ຂ.ບໍຣິຄຳໄຊໂຮງເລື່ອຍ ສ່ວນຫຼາຍ ປິດແລ້ວ

ບັນດາໂຮງເລື່ອຍໄມ້ ຢູ່ແຂວງບໍຣິຄຳໄຊ ເກືອບທັງຫມົດຖືກປິດ ນັບຕັ້ງແຕ່ຣັຖບານອອກຄຳສັ່ງ ຫ້າມສົ່ງໄມ້ອອກໄປຕ່າງປະເທດ ເມື່ອ ເດືອນພຶສພາ ປີ 2016 ຜ່ານມາ ເຮັດໃຫ້ເຈົ້າຂອງໂຮງເລື່ອຍໄມ້ ສ່ວນໃຫຍ່ທີ່ເປັນຄົນວຽດນາມ ໃນແຂວງນີ້ ປິດກິຈການ ແລ້ວກັບຄືນ ປະເທດຫຼາຍຄົນ ໃນຣະຍະນື່ງປີ ຜ່ານມາ. ດັ່ງຄຳເວົ້າຂອງປະຊາຊົນທ້ອງຖິ່ນ ທ່ານນຶ່ງ ຜູ້ບໍ່ປະສົງອອກຊື່ ໃນມື້ວັນທີ 13 ທັນວາ ນີ້ວ່າ:

"ວຽດນາມເປັນຜູ້ມາ ຊື້ໄມ້ຂາຍໄມ້ ປະມານນີ້ນະ ແຕ່ຕອນນີ້ຂະເຈົ້າໄປຫມົດແລ້ວ ປີກາຍກໍມີໂຮງເລື່ອຍ ມີຫລາຍທັງນ້ອຍທັງໃຫຍ່ ແຕ່ປີ ນີ້ນະ ກົດຫມາຍມັນອອກມາແຮງ ເຈົ້າຫນ້າທີ່ກໍປາບແບບຈີງຈັງຫັ້ນນະ ພວກວຽດທີ່ເຂົ້າມາເຊົ່າໂຮງງານ ຫລືວ່າມາຂາຍມາຊື້ຊີ້ນະ ຂະເຈົ້າ ກໍເຮັດບໍ່ໄດ້ແລ້ວເດ ຂະເຈົ້າກໍຫນີກັບບ້ານກັບເມືອງແລ້ວເດ້."

ກ່ຽວກັບເຣື້ອງນີ້ເຈົ້າໜ້າທີ່ ຜແນກອຸດສາຫະກັມແລະການຄ້າ ແຂວງບໍຣິຄຳໄຊເວົ້າວ່າ ພາກສ່ວນກ່ຽວຂ້ອງໄດ້ ລົງໄປກວດກາຢ່າງເຂັ້ມງວດ ແລະໃຫ້ຍຸບໂຮງງານໄມ້ ແປຮູບ ຢູ່ເມືອງປາກຊັນຫລາຍແຫ່ງ ຊື່ງໃນປັດຈຸບັນ ກໍຍັງເຫລືອແຕ່ຮ້ານຂາຍ ເຄື່ອງເຮືອນໂຕະຕັ່ງ ຫລື ເຟີນິເຈີ ເລັກນ້ອຍ ເທົ່ານັ້ນ, ດັ່ງທ່ານກ່າວວ່າ:

"ກະສິກັມລົງແລ້ວຂະເຈົ້າເຮັດຫຍັງບໍ່ໄດ້ ເພາະວ່າເພິ່ນສັ່ງໃຫ້ອັນນັ້ນຫມົດ ເພິ່ນວ່າບໍ່ໃຫ້ມີການເອົາໄມ້ອອກ ລາວ ກໍຈຳເປັນ ກໍເລີຍວ່າມີແຕ່ ໂຮງງານຊອຍແບບເຟີນີເຈີນ້ອຍໆ ເຮັດໂຕະເຮັດຕັ່ງ ປະມານນັ້ນ ໄມ້ເນື້ອອ່ອນ ໄມ້ຫຍັງປະມານນີ້ນະ  ມັນບໍ່ເປັນແບບເຮັດ ແບບເອົາໄມ້ ເອົາຫຍັງປະມານນີ້."

ທ່ານກ່າວຕື່ມວ່າປັດຈຸບັນຄົນວຽດນາມ ຜູ້ທີ່ບໍ່ກັບບ້ານນັ້ນ ບາງຄົນກໍພາກັນເປີດຮ້ານຂາຍເຄື່ອງ ເປັນຕົ້ນຮ້ານຂາຍເຄື່ອງເຮືອນ ໂຕະ,ຕັ່ງ,ຕູ້ ແລະຮ້ານແປງຣົດຈັກ ສອງ-ສາມຮ້ານ ໃນເຂດເທສບານ ແຕ່ສ່ວນໃຫຍ່ ກັບຄືນໄປວຽດນາມ.