ຕລາດຫຼັກຊັບລາວຈະມີຜູ້ ຂາຍຫຸ້ນ ເພີ້ມອີກ

ຕລາດຮຸ້ນ ສປປລາວ ມີແຜນການ ຈະເພີ້ມ ບໍຣິສັດ ຂາຍຫຸ້ນ ເຂົ້າ ໃນ ບັນຊີ ຕລາດຫລັກຊັບ ອີກນື່ງ ບໍຣິສັດ ເປັນ ບໍຣິສັດ ທີ 4 ໃນ ໄຕຣມາດ ສຸດທ້າຍ ປີນີ້. ອິງຕາມ ຄຳເວົ້າຂອງ ປະທານ ແລະ ຜູ້ ບໍຣິຫານ ຕລາດຫລັກ ຊັບລາວ ທ່ານ ເດດພູວົງ ມູນລາຣາດ ທ່ານ ວ່າຍັງມີ ຫຼາຍ ບໍຣິສັດ ກຳລັງ ພິຈາຣະນາ ເຂົ້າມາ ລົງທະບຽນ ຂາຍຫຸ້ນ ໃນຕລາດ ຫລັກຊັບ ລາວ.

ບໍຣິສັດ ທີ່ມີ ຄວາມພ້ອມ ໃນເວລານີ້ ກໍແມ່ນ ບໍຣິສັດ ການຄ້າ ນ້ຳມັນ ລາວ ຫລື Lao Petro Trade ມີແຜນການ ຈະຂາຍຫຸ້ນ ໃນ ໄຕຣມາດ ທີ 4 ປີນີ້. ທ່ານ ເດດພູວົງ ກ່າວຕື່ມວ່າ ນອກຈາກ ນີ້ ກໍຍັງມີ ບໍຣິສັດ ພລັງງານ ແລະ ການບິນ ໃນນັ້ນ ຮ່ວມດ້ວຍ ສາຍການບິນ ລາວ ແຕ່ຍັງ ບໍ່ມີ ຄວາມພ້ອມ ໃນການ ລົງທະບຽນ ແລະ ຍັງຕ້ອງໄດ້ ປັບປຸງ ໂຄງຮ່າງ ການ ດຳເນີນ ທຸຣະກິດ ແລະ ບັນຊີ ຣາຍຮັບ ຣາຍຈ່າຍ ໃຫ້ສອດຄ່ອງ ກັບ ມາຕຖານ ຂອງ ຕລາດ ຫລັກຊັບ.

ທ່ານວ່າ ຕລາດຫລັກຊັບ ໃນລາວ ເປັນ ຕລາດໃຫມ່ ໄດ້ເປີດຂາຍ ຫຸ້ນມາ ພຽງແຕ່ 3 ປີ ເທົ່ານັ້ນ ແລະ ພວກທ່ານ ຍັງຮຽນຮູ້ ຈາກ ປະສົພການ ຂອງ ຕລາດ ຫລັກຊັບ ໃຫຍ່ໆ ໃນ ຂົງເຂດ ຢູ່ ດັ່ງຕລາດ ຫລັກຊັບ ແຫ່ງ ປະເທດໄທ ທີ່ ໄດ້ ຊ່ອຍເຫລືອ ພວກທ່ານ ໃນການ ສ້າງຕັ້ງ ຕລາດ ແລະ ຄວາມຮູ້ ກ່ຽວກັບ ການຂາຍຫຸ້ນ ປະເພດ ຕ່າງໆ.