ຊາວລາວເຮັດວຽກຢູ່ໄທແບບ ໄປ-ກັບ

ຄົນລາວຂ້າມໄປເຮັດວຽກ ຢູ່ຝັ່ງໄທ ຜ່ານດ່ານຂົວ ມິດຕະພາບ ນ້ຳເຫືອງ ມື້ລະ ປະມານ 50 ຄົນ ສ່ວນນຶ່ງ ໄປແລ້ວກັບ ໃນມື້ດຽວກັນ, ດັ່ງ ຜູ້ຂັບຣົດ ຕຸກຕຸກຊາວໄທ ຄົນນຶ່ງ ທີ່ແລ່ນ ສົ່ງຄົນງານລາວ ເປັນປະຈຳ ເວົ້າວ່າ:

“ມື້ນຶ່ງກະຫຼາຍ ສີ່ຫ້າສິບປາຍ ຫລັງໆມານີ້ ໄປລະກັບມາ ໄປໝົດ ແລະກໍມາໃໝ່ ໄດ້ 9 ມື້.”

ຄົນລາວຈາກແຂວງໄຊຍະບຸຣີ ແລະແຂວງອື່ນໆ ທີ່ໄປເຮັດວຽກ ຢູ່ແຂວງເລີຍ ແລະແຂວງ ໃກ້ຄຽງຂອງໄທ ຈະໄດ້ ຮັບຄ່າຈ້າງ 300 ບາດຕໍ່ມື້ ຕາມກົດໝາຍ ຂອງໄທ. ສື່ມວລຊົນໄທ ຣາຍງານວ່າ ທ້າວ ໄຊຊະນະ ແກ້ວພິມພາ ນັກຄ້າຢາເສບຕິດ ຣາຍໃຫຍ່ ຂອງລາວ ທີ່ຖືກຈັບຢູ່ໄທ ເມື່ອເດືອນທີ່ແລ້ວ ມັກທຽວເຂົ້າ-ອອກ ຣະຫວ່າງ ລາວແລະໄທ ເລື້ອຍໆ ໂດຍຜ່ານດ່ານ ບໍ່ຄອນເຜິ້ງ-ທ່າລີ້ ຊຶ່ງເປັນດ່ານ ຂົວມິດຕະພາບ ນ້ຳເຫືອງ ຣະຫວ່າງ ແຂວງໄຊຍະບຸຣີ ແລະ ແຂວງເລີຍ ຂອງໄທ.

ເມື່ອສອງມື້ກ່ອນ ທາງການໄທ ກໍສັ່ງຍ້າຍ ເຈົ້າໜ້າທີ່ຕໍມໍ ຂອງໄທ ສອງຄົນ ທີ່ຖ່າຍຮູບ ຮ່ວມກັບທ້າວ ໄຊຊະນະ ແກ້ວພິມພາ, ປັດຈຸບັນ ທາງການ ເຈົ້າໜ້າທີ່ ຕຳຣວດໄທ ກຳລັງສອບສວນ ເຈົ້າໜ້າທີ່ຕໍມໍ ທັງສອງຄົນ ນັ້ນຢູ່ວ່າ ມີສ່ວນພົວພັນ ກັບ ທ້າວ ໄຊຊະນະ ແນວໃດ.