ແຂວງຫລວງພຣະບາງ ເປີດບໍຣິການ ບ່ອນຂາຍປີ້ ຣົຖໄຟລາວ-ຈີນ ຕື່ມອີກແຫ່ງນຶ່ງ ຢູ່ໃຈກາງ ນະຄອນຫລວງພຣະບາງ ແຕ່ ປະຊາຊົນ ບໍ່ພໍໃຈຕໍ່ການເກັບຄ່າທຳນຽມ 20,000 ກີບ ຕໍ່ປີ້.
ໃນວັນທີ 17 ມີນາ, ໄດ້ມີການເປີດບໍຣິການຈຸດຂາຍປີ້ຣົຖໄຟ ລາວ-ຈີນ ໃນນະຄອນຫລວງພຣະບາງ ແຫ່ງທີ 2 ກົງກັນຂ້າມກັບຕຶກ ສຳນັກງານຫ້ອງວ່າການແຂວງ ແລະ ຜແນກພົວພັນຕ່າງປະເທດ ຫ່າງຈາກຕລາດກາງຄືນປະມານ 600 ແມັດ, ແຕ່ວ່າ ຢູ່ ຈຸດຂາຍປີ້ແຫ່ງນີ້ ເຈົ້າໜ້າທີ່ມີການເກັບຄ່າບໍຣິການ ຫຼື ຄ່າທຳນຽມ ເພີ່ມອີກ 20,000 ກີບ ຕໍ່ປີ້ ເຮັດໃຫ້ຊາວ ນະຄອນຫລວງພຣະບາງ ຈຳນວນນຶ່ງ ບໍ່ພໍໃຈ ເພາະວ່າ ເຂົາເຈົ້າຕ້ອງໄດ້ເສັຽເງິນເພີ່ມອີກ ໃນຂະນະທີ່ ໄປຊື້ປີ້ຢູ່ສະຖານນີຣົຖໄຟໂດຍກົງ ຜູ້ໂດຍສານ ບໍ່ໄດ້ເສັຽຄ່າທຳນຽມ.
ຊາວນະຄອນຫລວງພຣະບາງ ທ່ານນຶ່ງ ກ່າວຕໍ່ ເອເຊັຽເສຣີ ໃນວັນທີ 17 ມີນາ ວ່າ:
" ມັນ ເປັນບໍຣິສັດໃຫຍ່ລະດັບໂລກຫັ້ນເນາະ ເຂົາເຈົ້າເນາະ ເຮັດແນວນັ້ນແນ່ນອນແຫຼະ ປະຊາຊົນ ກໍບໍ່ພໍໃຈເນາະ ທຸກໆປີ້ ແຫຼະ ມັນຕ້ອງໄດ້ເສັຽຄ່າທຳນຽມແພງ ສິ່ງນ້ອຍໆ ເຮັດອອນລາຍກະຍັງເຮັດບໍ່ໄດ້ ກະຢາກເປັນຄຳຖາມຢູ່ເນາະ."
ຖ້າໄປຊື້ປີ້ຢູ່ສະຖານນີ ຣົຖໄຟໂດຍກົງ ຜູ້ໂດຍສານຈະບໍ່ໄດ້ເສັຽຄ່າທຳນຽມ, ຊາວຫລວງພຣະບາງ ອີກທ່ານນຶ່ງ ໄດ້ກ່າວວ່າ:
“ແບບວ່າເຂົາເຈົ້າມາຂາຍຢູ່ໃນເມືອງເລີຍ ຊື້ສາມມື້ກ່ອນໜ້າ ກົດຣະບຽບເພິ່ນເວົ້າຫັ້ນນ່າ ເພິ່ນຈະບວກເພີ່ມ 20,000 ກີບ ແຕ່ເຮົາກໍບໍ່ຮູ້ວ່າບວກເພີ່ມນີ້ ບວກເພີ່ມຄ່າຫຍັງ ເປັນເຂົ້າມາໃນເມືອງມັນ ຈະຕ້ອງເປັນລາຄາເທົ່າກັບທີ່ເຂົາຂາຍເນາະ ຫຼື້ ມັນມີບໍຣິສັດອື່ນຮັບເອົາມາຂາຍບໍ່ ຫຼືວ່າ ເປັນການຣົຖໄຟເອງ ຫຼື ມັນມີບໍຣະສັດອື່ນຮັບເອົາມາຂາຍບໍ່ ຫຼືວ່າ ເປັນທາງການຣົຖໄຟເອງ ທີ່ມາຕິດຕັ້ງຂາຍ ແລ້ວແມ່ນ 20,000 ກີບ ຄ່າຫຍັງຊິນ່າ.”
ທີ່ຜ່ານມາ ເຄີຍມີຜູ້ປະກອບການ ບໍຣິສັດທ່ອງທ່ຽວ ໄປຮັບເອົາປີ້ຣົຖໄຟມາຂາຍຕໍ່ໃຫ້ລູກຄ້າ ແຕ່ ຕ້ອງຮັບມາບໍ່ເກີນ 2 ປີ້ ສະນັ້ນ ຜູ້ປະກອບການຄົນດັ່ງກ່າວຈຶ່ງເຊົາເຮັດ ເພາະວ່າ ບໍ່ກຸ້ມຄ່າ.
ຜູ້ປະກອບການ ທ່ອງທ່ຽວ ໄດ້ກ່າວວ່າ:
" ບໍ່ ໄດ້ເຮັດແລ້ວນ່າ ຊ້ວງກ່ອນຫັ້ນ ແບບແຂກສັ່ງແລ້ວຈັ່ງໄປຊື້ໃຫ້ແຂກນ່າ ກໍບໍ່ຢາກຄຸ້ມນ່າ ເຂົາບໍ່ປ່ອຍຫຼາຍຫັ້ນນ່າ ເຂົາເອົາມາຈຳໜ່າຍໃນເມືອງ ຢູ່ວຽງຈັນ ເຊັນເຕີ ຫຼືຢູ່ໂຕເມືອງຫລວງພຣະບາງນີ້ ໄດ້ເສີຍ 20,000 ກີບ ຊື້ຢູ່ສະຖານນີບໍ່ໄດ້ເສັຽ."
ລາຍລະອຽດຂອງການຂາຍປີ້ ຢູ່ຈຸດບໍຣິການແຂວງຫລວງພຣະບາງ ກໍຄື ຈະຂາຍໃນໄລຍະເວລາກ່ອນການຂາຍປີ້ແມ່ນ 3 ມື້, ຄິດໄລ່ຄ່າບໍຣິການ ຫຼື ຄ່າທຳນຽມ ໃນລາຄາ 20,000 ກີບ ຕໍ່ປີ້ ເລີ່ມຂາຍໃນເວລາ 10 ໂມງ ເຊົ້າ ຫາ 15 ໂມງ ທຸກໆມື້ ແລະ ຈະຢຸດຂາຍໃນເວລາທີ່ປີ້ໝົດ, ແຕ່ລະຄົນຈະຊີ້ບໍ່ເກີນ 2 ປີ້ ເທົ່ານັ້ນ, ໃນເວລາຊື້ ຜູ້ໂດຍສານຈະຕ້ງສະແດງບັດປະຈຳໂຕ ແລະ ໃບຢັ້ງຢືນການສັກວັກຊີນ ປ້ອງກັນ ໂຄວິດ-19.
ຈຸດບໍຣິການຂາຍປີ້ ເປັນຈຸດທີ່ສະດວກສະບາຍກວ່າ ໄປຊື້ຢູ່ໃນສະຖານນີຣົຖໄຟ ແລະ ເຈົ້າໜ້າທີ່ຈະບໍ່ໃຫ້ຊື້ຂາຍຕໍ່.
ເຈົ້າໜ້າທີ່ກ່ຽວຂ້ອງ ແຂວງຫລວງພຣະບາງ ທີ່ຂໍສງວນຊື່ ແລະ ຕຳແໜ່ງ ໄດ້ກ່າວວ່າ:
“ຂາຍນອກສະຖານທີ່ຫັ້ນນ່າ ຢູ່ອັນແຖວບ້ານທາດຫລວງ ເຂົາເຈົ້າເກັບເພີ່ມ ແຕ່ເຂົາເຂົາເຈົ້າກະເປີດປະມານ 10 ໂມງ ເພາະ ມັນກະສະດວກສະບາຍ ຫັ້ນ ບໍ່ຕ້ອງຖ້າຂີຣົຖໄປໄກ ສະຖານນີໄກແດ່ ໂອ້ປະມານ 20-30 ນາທີພຸ້ນແຫຼະ ແບບວ່າ ຄັນວ່າປີ້ໝົດມັນກໍເສັຍເວລາ ເຂົາເຈົ້າໄປກັບຫັ້ນນ່າ ເຂົາເຈົ້າກໍບໍ່ໃຫ້ຊື້ໄປຂາຍຕໍ່ຫັ້ນແຫຼະ.”
ເຈົ້າໜ້າທີທ່ານນີ້ ກ່າວຕື່ມອີກວ່າ ສາເຫດທີ່ມີການເກັບຄ່າ ທຳນຽມປີ້ຣົຖໄຟເພີ່ມ ຍ້ອນວ່າ ທາງການຕ້ອງການເຊົ່າສະຖານທີ່ ເພື່ອເປີດຈຸດບໍຣິການໃຫ້ຂາຍປີ້ເພີ່ມຂື້ນ ຈຶ່ງຕ້ອງມີການເກັບຄ່າທຳນຽມ. ຈຸດຂາຍປີ້ ຈະປະກາດຈຳນວນຖ້ຽວຣົຖໄຟທີ່ຂາຍ ລາຄາ ປີ້ ແລະ ຄ່າບໍຣິການນອກສະຖານທີ່ ເພື່ອໃຫ້ຜູ້ໂດຍສານສາມາດເຫັນໄດ້ໃນເວລາໂຕຈິງ ຈະສາມາດຊື້ປີ້ຈາກຣົຖໄຟ ຈາກຫລວງພຣະບາງ ໄປຫາເມືອງໄຊ ແຂວງອຸດົມໄຊ ຕໍ່ໃສ່ດ່ານບໍ່ເຕັນ ແຂວງ ຫລວງນ້ຳທາ ຫຼື ຈາກແຂວງຫລວງພຣະບາງ ຜ່ານແຂວງວຽງຈັນ ລົງມາຫານ ນະຄອນຫລວງວຽງຈັນ.
ການຂາຍປີ້ ຈະບໍ່ຮັບຂາຍດ້ວຍເງິນສົດ ແຕ່ຈະຈ່າຍດ້ວຍບັດ ແລະ QR Code ທີ່ເຄື່ອງ POS.
ຢ່າງໃດກໍຕາມ, ເຈົ້າໜ້າທີ່ກ່ຽວຂ້ອງ ກ່າວວ່າ ການເພີ່ມຈຸດບໍຣິການຂາຍປີ້ ເພີ່ມຂຶ້ນນີ້ ບໍຣິສັດທາງຣົຖໄພລາວ-ຈີນ ຢາກຈະປັບປຸງການບໍຣິການຂາຍປີ້ ໃຫ້ດີຂຶ້ນກວ່າເກົ່າ ເພື່ອຈະບໍ່ໄດ້ໄປລໍຖ້າຊື້ປີ້ຢູ່ສະຖານີຣົຖໄຟ ພຽງຢ່າງດຽວ.