ທາງຣົດໄຟລາວເຮັດໃຫ້ນັກຂຸດ ແຮ່ ຕືືືື່ນເຕັ້ນ

ຄວາມສໍາເຣັດ ທາງດ້ານວິສວະກັມ ໃນໂຄງການສ້າງທາງຣົດໄຟ ຄວາມໄວສູງ ລາວ-ຈີນ ເຮັດໃຫ້ ບໍຣິສັດ ຂຸດຄົ້ນ ແຮ່ທາດ Pan-Aust ຄິດຢາກໃຊ້ບໍຣິການຂອງຣົດໄຟສາຍນີ້. ເພື່ອສົ່ງແຮ່ທາດຄໍາແລະທອງໄປປະເທດຈີນໂດຍກົງຖ້າ ວ່າຄ່າໃຊ້ຈ່າຍມັນຖືກ ກວ່າຂົນສົ່ງທາງຣົດ ໄປຜ່ານປະເທດໄທ. ຕາມລາຍງານໜັງສືພິມ Sydney Morning Herald ວັນທີ່ 19 ຕຸລາ ອີງຕາມຄໍາເວົ້າຂອງ ທ່ານ Garry Stafford ຜູ້ອໍານວຍການ ຄຸ້ມຄອງ ບໍຣິຫານບໍຣິສັດ PanAust. ທ່ານ Stafford ກ່າວຕໍ່ນັກຂ່າວໃນ Australia ວ່າແທນທີ່ຈະຂົນແຮ່ທາດ ເຂັ້ມຂົ້ນ ທີ່ຜລິດຈາກບໍ່ພູຄໍາ ແລະບ້ານຫ້ວຍຊາຍ ແຂວງວຽງຈັນ ໄປທາງທ່າເຮືອຂອງປະເທດໄທ ທາງບໍຣິສັດອາດຂົນສົ່ງ ໄປປະເທດຈີນ ກໍເປັນໄດ້.

ທ່ານກ່າວໃນຕອນນຶ່ງວ່າ ຖ້າຫາກວ່າຄ່າຂົນສົ່ງ ມັນມີປະສິດທິພາບ ກວ່າ ພວກທ່ານ ກໍຈະພິຈາຣະນາ ເບິ່ງມັນ. ໃນຂນະນີ້ ໂຄງການສ້າງ ທາງຣົດໄຟຄວາມໄວສູງ ລາວ-ຈີນ ຍັງຢູ່ໃນຂັ້ນ ເວົ້າຈາກັນເຣື້ອງເງິນທຶນກໍ່ສ້າງຢູ່. ຕາມໂຄງການນັ້ນ ຈະໃຊ້ຄົນງານຈາກ ປະເທດຈີນ ປະ ມານ 5,000 ຄົນ ແລະໃຊ້ເວລາ 5 ປີໃນການກໍ່ສ້າງ.

ກ່ຽວກັບການໃຊ້ບໍຣິການ ການຂົນສົ່ງແຮ່ທາດໄປທາງລົດໄຟນີ້ ທ່ານ Stafford ຍັງມີຄວາມລະມັດລະວັງຢູ່. ນອກຈາກບໍ່ຄໍາແລະທອງສອງ ແຫ່ງນີ້ແລ້ວ ບໍຣິສັດຂອງທ່ານ ມີຄວາມເຊື່ອໝັ້ນວ່າ ຈະຂະຫຍາຍການຂຸດຄົ້ນແຮ່ຢູ່ເຂດ ເມືອງ ໂພນສວັນ ແຂວງ ຊຽງຂວາງ ທີ່ມີໜ້າພຽງ 2,600 km2. ເວລານີ້ທາງບໍຣິສັດຍັງສຶກສາທາງເລືອກຫລາຍທາງ ໃນການຂົນສົ່ງແຮ່ທາດ ໄປປະເທດຈີນ.

ທາງເລືອກທີ່ນຶ່ງ ອາດລົງທຶນສ້າງໂຮງງານ ຜລິດທອງແລະຄໍາ ຢູ່ກັບທີ່ ກ່ອນຈະສົ່ງອອກ. ທາງເລືອກທີ່ສອງ ແມ່ນສ້າງໂຮງງານບົດແຮ່ຢູ່ທີ່ ໂພນສວັນ ແລະແລ້ວສ້າງຖນົນນ 100 ຫລັກກິໂລແມັດ ເພື່ອຂົນແຮ່ໄປຍັງບໍ່ພູຄໍາ. ການສຶກສາຄວາມເປັນໄປໄດ້ ຄາດວ່າຈະສໍາເຣັດພາຍ ໃນທ້າຍປີນີ້.