ລາວ ຈຳກັດ, ຄຸ້ມຄອງ ການອອກຫວຍ
2017.08.18
ການອອກຫວຍ ຂອງ ຣັຖວິສາຫະກິດ ຫວຍພັທນາ ໃນ ນະຄອນຫຼວງວຽງຈັນ
Screen captured from TVLao3 video
ຫ້ອງວ່າການ ສຳນັກງານ ນາຍົກຣັຖມົນຕຣີ ອອກແຈ້ງການ ເພື່ອກວດກາ ແລະ ຄຸ້ມຄອງ ການອອກຫວຍ ປະເພດຕ່າງໆ ຂອງຣັຖວິສາຫະກິດ ຫວຍພັທນາລາວ ພາຍຫຼັງ ທີ່ມີສຽງພິພາກວິຈານ ຈາກສັງຄົມ ກ່ຽວກັບ ການອອກ ແລະ ຂາຍຫວຍ ໂດຍບໍ່ມີຄວາມໂປ່ງໃສ.
ໃບແຈ້ງການ, ທີ່ອອກເມື່ອວັນທີ 17 ເດືອນສິງຫາ ປີ 2017 ນີ້, ຍັງໄດ້ ສັ່ງໃຫ້ຫຼຸດການອອກ ເລກຣາງວັນຫວຍ ຂອງ ຣັຖວິສາຫະກິດ ພັທນາລາວ ຈາກ 2 ເທື່ອ ມາເປັນ 1 ເທື່ອ ຕໍ່ ສັປດາ, ພ້ອມທັງ ຮັບປະກັນ ໃຫ້ມີຄວາມໂປ່ງໃສ ໃນການອອກຣາງວັນ ໃນແຕ່ລະເທື່ອ.
ສ່ວນຫວຍທວາຍເຕະບານ ແລະ ຫວຍສ່ຽງໂຊກ SMS ທີ່ຊື້ຜ່ານຂໍ້ຄວາມນັ້ນ ກໍໃຫ້ເຊົາເຄື່ອນໄຫວ, ໃນຂະນະທີ່ ຫວຍ ທີ່ໄດ້ຮັບ ອະນຸຍາດແລ້ວ ແຕ່ຍັງບໍ່ທັນໄດ້ເຄື່ອນໄຫວ ຄື: ຫວຍປິ່ງໂກ້ ແລະ ຫວຍໂລໂຕ ນັ້ນ ກໍໃຫ້ຍົກເລີກ ໃບອະນຸຍາດ.
ສຳລັບຫວຍຂູດນັ້ນ, ຍັງສາມາດສືບຕໍ່ຈຳໜ່າຍໄດ້ ສະເພາະ ຈຳນວນ ທີ່ໄດ້ພິມໂຕຈິງແລ້ວ, ແຕ່ໃຫ້ຈຳກັດ ສະຖານທີ່ ແລະ ປະລິມານ ໃນການຈຳໜ່າຍນັ້ນລົງ ໃຫ້ເໝາະສົມ. ແລະ ຖ້າຂາຍຈຳນວນເກົ່າໝົດແລ້ວ ໃຫ້ສລຸບຣາຍງາຍ ຕໍ່ຣັຖບານ ເພື່ອຂໍຄຳແນະນຳ ໃນຕໍ່ໜ້າ.
ໃນການປະຕິບັດງານ ດັ່ງກ່າວ, ຣັຖບານ ໄດ້ມອບໝາຍໃຫ້ ກະຊວງການເງິນ ຮ່ວມມື ກັບ ກະຊວງປ້ອງກັນຄວາມສງົບ ແລະ ພາກສ່ວນກ່ຽວຂ້ອງ ດຳເນີນການກວດກາ ແລະ ຄຸ້ມຄອງ, ພ້ອມກັບ ສັ່ງຫ້າມ ການຈຳໜ່າຍ ຫວຍເຖື່ອນ ຈາກຕ່າງປະເທດ ແລະ ຖ້າຫາກວ່າ ມີຜູ້ລະເມີດ ກໍຈະຖືກລົງໂທດ ຕາມກົດໝາຍ ແລະ ຣະບຽບການ ຂອງສປປລາວ.
ໃບແຈ້ງການ ວ່າດ້ວຍ ການກວດກາ ແລະ ຄຸ້ມຄອງ ຫວຍປະເພດຕ່າງໆນີ້ ມີຂຶ້ນ ພາຍຫລັງ ທີ່ວິທຍຸ ເອເຊັຽ ເສຣີ ໄດ້ຣາຍງານ ກ່ຽວກັບ ສຽງວິພາກວິຈານ ຈາກສັງຄົມ ກ່ຽວກັບ ການຂາຍ ແລະ ອອກຫວຍ ໃນປີຜ່ານມາ.
ເມື່ອເດືອນພຶສຈິກາ ປີ 2016, ວິທຍຸ ເອເຊັຽ ເສຣີ ໄດ້ຣາຍງານ ກ່ຽວກັບ ປະຊາຊົນ ສ່ວນຫຼາຍ ໝັ້ນໃຈວ່າ ການອອກຫວຍ ຂອງບໍຣິສັດ ຫວຍພັທນາ ບໍ່ມີຄວາມໂປ່ງໃສ, ຊຶ່ງອາດມີການເລືອກເລກ ໃຫ້ອອກຕາມ ທີ່ຕ້ອງການໄດ້, ແລະ ສົງໃສວ່າ ມີການລ໊ອກເລກ ທີ່ອອກນັ້ນ ຢ່າງຕໍ່ເນື່ອງ ພາຍຫລັງ ທີ່ຜົລການອອກຫວຍ ໄດ້ອອກເລກ “ແມວ” ຫລາຍງວດ ຕິດຕໍ່ກັນ.
ແຕ່ເຖິງຢ່າງໃດ ກໍດີ, ກ່ຽວກັບ ບັນຫາດັ່ງກ່າວ, ເຈົ້າໜ້າທີ່ ກ່ຽວຂ້ອງ ກະຊວງການເງິນ ກໍໄດ້ໃຫ້ອະທິບາຍ ວ່າ ມີການປັບປຸງ ຫລັງຈາກ ມີສຽງວິພາກວິຈນ ຈາກສັງຄົມ ເຣື່ອງການອອກຫວຍ, ຊຶ່ງທ່ານ ວິລະສັກ ພົມມະລັກ, ເຈົ້າໜ້າທີ່ ກະຊວງການເງິນ ແລະ ທັງເປັນນຶ່ງ ໃນຄະນະຮັບຜິດຊອບ ຣັຖວິສາຫະກິດ ຫວຍພັທນາລາວ ໄດ້ກ່າວຕໍ່ວິທຍຸ ເອເຊັຽ ເສຣີ ເມື່ອວັນທີ 28 ເດືອນພຶສຈິກາ ປີ 2016 ວ່າ:
“ຫຼັງຈາກ ມີຫາງສຽງ ຂອງສັງຄົມ ພວກເຮົາ ກໍໄດ້ແຈ້ງຫາ ຫວຍ ງົດການ ອອກຫວຍລົງ ຈາກ 3 ຄັ້ງ ມາເປັນ 2 ຄັ້ງຕໍ່ ອາທິດ ນັບແຕ່ເດືອນ ພຶສຈິກາ ເປັນຕົ້ນມາ ແລະ ໄດ້ມີການ ຖ່າຍທອດສົດ ທາງ ໂທຣະພາບ (ໂທຣະທັດ) ທຸກຄັ້ງ ຕັ້ງແຕ່ ກາງເດືອນ ພຶສຈິກາ ເປັນຕົ້ນມາ ຫລັງຈາກທີ່ ກ່ອນໜ້ານີ້ ມີການ ຖ່າຍທອດສົດ ທາງ ໂທຣະພາບ (ໂທຣະທັດ) ເດືອນລະຄັ້ງ ເທົ່ານັ້ນ.”
ກ່ຽວກັບເຣື້ອງທີ່ ສັງຄົມ ສົງສັຍ ວ່າມີການຖ່ວງ ນ້ຳໜັກ ລູກບານ ນັ້ນ, ທ່ານ ວິລະສັກ ກ່າວວ່າ:
“ຄນະກັມມະການ ອອກຫວຍ ມີການສັ່ງ ນໍ້າໜັກທຸກຄັ້ງ ດ້ວຍຊິງຊັ່ງ ຣະບົບ ໂຕເລກ (Digital) ກ່ອນທີ່ ຈະມີ ການອອກຫວຍ ເພື່ອ ຮັບປະກັນ ວ່າ ລູກບານ ແຕ່ລະໜ່ວຍ ມີນ້ຳໜັກ ເທົ່າກັນໝົດ ແລະ ຖ້າທ່ານໃດ ຍັງສົງສັຍ ກໍຂໍໃຫ້ມາເບິ່ງ ດ້ວຍຕົນເອງ ກໍໄດ້ ຢູ່ໃນ ສະຖານທີ່ ອອກຫວຍ ເພື່ອຄວາມໝັ້ນໃຈ ແລະ ບໍ່ມີຂໍ້ ຄະລຶຫາ.”
ທ່ານກ່າວອີກວ່າ: ເຣື້ອງການອັດເລກ ຫຼື ບໍ່ຂາຍເລກ ບາງໂຕນັ້ນ ແມ່ນ ເປັນໜ້າທີ່ ຮັບຜິດຊອບ ຂອງບໍຣິສັດ ແລະ ສາຂາ ຂອງ ຫວຍພັທນາ ເອງ ແລະ ນອກຈາກນີ້ ກະຊວງການເງິນ ກໍາລັງ ພິຈາຣະນາ ຫຼຸດຈຳນວນ ການອອກຫວຍ ລົງອີກ, ຊຶ່ງອາດຈະປັບ ການອອກຫວຍ ເປັນອາທິດ ລະເທື່ອ.