ຄົນລາວ ຫຼາຍຄົນ ຍັງລໍຖ້າ ໄປເຮັດວຽກ ຢູ່ໄທຍ

ມາຮອດປັດຈຸບັນ ຄົນລາວຈໍານວນຫຼາຍ ຍັງລໍຖ້າໄປເຮັດວຽກທີ່ປະເທດໄທຍ ຖ້າຫາກທາງການໄທຍ ເປີດໃຫ້ຄົນງານລາວ ໄປເຮັດວຽກຢູ່ປະເທດໄທຍ ອີກຄັ້ງ.​ ຊາວນະຄອນຫຼວງວຽງຈັນ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 15 ພຶສຈິີກາ ວ່າ:

“ຢາກໄປເຮັດວຽກຢູ່ໄທຍ ເພາະວ່າ ເງິນເດືອນຢູ່ໄທຍ ເອົາສູງມາຢູ່ລາວຊອກວຽກຍາກ ຄ່າແຮງງງານຕໍ່າໂພດ ເດືອນນຶ່ງກໍ 1 ລ້ານກີບ ໄປຢູ່ໂນ້ນກໍປະມານ 10,000 ບາດ ຫຼືວ່າ 20,000 ບາດ ຢາກໃຫ້ມີການຊ່ວຍເຫຼືອແບບວ່າ ຊ່ວຍອອກຄ່າເດີນທາງໃຫ້ແດ່ ແບບວ່າ ລາວມາໄທຍ.”

ຄົນງານລາວຫຼາຍຄົນ ຕ້ອງການຢາກໄປເຮັດວຽກຢູ່ປະເທດໄທຍ ແຕ່ ກໍບໍ່ສາມາດໄປໄດ້ ຍ້ອນວ່າ ຕ້ອງເສັຽຄ່ານາຍໜ້າ ແລະເສັຽຄ່າເອກສານແພງ. ຊາວນະຄອນຫຼວງພຣະບາງ ທ່ານນຶ່ງ ໄດ້ກ່າວ ໃນວັນທີ 15 ພຶສຈິກາ ວ່າ:​

“ຄົນລາວເຮົາລໍຖ້າແບບຢາກກັບໄປເຮັດວຽກຢູ່ທີ່ປະເທດໄທຍ ມັນກໍເສັຽຄ່ານາຍໜ້າປະມານບໍ່ຕໍ່າກວ່າ 30,000 ບາດ ແລ້ວຄິດສະເລ່ຍແບບພາສປອດ MOU ເຂົ້າໄປໃນບໍຣິສັດ ແລ້ວເຂົາຈະໃຫ້ເສັຽປະກັນສັງຄົມ ແລ້ວ ຕັດຄ່ານາຍໜ້າເຂົ້າປະເທດໄທຍ ນາຍໜ້າໄປຮັບ ເໝືອນແບບນາຍໜ້າຂາຍແຮງໃຫ້ກັບນາຍຈ້າງ ແລ້ວເຂົາກໍຈະຮັບເງິນຈາກນາຍຈ້າງມາຜູ້ນຶ່ງນ່າ 18,000 ບາດ.”

ໃນກາງເດືອນ ພຶສຈິກາ ທີ່ຜ່ານມາ ຄະນະກັມການ ບໍຣິຫານສະຖານະການ ແຜ່ຣະບາດຂອງໂຄວິດ-19 ໃນໄທຍ ມີມະຕິໃຫ້ນາຍຈ້າງ ສາມາດນໍາເຂົ້າຄົນງານຈາກປະເທດລາວ, ພະມ້າ ແລະ ກັມພູຊາ ໄດ້ ຕາມບົດບັນທຶກຄວາມເຂົ້າໃຈສະບັບພິເສດ ເພື່ອແກ້ໄຂການຂາດແຄນຄົນງານໃນປະເທດໄທຍ ແລະ ກະຊວງແຮງງານຂອງໄທຍ ມີແຜນການຈະອະນຸຍາດໃຫ້ນາຍຈ້າງໄທຍ ເອົາຄົນງານເຂົ້າມາໃນເດືອນທັນວາ 2021 ເປັນຕົ້ນໄປ. ປັດຈຸບັນ ທາງການໄທຍ ໄດ້ກະກຽມ ວັກຊີນປ້ອງກັນໂຄວິດ-19 ໃຫ້ແກ່ຄົນງານຕ່າງຊາດ ທີ່ຍັງບໍ່ທັນໄດ້ສັກວັກຊີນຈໍານວນ 4 ແສນໂດສ. ທ່ານ ສຸຊາດ ຊົມກິີ່ນ ຣັຖມົນຕຣີກະຊວງແຮງງານງານຂອງໄທຍ ໄດ້ກ່າວວ່າ:  

“ພີ່ນ້ອງຄົນໄທຍ ໄດ້ຮັບວັກຊີນກັນແລ້ວ ແລະ ຍັງມີພຽງພໍ ທີ່ຈະຈັດໄວ້ສໍາລັບ MOU ແຮງງານຕ່າງດ້າວທີ່ຈະເຂົ້າມາອີກ 4 ແສນໂດສ ຄັນວ່າຂາດເຂີນກໍເຕີມກັນໄດ້ ຈຶ່ງຈະເກີດຄວາມເຊື່ອໝັ້ນ ບໍ່ແມ່ນວ່າ ນໍາເຂົ້າແຮງງານຕ່າງດ້າວ ເຂົ້າມາແລ້ວ ນໍາເຊື້ອໂຄວິດ-19 ມາຣະບາດໃນປະເທດ ກໍຈະເກີດບັນຫາຕາມມາ.”

ທ່ານ ກ່າວຕື່ມວ່າ ກະຊວງແຮງງານຂອງໄທຍ ຈະເປີດຈຸດບໍຣິສການຮັບຄົນງານຂ້າມຊາດ 5 ແຫ່ງ ຄື ບໍລິເວນຊາຍແດນ ລາວ-ໄທຍ 2 ແຫ່ງ ທີ່ແຂວງໜອງຄາຍ ແລະ ແຂວງມຸກດາຫານ, ບໍລິເວນຊາຍແດນໄທຍ-ພະມ້າ ທີ່ແຂວງຣະນອງ ແລະ ເມືອງແມ່ສອດ ແຂວງຊຽງຮາຍ, ແລະ ບໍລະເວນ ຊາຍແດນໄທຍ-ກັມພູຊາ 1 ແຫ່ງ ທີ່ແຂວງສະແກ້ວ.​

ສໍາລັບຄ່າໃຊ້ຈ່າຍຕ່າງໆ ທີ່ກ່ຽວ ພັນກັບການນໍາເຂົ້າຄົນງານນັ້ນ ຢູ່ປະມານ 10,000 – 27,000 ບາດ ຕໍ່ຄົນ ໂດຍທາງນາຍຈ້າງ ແລະ ລູກຈ້າງ ຈະຕ້ອງຊ່ວຍຮັບຜິດຊອບ. ເຈົ້າໜ້າທີ່ ກະຊວງແຮງງານຂອງໄທຍ ທ່ານນຶ່ງ ໄດ້ກ່າວຕໍ່ວ່າ:

“ສ່ວນຂອງຄົນງານ ກໍເປັນຄ່າໃຊ້ຈ່າຍໃນການກຽມຕົວຈາກບ້ານໂຕເອງມາ ກໍຕ້ອງມີພາສປອດ ຕ້ອງມີການສມັກສອບຄັດເລືອກໃນທີ່ບ້ານໂຕ້້ເອງ ແລ້ວ ກໍຕ້ອງດໍາເນີນການໃຫ້ໄດ້ມາ ຊຶ່ງປາສປອດ ກໍການດໍາເນີນການພາຍໃນປະເທດໂຕເອງກ່ອນ ສ່ວນນາຍຈ້າງໄທຍ ເຂົາກໍຮັບຜິດຊອບເຣື່ອງໃບອະນຸຍາດເຮັດວຽກ ຄ່າກັກໂຕ ຄ່າອີ່ຫຍັງແນວນີ້.”

ເຖິງວ່າ ຈະມີຂະບວນການນໍາເຂົ້າຄົນງານຢ່າງຖືກກົດໝາຍ ແຕ່ ກໍບໍ່ສາມາດແກ້ໄຂບັນຫາແຮງງານລັກລອບເຂົ້າປະເທດໄທຍໄດ້ ຍ້ອນວ່າ ຄົນງານບາງຄົນ ກໍບໍ່ມີເງິນຈ່າຍຄ່າເອກສານ. ຍານາງ ຄໍຣິເຍາະ ມານຸແຊ ທະນາຍຄວາມ ແລະ ຜູ້ປະສານງານເຄືອຂ່າຍປະຊາກອນຂ້າມຊາດ ຫຼື Migrant Working Group ໄດ້ກ່າວວ່າ:

(Thai) “ຄ່າໃຊ້ຈ່າຍໃນການຊອກຫາວຽກ ໃນການນໍາແຮງງານເຂົ້າມາເຮັດວຽກໃນປະເທດໄທຍ ເປັນຄ່າໃຊ້ຈ່າຍສູງຫຼາຍ ທັງຈາກປະເທດຕົ້ນທາງ ແລະ ທັງປະທດໄທຍ ເຖິງແມ່ນວ່າ ຈະນໍາເຂົ້າແບບຖືກກົດໝາຍ ແຕ່ຖ້າບໍ່ມີການແກ້ບັນຫາເຣື່ອງຄ່າໃຊ້ຈ່່າຍ, ກໍຍັງຈະມີການລັກລອບເຂົ້າເມືອງ ຫຼືວ່າ ແຮງງານຂ້າມຊາດທີ່ຍັງຄົງເຮັດວຽກແບບຜິດກົດໝາຍຢູ່ໄທຍ.”

ທາງການລາວແນະນໍາຄົນງານລາວ ໄປເຮັດວຽກຢູ່ປະເທດໄທຍ ໃຫ້ຖືກຕ້ອງຕາມກົດໝາຍ. ເຈົ້າໜ້າທີ່ກະຊວງແຮງງານ ແລະສວັສດິການສັງຄົນ ໄດ້ກ່າວວ່າ:

“ສູນກັກກັນແຮງງານ ເຮົາກໍມີກຽວກັບຫຼັກການ ການໄປແບບຖືກຕ້ອງ ໄປແບບບໍ່ຖືກຕ້ອງ ຫັ້ນນ່າ ໄປຖືກຕ້ອງກໍມີເອີ້ນວ່າ ໄປຍັງບໍຣິສັດຈັດຫາງານເນາະນໍາສົ່ງໄປບໍ່ຖືກຕ້ອງກໍຄືການລັກລອບ ເຮົາຍັງບໍ່ທັນເປີດດ່ານເນາະ ກໍມີແຕ່ວ່າ ເຂົາຫັ້ນແຫຼະ ກໍຄື ໃຊ້ພາສປອດ ທ່ອງທ່ຽວຫັ້ນໄປ.”

ທາງການໄທຍ ໄດ້ຣາຍງານວ່າ ນັບແຕ່ທ້າຍ ເດືອນ ຕຸລາ ເຈົ້າໜ້າທີ່ໄທຍ ສາມາດຈັບໂຕ ຄົນງານຈາກພະມ້າ, ກັມພູຊາ, ລາວ, ຈີນ ແລະ ອິນເດັຽ ທີ່ລັກລອບເຂົ້າໄທຍ ແບບບໍ່ຖືກຕ້ອງ ມີຈໍານວນ 3,000 ຄົນ ໃນນັ້ນມີຄົນ ພະມ້າ ແລະ ກັມພູຊາ ຫຼາຍກວ່າໝູ່.