ຂ.ອຸດົມໄຊຍັງຂາດງົປສ້າງ ບ້ານໃໝ່

ແຂວງອຸດົມໄຊ ຕ້ອງການທຶນຢ່າງໜ້ອຍ 1 ຕື້ກີບ ເພື່ອສ້າງບ້ານໃໝ່ໃຫ້ຊາວບ້ານ ທີ່ຈໍາເປັນຕ້ອງໄດ້ໂຍກຍ້າຍອອກຈາກບ້ານເກົ່າ ທີ່ຖືກນໍ້າ ຖ້ວມເລື້ອຍໆ. ໜັງສືພິມວຽງຈັນທາມສ໌ ຂອງທາງການລາວຣາຍງານ ວ່າ ທ່ານ ຄໍາເພັງ ຈິດຕະວົງ ຮອງເຈົ້າແຂວງ ແຂວງອຸດົມໄຊກ່າວວ່າ ແຂວງອຸດົມໄຊຕ້ອງການງົບປະມານ 2 ຕື້ກີບ ເພື່ອສ້າງບ້ານໃໝ່ ໃນເມືອງປາກແບງ ປັດຈຸບັນໄດ້ມາແລ້ວ 1 ຕື້ກີບ ຍັງຕ້ອງການອີກ 1 ຕື້. ທາງການແຂວງຕ້ອງການເງິນຕື່ມ ເພື່ອເນັ່ງສາຍໄຟຟ້າ ແລະຕິດຕັ້ງຣະບົບນໍ້າລິນເຂົ້າສູ່ບ້ານໃໝ່.

ບ້ານເພັຍຫົວນໍ້າ ເມືອງປາກແບງ ແຂວງອຸດົມໄຊ ຖືກນໍ້າຖ້ວມແລະດິນເຈື່ອນ ທັບເມື່ອເດືອນສິງຫາປີນີ້ ເປັນເຫດໃຫ້ມີຄົນເສັຍຊີວິດ 17 ຄົນ ແລະຜົນເສັຍຫາຍກວ່າ 300 ຕື້ກີບ. ທາງການແຂວງອຸດົມໄຊເຫັນວ່າ ບ້ານນີ້ຕັ້ງຢູ່ບ່ອນຫລຸບ ແລະຢູ່ໃກ້ນໍ້າເກີນໄປ ຈຶ່ງຖືກນໍ້າຖ້ວມເລື້ອຍໆ. ສະນັ້ນຊາວບ້ານຈໍາເປັນຕ້ອງໂຍກຍ້າຍໄປຢູ່ບ້ານໃໝ່ ທີ່ຕັ້ງຢູ່ສູງກວ່າ ແລະປອດໄພກວ່າ.

ນອກຈາກ ບ້ານເພັຍຫົວນໍ້າ ຢູ່ແຂວງອຸດົມໄຊແລ້ວ ທາງການລາວຍັງເຫັນວ່າ ຫລາຍບ້ານກໍອາດຈໍາເປັນຕ້ອງ ໂຍກຍ້າຍເຊັ່ນກັນ. ປັດຈຸບັນ ເຈົ້າໜ້າທີ່ທີ່ກ່ຽວຂ້ອງ ກໍາລັງສຶກສາເບິ່ງວ່າ ບ້ານໃດຈະຈໍາເປັນໂຍກຍ້າຍ ແລະຈະໃຊ້ເງິນງົບປະມານຫລາຍເທົ່າໃດ.

ປີນີ້ ຫລາຍເຂດແຂວງຂອງລາວ ປະສົບກັບພັຍນໍ້າຖ້ວມຢ່າງໝັກ ມີຄົນເສັຍຊີວິດ 29 ຄົນ ປະຊາຊົນ ເກືອບ 4 ແສນຄົນໄດ້ຮັບຜົນກະທົບ ແລະມີຜົນເສັຍຫາຍກວ່າພັນຕື້ກີບ.