ ຢາ​ສີ​ແຂ້ວ ຂນາດ 35 ກຼາມ ກໍ​ຂຶ້​ນ​ລາ​ຄາ ຈາກ 12,000 ກີບ ມາ​ເປັນ 20,000 ກີບ, ຢາ​ສະ​ຜົມ​ຂ​ນາດ 170 ມີ​ລລີ​ລິດ ກໍ​ຂຶ້ນ​ລາ​ຄາ ຈາກ 28,000 ກີບ ມາ​ເປັນ 35,000 ກີບ ແຕ່ ຊາວ​ບ້ານ ກໍ​ຈຳ​ເປັນຕ້ອງ​ຊື້ ຍ້ອນ​ວ່າ ປະ​ເທດ​ລາວ ບໍ່​ສາ​ມາດ​ຜ​ລິດ​ສິນ​ຄ້າ​ອຸ​ປ​ໂພກ ແລະ ບໍ​ຣິ​ໂພກ ທີ່​ໃຊ້​ໃນ​ຊີ​ວິດ​ປະ​ຈຳ​ວັນໄດ້ ໃນ​ຂະ​ນະ​ທີ່ ບາງ​ຄົນ ກໍ​ບໍ່​ໄດ້​ມີ​ລາຍ​ໄດ້​ເສີມ ຍ້ອນ ການ​ຣະ​ບາດ​ຂອງ ໂຄວິດ-19.

ຊາວ​ແຂວງວຽງ​ຈັນ ທ່ານ​ນຶ່ງ ໄດ້​ກ່າວ​ວ່າ ໃນ​ວັນ​ທີ 24 ມີ​ນາ ວ່າ:

“ຈຳ​ເປັນ​ໄດ້​ຊື້​ແຫຼະ ເງິນ​ເດືອນ​ເຮົາ ຊ່ຳ​ເກົ່ານີ້​ແຫຼະ ເກັບ [ເງິນ] ບໍ່​ໄດ້​ຫັ້ນ​ແຫຼະ ຢູ່ບໍ່​ໄດ້ ຢູ່​ລາວນີ້ ເຂົາ​ຂຶ້ນ ຂຶ້ນ​ໄປ​ນຳ​ເງິນບາດ ເຂົາ​ເອົາ​ມາ​ນຳ​ໄທ​ຍ​ໝົດ ຂອງ​ຢູ່ ຂອງ​ກິນ ໝີ່ມ່າ​ມ້າ ເອົາ​ເຂົ້າ​ມາ​ນຳ​ໄທ​ຍ​ໝົດເລີຍ.”

ພະ​ນັງ​ການ​ຣັ​ຖກອນ ຈຳ​ເປັນ​ຕ້ອງ​ໄດ້​ປູກ​ພືດ​ຜັກສວນ​ຄົວ ແລະລ້ຽງເປັດ, ລ້ຽງ​ໄກ່ ຫຼັງ​ຈາກ​ເລີກວຽກ​ມາ​ເຮືອນ.

ພະ​ນັກ​ງານ​ຣັ​ຖຂັ້ນ​ບໍ​ຣິ​ຫານ ຢູ່ນະ​ຄອນ​ຫລວງວຽງ​ຈັນ ໄດ້​ກ່າວ​ໃນ​ວັນ​ທີ 24 ມີ​ນາ ວ່າ:  

“ນອກ​ຈາກ​ໂມງ​ທີ່​ວ່າ ເຮົາ​ໄປ​ການ​ມາ​ແລ້ວ ເຮົາ​ກໍ​ມາ​ເຮັດ​ເປັນ​ເສ​ຖ​ກິ​ຈ​ຄອບ​ຄົວ ພໍ​ຢູ່​ພໍ​ກິນຫັ້ນ​ນ່າ ຄັນ​ແມ່ນ​ອາ​ໃສ​ເງິນ​ເດືອນ ບໍ່​ໄດ້ ເພາະ​ວ່າ ເຮົາ​ມີ​ອາ​ຫານ​ຢູ່​ເຮືອນ​ແລ້ວ ເຮົາ​ກໍ​ບໍ່​ໄດ້​ໄປ​ຊື້ ມີ​ແຕ່​ຊື້​ເຄື່ອງ​ປຸງ ຄື ເວົ້າ​ຫັ້ນ​ນ່າ.”

ຢູ່​ແຂວງວຽງ​ຈັນ ລາ​ຄາ​ສິນ​ຄ້າກໍ​ສູງຂຶ້ນ ຍ້ອນ​ວ່າ ສິນ​ຄ້າ​ຫຼາຍ​ຢ່າງ ນຳ​ເຂົ້າ​ມາ​ຈາກ​ປະ​ເທດ​ໄທ​ຍ ແລະ ຊາວ​ຄ້າ​ຂາຍ ຕ້ອງໃຊ້​ເງິນ​ກີບ​ແລ້ວ ເພື່ອ​ແລກ​ເປັນ​ເງິນ​ບາດ​ໄທ​ຍ ຊື້​ສິນ​ຄ້າ​ເຂົ້າ​ມາ​ເປັນ​ຈຳ​ນວນ​ຫຼາຍກວ່າ​ທີ່​ຜ່ານ​ມາ ເປັນ​ຕົ້ນ​ໃຊ້​ເງິນ​​ລາວແລກ​ເງິນ​ບາດ​ໄທ​ຍ.

ແມ່​ຄ້າ​ ຢູ່ ແຂວງວຽງ​ຈັນ ຄົນ​ນຶ່ງ ໄດ້​ກ່າວ​ວ່າ:   

“ເປັນ​ຍ້ອນ ອັນ​ສິນ​ຄ້າ​ນຳ​ເຂົ້າ ມັນ​ເງິນ​ບາດ ມັນ​ຂຶ້ນ​ລາ​ຄາ ອັດ​ຕ​ຣາ​ແລກ​ປ່ຽນ​ມັນ​ຂຶ້ນ​ລາ​ຄາ ເຮົາ​ນຳ​ເຂົ້າ​ເຄື່ອງ​ແພງ​ຂຶ້ນ ຖ້າ​ເຮົາ​ບໍ່​ຂຶ້ນ​ລາ​ຄາ​ສິນ​ຄ້າ ເຮົາ​ກໍ​ຂາຍ​ຂາດ​ທຶນ ດຽວນີ້​ສິນ​ຄ້າ ໂຕ​ໃດ ມັນ​ກໍ​ຂຶ້​ໜ​ໝົດ ຖ້າ​ວ່າ ເປັນ​ຂອງ​ໄທ​ຍ ຖ້າ​ເປັນ​ຂອງວຽດ​ ຂອງ​ຈີນ ລາ​ຄາ​ນ້ຳ​ມັນ​ເຊື້ອ​ໄຟ ມັນ​ແພງ ເຂົາ​ເຈົ້າ ກໍ​ຂຶ້ນ.”

ອີງ​ຕາມການ​ຂໍ້​ມູນຈາກ​ຮ້ານ​ແລກ​ປ່ຽນ​ເງິນ​ຕ​ຣາ ບາງ​ຮ້ານ ຢູ່​ນະ​ຄອນ​ຫລວງວຽງ​ຈັນ ຈາກ​ແຕ່​ກ່ອນ 300 ກີບ ຕໍ່ 1 ບາດ, ແຕ່​ ປັດ​ຈຸ​ບັນ 410 ກີບ ຕໍ່ 1 ບາດ. ແຕ່ອັດ​ຕ​ຣາ​ແລກ​ປ່ຽນ ຢູ່​ທະ​ນາ​ຄານຕ່າງ​ຈາກ ອັດ​ຕ​ຣາ​ແລກ​ປ່ຽນ​ຢູ່​ຮ້ານ ເຊັ່ນ ອັດ​ຕ​ຣາ​ແລກ​ປ່ຽນ ຈາກ​ທະ​ນາ​ຄານ​ການ​ຄ້າ​ ຕ່າງ​ປະ​ເທດລາວ ໃນ​ວັນ​ທີ 24 ມີ​ນາ ຢູ່​ທີ່ 377.21 ກີບ ຕໍ່ 1 ບາດ, ລຳ​ລັບ​ຊື້​ເຂົ້າ ໃນ​ຂະ​ນະ​ທີ່ ​ຂາຍ​ອອກແມ່ນ 380 ກີບ ຕໍ່ 1 ບາດ.

ທົ່ວ​ປະ​ເທດ​ລາວ ລາ​ຄາ​ເຄື່ອງ​ອຸ​ປ​ໂພກ ແລະ ບໍ​ຣິ​ໂພກ ທີ່​ຈຳ​ເປັນ ປະ​ຈຳ​ວັນ ແພງ​ຂຶ້ນ ກໍ​ຍ້ອນ​ວ່າ ສິນ​ຄ້າ​ປະ​ເພດ​ດັ່ງ​ກ່າວ ສ່ວນ​ໃຫຍ່ ນຳ​ເຂົ້າ​ມາ​ຈາກ​ໄທ​ຍ ແລະ ພໍ່​ຄ້າ​ແມ່​ຄ້າ ຕ້ອງ​ຊື້​ສິນ​ຄ້າ​ນັ້ນ ດ້ວຍ​ເງິນ​ບາດ​ໄທຍ ໂດຍ​ເອົາ​ເງິນ​ກີບໄປ​ແລ​ກ​ເປັນ​ເງິນ​ບາດ, ຂະ​ນະ​ທີ່ ປັດ​ຈຸ​ບັນ ເງິນ​ບາດ​ແຂງ​ຄ່າ, ເງິນ​ກີບ​ອ່ອນ​ຄ່າ.

ຖ້າ​ຣັ​ຖ​ບານ ບໍ່​ແກ້​ໄຂອັດ​ຕ​ຣາ​ເງິນ​ເຟີ ລາ​ຄາ​ສິນ​ຄ້າກໍ​ຈະ​ແພງ​ຂຶ້ນຕໍ່​ໄປ.

ເຈົ້າ​ໜ້າ​ທີ່​ຜ​ແນກ​ອຸດ​ສາ​ຫະ​ກັມ ແລະ ການ​ຄ້າ ນະ​ຄອນ​ຫລວງວຽງ​ຈັນ ໄດ້​ກ່າວ​ໃນ​ວັນ​ທີ 24 ມີ​ນາ ວ່າ:   

“ສິນ​ຄ້າ​ທີ່​ເຮົາ​ບໍ່​ສາ​ມາດ​ຜ​ລິດ​ໄດ້ ທີ່​ນຳ​ເຂົ້າ​ມານີ້ ມັນ​ຂຶ້ນ​ໝົດ​ມັນ​ກໍ​ແລ່ນ​ຕາມ​ເງິນ​ບາດ​ເນາະ ພວກ​ເຮົາ ກໍ​ບໍ່​ສາ​ມາດ​ທີ່​ຈະ​ຄວບ​ຄຸມ​ໄດ້ດອກ ນອກ​ຈາກ​ຂຶ້ນ​ເທິງ ຣັ​ຖ​ບານ​ເພິ່ນ​ແກ້​ໄຂ​ແນວ​ໃດ ກ່ຽວ​ກັບ​ເງິນ​ບາດ ຄັນ​ວ່າ ແກ້​ໄຂ​ໂຕ​ນັ້ນ​ໄດ້ ມັນ​ກໍ​ຊິ​ມີ​ການ​ຫຼຸດ​ລົງ ຄັນ​ແກ້​ໄຂ​ການ​ເໜັງ​ຕີງເງິນ​ຕ​ຣາບໍ່​ໄດ້ ຄື​ຊິ​ຍາກ ເພາະ​ວ່າ ຕາມ​ສອບ​ຖາມ ເຂົາ​ເຈົ້າ​ຊື້ ເຂົ້າ​ມາ ຊື້​ເປັນ​ເງິນ​ບາດ.”

ບັດ​ຈຸ​ບັນ ມາ​ຕ​ການ​ຄຸ້ມ​ຄອງ​ລາ​ຄາ​ເຄື່ອງ​ອຸ​ປ​ໂພກ ແລະ ບໍ​ຣິ​ໂພກ ທີ່​ຈຳ​ເປັນ​ໃນ​ຊີ​ວິດປະ​ຈຳ​ວັນ ຍັງ​ບໍ່​ທັນ​ມີ ຕ້ອງ​ໄດ້​ລໍ​ຖ້າ ຣັຖ​ບານສັ່ງ​ການ ໃຫ້​ຄຸ້​ມ​ຄອງ​ລາ​ຄາ​ສິນ​ຄ້າ ຢ່າງ​ເປັນ​ທາງ​ການ ຄື ລ​າ​ຄາ​ຊີ້ນ​ໝູ ທີ່​ມີ​ການ​ຄຸ້ມ​ຄອງ​ລາ​ຄາ ບໍ່​ໃຫ້​ພໍ່​ຄ້າ ແມ່​ຄ້າ ປັບ​ຂຶ້ນ​ລາ​ຄາ​ຊີ້ນ​ໝູ ເກີນ​ກຳ​ນົດ ແລະ ຖ້າ​ຜູ້​ໃດ​ຂຶ້ນ​ລາ​ຄາ​ສິນ​ຄ້າ​ເກີນ​ທີ່​ທາງ​ການ​ກຳ​ນົດ ກໍ​ຈະ​ຖືກ​ປັບ​ໃໝ, ແຕ່​ເຈົ້າ​ໜ້າ​ທີ່​ກ່ຽວ​ຂ້ອງ ຂັ້ນ​ເມືອງ ແລະ ແຂວງ ບໍ່​ສາ​ມາດ​ເຮັດ​ແນວ​ນັ້ນ ຍ້ອນ​ວ່າ ຍັງ​ບໍ​ມີ​ແຈ້ງ​ການ ໃຫ້​ຄຸ້ມ​ຄອງ​ສິນ​ຄ້າ ເຄື່ອງ​ອຸ​ປະ​ໂພກ ແລະ ບໍ​ຣິ​ໂພກ ອີງ​ຕາມ​ຂໍ້​ມູນ​ຈາກ​ຜ​ແນກ​ອຸດ​ສາ​ຫະ​ກັມ ແລະ ການ​ຄ້າ ນະ​ຄອນ​ຫລວງວຽງ​ຈັນ.