ອັດຕຣາເງິນເຟີ້ ໃນເດືອນກຸມພາ ຂຶ້ນຮອດ 41%
2023.03.07
ກະຊວງແຜນການ ແລະ ການລົງທຶນ, ນະຄອນຫຼວງວຽງຈັນ. ວັນທີ່ 26 ກຸມພາ ປີ 2023.
ນັກຂ່າວ ພົລເມືອງ
ອັດຕຣາເງິນເຟີ້ ຂອງລາວ ໃນເດືອນກຸມພາທີ່ຜ່ານມາ ຂຶ້ນຮອດ 41% ເຖິງວ່າ ຣັຖບານມີການປະຊຸມ ປຶກສາຫາລື ເພື່ອແກ້ໄຂບັນຫານີ້ ກໍຕາມ.
ປະຊາຊົນເຫັນວ່າ ມັນເປັນການຍາກ ທີ່ຣັຖບານຈະແກ້ໄຂ ເຣື່ອງເງິນເຟີ້ ທີ່ເຮັດໃຫ້ສິນຄ້າ ອຸປະໂພກ ແລະ ບໍລິໂພກ ໃນຊີວິດປະຈຳວັນ ແພງຂຶ້ນ.
ຊາວແຂວງສວັນນະເຂດ ໄດ້ກ່າວຕໍ່ວິທຍຸ ເອເຊັຽເສຣີ ໃນວັນທີ 7 ມີນາ ວ່າ:
“ໂອ້ໂຕນີ້ ສິນຄ້າມັນກໍບໍ່ໄດ້ຫຼຸດລົງຫັ້ນແຫຼະ ຄ່າເງິນມັນຂຶ້ນ ໝູມັນໂລລະແສນພຸ້ນ ເດ້. ຊີ້ນງົວມັນແສນປາຍ. ແຕ່ກ່ອນ ມັນກໍ 80,000-90,000 ກີບ. ໄຂ່ໄກ່ ມັນກໍແຕະນຶ່ງ 65-67 ພັນພຸ້ນ ແຕ່ເກົ່າ ມັນກໍ 40 ປາຍ ກໍແມ່ນຢາກໃຫ້ແກ້ໄຂ ກ່ຽວກັບສິນຄ້ານີ້ແຫຼະ ໃນທ້ອງຕລາດ ປະເພດອາຫານ ແລະ ກໍນ້ຳມັນ.”
ສ່ວນວ່າ ຊີ້ນງົວມີລາຄາປະມານ 100,000 ປາຍກີບ ຕໍ່ກິໂລກຼາມ ຈາກແຕ່ກ່ອນ 80,000-90,000 ກີບ ຕໍ່ກິໂລກຼາມ ອີງຕາມຂໍ້ມູນຈາກປະຊາຊົນ.
ປະເທດລາວ ສ່ວນຫຼາຍນຳເຂົ້າສິ້ນຄ້າ ມາຈາກຕ່າງປະເທດ, ສະນັ້ນ ສິນຄ້າສ່ວນຫຼາຍ ຕ້ອງຊື້ເປັນເງິນຕຣາຕ່າງປະເທດ ແລະ ການຄວບຄຸມ ລາຄາສິນຄ້າ ເປັນໄປໄດ້ຍາກ.
ຊາວແຂວງວຽງຈັນ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:
“ຣັຖບານຄວບຄຸມບໍ່ໄດ້ເດ້ ມັນຫຼາຍປັດໃຈ ນຶ່ງມາກະບໍ່ມີສິນຄ້າ ບາດນີ້ ພວກເຂົາເຈົ້າ ໄປຊື້ເຄື່ອງມາແຕ່ໄທຍ, ເຂົາເຈົ້າຂຶ້ນ ພວກຕລາດ ເຂົາກຊຂຶ້ນນຳ ບາດນີ້ ຂຶ້ນຕາມອັດຕຣາເງິນ. ເງິນຂຶ້ນກໍຂຶ້ນນຳ ເປີດຂາຍພັນທະບັດ ກໍບຶດດຽວ ເຮັດແນວໃດ ທຳໃຈ.”
ຢູ່ຕລາດ ນະຄອນຫລວງວຽງຈັນ ບາງແຫ່ງ ປັດຈຸບັນ ຊີ້ນໝູມີລາຄາປະມານ 80 ພັນກີບ ຕໍ່ກິໂລກຣາມ ຈາກແຕ່ກ່ອນ ລາຄາ 40 ພັນ ກີບ ຕໍ່ກິໂລກຣາມ, ໃນຂະນະທີ່ຊີ້ນໄກ່ ປັດຈຸບັບ ລາຄາປະມານ 60 ພັນ ກີບ ຕໍ່ກິໂລກຣາມ ຈາກແຕ່ກ່ອນ 25 ພັນ ກີບ ຕໍ່ກິໂລກຣາມ.
ຊາວນະຄອນຫລວງວຽງຈັນ ທ່ານນຶ່ງ ໄດ້ກ່າວວ່າ:
“ແມ່ນຂຶ້ນໝົດ ສ່ວນຫຼາຍນ່າ ສ່ວນຫຼາຍກໍແມ່ນອັນ ເປັນປະເພດຊີ້ນເນາະ ຊີ້ນໝູແຕ່ກ່ອນກະ 40 ປາຍພັນ ດຽວນີ້ 80 [ພັນ] ແລ້ວເດ້ ໄຂ່ໄກ່ ກໍຂຶ້ນຫຼາຍເຕີບເດ້ ດຽວນີ້ 60 ພັນແລ້ວ ດຽວນີ້ນ່າ ທີ່ຈິງກໍຢາກໃຫ້ແກ້ໄຂ ຫັ້ນແຫຼະ ກະແກ້ໄຂຍັງບໍ່ໄດ້ດອກດຽວນີ້ ກໍຫາຢູ່ຫາກິນ ໄປຕາມປະຊາຊົນທຳມະດານີ້ແຫຼະ.”
ນອກຈາກນີ້ ຊາວຄ້າຂາຍ ໄດ້ຮັບຜົລກະທົບເຊັ່ນກັນ ເພາະຫຼາຍຄົນຈຳເປັນຕ້ອງ ໄດ້ຂາຍສິນຄ້າໃນລາຄາແພງຂຶ້ນ ຍ້ອນວ່າ ເຂົາເຈົ້າຕ້ອງຊື້ເຂົ້າມາ ເປັນສະກຸນເງິນຕ່າງປະເທດ ແລະ ຕ້ອງຂາຍຕາມອັດຕຣາຂຶ້ນລົງ ຂອງເງິນຕຣາຕ່າງປະເທດ.
ຊາວຄ້າຂາຍທ່ານນຶ່ງ ຢູ່ນະຄອນຫລວງວຽງຈັນ ໄດ້ກ່າວວ່າ:
“ນ້ຳມັນພືດຕຸກນຶ່ງ ຂ້ອຍຂາຍຢູ່ຮ້ານຂ້ອຍ 38 ພັນ ກີບ ເກືອບ 40 ພັນກີບແລ້ວ ກໍໄລໂຕຢ່າງລະ 2 ພັນ ກີບ ເຂົ້າມາສົ່ງເຄື່ອງ ຮ້ານຂນົມແມ່ນຫຍັງຕ່າງໆ ເປັນເງິນບາດໝົດ ເປັນພວກໝີ່ ພວກຫຍັງນີ້ນ່າ ກະເອົາມາຕີ້ ຂາຍເປັນເງິນກີບ ເລື່ອງກະທົບ ກໍກະທົບ ເວົ້າໄປແລ້ວ ມັນກໍໄດ້ແຕ່ອົດທົນເອົາຫັ້ນແຫຼະ ມັນຣັຖບານພັກພວກດຽວ ກໍໄດ້ແຕ່ທຳໃຈແຫຼະເນາະ.”
ສ່ວນວ່າ ສິນຄ້າປະເພດພືດຜັກ ທີ່ຊາວບ້ານສາມາດຜລິດໄດ້ເອງ ກໍມີລາຄາບໍ່ແພງຫຼາຍ, ແຕ່ສິນຄ້າປະເພດຊີ້ນຈະແພງຂຶ້ນ.
ຊາວຄ້າຂາຍ ແຂວງຫຼວງພຣະບາງ ທ່ານນຶ່ງ ໄດ້ກ່າວວ່າ:
“ມັນກໍຂຶ້ນຫັ້ນແຫຼະ ຖ້າຫາກວ່າ ໂຕໃດທີ່ມັນມີຫຼາຍມັນກໍຖືກຫັ້ນນ່າ ແຕ່ທີ່ສິ່ງທີ່ມັນບໍ່ລົງ ມັນກໍຄື ຊີ້ນເນາະ ມັນຂຶ້ນມັນກໍບໍ່ລົງເລີຍ ເປັນຊີ້ນ ເປັນປາ ຈຳພວກນີ້ຫັ້ນນ່າ ແຕ່ສ່ວນຜລິດຕະພັນທີ່ວ່ານຳເຂົ້າ ມັນຈະຂຶ້ນໆ ລົງໆ ຕາມອັດຕຣາແລກປ່ຽນເນາະ ໂຕໃດທີ່ວ່າ ມັນບໍ່ມີ ຫຼືວ່າ ນຳເຂົ້າ ມັນກໍຊ້ອນຂ້າງ ແພງແດ່ຫັ້ນນ່າ.”
ຊາວລາວຫຼາຍຄົນ ທີ່ມີຕົ້ນທຶນ ກໍຫັນໄປປູກຜັກ, ລ້ຽງໄກ່, ລ້ຽງໝູ, ລ້ຽງປາ ເພື່ອເອົາໄວ້ກິນເອງ ໂດຍ ບໍ່ຕ້ອງຕ້ອງໄປຊີ້ໃຫ້ເປືອງເງິນ.
ສ່ວນຄົນທີ່ ບໍ່ມີຕົ້ນທຶນ ບໍ່ມີເງິນ ແລະ ບໍ່ມີທີ່ດິນ ກໍຕ້ອງໄປເປັນລູກຈ້າງເຂົາເຈົ້າ ເພື່ອຫາລ້ຽງຊີບ. ອີງຕາມຂໍ້ມູນ ຈາກສູນສະຖິຕິ ກະຊວງແຜນການ ແລະ ການລົງທຶນ, ອັດຕຣາເງິນເຟີ້ ໃນເດືອນກຸມພາ 2023 ປະມານ 41% ສ່ວນວ່າ ອັດຕຣາເງິນໃນເດືອນມົກຣາ 2023 ປະມານ 40 ເປີເຊັນ ແລະ ອັດຕຣາເງິນເຟີ້ໃນເດືອນທັນວາ 2022 ປະມານ 39%.
ທາງການລາວ ປະເມີນວ່າ ທ່າອຽງສິນຄ້າໃນເດືອນມີນາ 2023 ຈະບໍ່ມີການປ່ຽນແປງຫຼາຍ ເມື່ອທຽບກັບປັດຈຸບັນ ແຕ່ ລາຄາສິນຄ້າ ຈະແຕກຕ່ງກັນຫຼາຍ ເມື່ອງທຽບໃສ່ລາຄາສິນຄ້າ ໃນເດືອນມີນາ 2022.