ແນວລາວ ສເນີຣັຖບາລກວດຄືນ ການຊື້ຂາຍດິນ
2021.11.11
ກອງປະຊຸມ ສມັຍສາມັນ ເທື່ອທີ່ 2 ຂອງສະພາແຫ່ງຊາດ ຊຸດທີ່ 9 ພຶສຈິກາ 2021
ຮູບພາບຈາກ ວິດີໂອ: LNTV
ສູນກາງແນວລາວສ້າງຊາດ ສເນີໃຫ້ຣັຖບານລາວ ກວດກາກຸ່ມຄົນຕ່າງປະເທດ ຈຳນວນນຶ່ງ ທີ່ເຂົ້າມາຊື້-ຂາຍທີ່ດິນ ໃນລາວ ໂດຍໄດ້ມີການວ່າຈ້າງຄົນລາວ ເປັນຜູ້ຊື້ທີ່ດິນ ແລະອອກໃບຕາດິນ ຖາວອນໃຫ້ ຊຶ່ງຖືວ່າເປັນການລະເມີດກົດໝາຍ ແລະຍັງພາໃຫ້ເກີດການສໍ້ໂກງກັນຂຶ້ນ, ດັ່ງຍານາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ໄດ້ມີຄວາມເຫັນຕໍ່ກອງປະຊຸມ ສມັຍສາມັນ ເທື່ອທີ່ 2 ຂອງສະພາແຫ່ງຊາດ ຊຸດທີ່ 9 ໃນມື້ວັນທີ່ 8 ພຶສຈິກາ ນີ້ວ່າ:
“ຂໍໃຫ້ມີການກວດກາ ຕໍ່ສະພາບການຊື້-ຂາຍດິນແລະເຮືອນ ໃຫ້ຄົນຕ່າງປະເທດ ແຕ່ອອກຊື່ເປັນຄົນລາວ ເກີດມີການແຜ່ຫຼາຍ ເກີດມີສະພາບການສໍ້ໂກງກັນ ລະຫວ່າງຜູ້ຊື້ດິນ ແລະຜູ້ອອກຊື່ໃນໃບຕາດິນ ພາໃຫ້ເກີດຄວາມບໍ່ສງົບ ສເນີໃຫ້ມີວິທີທາງແກ້ໄຂ ຢ່າງເປັນຮູບປະທັມ.”
ນອກຈາກນີ້ ຍານາງຄຳຈັນ ພົມແສງສະຫວັນ ຍັງສເນີໃຫ້ຣັຖບານລາວ ເບິ່ງຄືນກ່ຽວກັບເຣື່ອງການຈັບຈອງທີ່ດິນປ່າ, ດິນຫວງຫ້າມ, ດິນບ້ານ ແລະດິນປຸກສ້າງເປັນຈຳນວນຫຼາຍປີ ແຕ່ບໍ່ມີການພັທນາຫຍັງ ແລະບໍ່ເສັຽພາສີອາກອນ ໃຫ້ຣັຖ ໃນຂະນະທີ່ ປະຊາຊົນລາວຈຳນວນຫຼາຍ ບໍ່ມີບ່ອນປຸກສ້າງ ທີ່ຢູ່ອາສັຍ ບໍ່ມີທີ່ດິນທຳການກະເສຕ ບໍ່ມີລາຍຮັບໝັ້ນຄົງ ພ້ອມກັນນັ້ນກໍມີທີ່ດິນຈຳນວນນຶ່ງ ຖືກຂາຍໃຫ້ກັບຄົນຕ່າງປະເທດ.
ປັດຈຸບັນ ປະເທດລາວ ຍັງບໍ່ອະນຸຍາດໃຫ້ຄົນຕ່າງປະເທດ ເຂົ້າມາຊື້-ຂາຍທີ່ດິນ ເຮືອນພັກ ແລະຄອນໂດ ຢູ່ໃນປະເທດລາວໄດ້ ຍົກເວັ້ນການຊື້ຄອນໂດມີນ້ຽມ (Condominium) ໃນເຂດເສຖພິເສດ ບຶງທາດຫຼວງ ແຕ່ແນວໃດກໍຕາມ ຣັຖບານລາວ ກໍໄດ້ອະນຸຍາດໃຫ້ ຄົນຕ່າງປະເທດສາມາດເຊົ່າທີ່ດິນ ແລະເຮືອນພັກ ແບບໄລຍະຍາວໄດ້ຢ່າງໜ້ອຍ 30 ປີ.
ກ່ຽວກັບເຣື່ອງນີ້ ເຈົ້າໜ້າທີ່ ບໍຣິສັດ ຂາຍທີ່ດິນ ແລະອະສັງຫາຣິມະຊັບ ໃນນະຄອນຫຼວງວຽງຈັນ ທີ່ບໍ່ປະສົງອອກຊື່ ແລະສຽງ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ່ 10 ພຶສຈິກາ ນີ້ວ່າ:
“ກົດໝາຍຂອງປະເທດລາວ ຍັງບໍ່ໄດ້ອະນຸຍາດໃຫ້ຕ່າງປະເທດ ຊື້-ຂາຍທີ່ດິນ ແລະເຮືອນພັກ ແຕ່ວ່າຫາກຄົນຕ່າງປະເທດ ຕ້ອງການຈະຊື້ທີ່ດິນ ຫຼືເຮືອນໃນປະເທດລາວ ກໍສາມາດຊື້-ຂາຍໄດ້ ແຕ່ຕ້ອງແຈ້ງຊື່ຄົນລາວ ທີ່ເປັນຄົນຮູ້ຈັກກັນ ແລະສນິດສນົມກັນ ເພື່ອຈ້າງວານໃຫ້ຂະເຈົ້າຊື້ໃຫ້.”
ຂະນະທີ່ ເຈົ້າໜ້າທີ່ ບໍຣິສັດຊື້-ຂາຍທີ່ດິນ ແລະອະສັງຫາຣິມະຊັບ ອີກແຫ່ງນຶ່ງ ໃນນະຄອນຫຼວງວຽງຈັນ ກໍກ່າວວ່າ ໄລຍະຫຼາຍປີມານີ້ ມີຄົນຕ່າງປະເທດຈຳນວນຫຼາຍ ໂດຍສະເພາະນັກລົງທຶນຈີນ ມັກຈະເຂົ້າມາຊື້ທີ່ດິນໃນລາວ ໂດຍມີການວ່າຈ້າງຄົນລາວ ໃຫ້ເປັນຜູ້ຊື້ທີ່ດິນ ແລະອອກຊື່ໃບຕາດິນໃຫ້ ແຕ່ຈະຕ້ອງເປັນຄົນທີ່ໄວ້ວາງໃຈໄດ້, ດັ່ງເຈົ້າໜ້າທີ່ ບໍຣິສັດ ຊື້-ຂາຍ ທີ່ດິນ ແລະອະສັງຫາຣິມະຊັບ ໃນນະຄອນຫຼວງວຽງຈັນ ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:
“ມັນກະໄດ້ຫັ້ນແຫຼະ ຄັນມີທຸຣະກິຈ ແຕ່ເຈົ້າຕ້ອງວ່າເອົາຄົນທີ່ເຈົ້າສນິດນຳຫັ້ນແຫຼະ ໄວ້ວາງໃຈແລ້ວຊື້ໃຫ້ ບໍ່ເປັນຫຍັງ ຖ້າເຈົ້າໄວ້ວາງໃຈເຂົາ ເຂົາກະບໍ່ຕົ້ມເຈົ້າດອກ.”
ນອກຈາການ ຊື້-ຂາຍ ອະສັງຫາຣິມະຊັບ ແບບຂາດໂຕແລ້ວນັ້ນ ກໍຍັງມີຮູບແບບການປ່ອຍເຊົ່າ-ສັມປະທານໄລຍະຍາວ ແຕ່ 10-20 ປີ ໂດຍບໍ່ຜ່ານທາງການລາວ ໝາຍຄວາມວ່າຄົນຕ່າງປະເທດ ຈະມາເຊົ່າທີ່ດິນ ແລະເຮືອນກັບຄົນລາວໂດຍຕົງ ເຊິ່ງເປັນການຫຼີກລ່ຽງການເສັຽພາສີ-ອາກອນໃຫ້ແກ່ຣັຖ.
ໂຕຢ່າງ ຜູ້ປະກອບການເຮືອນພັກ ໃນເມືອງວັງວຽງ ແຂວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ສຳລັບເຮືອນພັກຂອງທ່ານນັ້ນ ແມ່ນໄດ້ໃຫ້ນັກທຸຣະກິຈຊາວເກົາຫຼີໃຕ້້ເປັນຜູ້ເຊົ່າ ໂດຍຕົນເອງຈະເປັນຜູ້ເກັບຄ່າເຊົ່າ ແລະນຳໄປຈ່າຍພາສີ-ອາກອນໃຫ້ແກ່ຣັຖ, ດັ່ງທ່ານກ່າວວ່າ:
“ແຕ່ວ່າບ້ານພັກເຮົາຫັ້ນ ດຽວນີ້ເຮົາໃຫ້ເກົາຫຼີເປັນຜູ້ສັມປະທານ ເປັນຜູ້ເຊົ່າແລ້ວ ເພາະບ້ານພັກຂະເຈົ້າຈະສ້າງຂຶ້ນຫຼາຍ ເຮົາມັນບໍ່ໄດ້ທາງຢູ່ ທາງແຄມນ້ຳ ແຄມຫຍັງແດ່.”
ໃນຂະນະດຽວກັນ ຊາວລາວຜູ້ນຶ່ງ ໃນເມືອງສິງ ແຂວງຫຼວງນ້ຳທາ ກໍກ່າວວ່າ ບໍ່ຄ່ອຍເຫັນຄົນຕ່າງປະເທດ ມາຊື້ທີ່ດິນແລະເຮືອນຢູ່ພາຍໃນແຂວງເທື່ອ ເຫັນແຕ່ມາຂໍເຊົ່າ-ສັມປະທານທີ່ດິນ ແບບໄລຍະຍາວນຳຊາວບ້ານ ເພື່ອທຳການກະເສດ ແລະປູກພືດເສຖກິຈ, ດັ່ງຊາວບ້ານຜູ້ນຶ່ງ ໃນເມືອງສິງ ແຂວງຫຼວງນ້ຳທາ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:
“ປັດຈຸບັນນີ້ນິ່ ເຂົາເຈົ້າມາເຊົ່າ ແບບວ່າຄົນຈີນມາສັມປະທານ ເຮັດພວກກະສິກັມເນາະ ຈະເປັນປູກອ້ອຍ ປູກພວກໝາກແຕງໂມບໍ ກ້ວຍບໍ ອີ່ຫຍັງຕ່າງໆ.”
ກ່ຽວກັບເຣື່ອງນີ້ ເຈົ້າໜ້າທີ່ຜແນກຊັພຍາກອນທັມມະຊາດ ແລະສິ່ງແວດລ້ອມ ແຂວງຫຼວງພຣະບາງ ທ່ານນຶ່ງ ກໍເຫັນວ່າ ສະເພາະໃນນະຄອນຫຼວງພຣະບາງ ກໍມີກຸ່ມຄົນຈີນ ແລະຄົນວຽດນາມ ເຂົ້າມາຊື້ກິຈການນຳຄົນລາວເປັນຈຳນວນຫຼາຍ ໂດຍເປັນການລັກເຮັດ ບໍ່ໄດ້ໃຫ້ທາງການລາວຮັບຮູ້ ໂດຍສ່ວນຫຼາຍຈະເປັນນັກລົງທຶນ ທີ່ເຂົ້າມາເຮັດທຸຣະກິຈໃນລາວ ປະມານ 3-5 ປີ ຫຼັງຈາກນັ້ນ ພໍສນິດສນົມກັບຄົນລາວແລ້ວ ເມື່ອມີໂອກາດກໍພາກັນຮ່ວມມືກັນ, ດັ່ງເຈົ້າໜ້າທີ່ ທ່ານນີ້ ກ່າວວ່າ:
“ແຕ່ຜ່ານມາຫັ້ນຍ້ອນວ່າ ນັກລົງທຶນຫັ້ນມັນໄປເຂົ້າກັບເຈົ້າຂອງ ຂະເຈົ້າຈະເຮັດບ້ານນີ້ມາກ່ອນແລ້ວ ແລະໂດຍທີ່ບໍ່ໃຫ້ຣັຖເຮົາຮູ້ຈັກນຳຫັ້ນນ່າ ແລ້ວດຽວນີ້ ມັນຄົນວຽດ ຄົນຈີນເນາະ ມາ Take over ມາໃຊ້ຊື່ຄົນລາວ ດຽວນີ້ພວກເຮົາກະກວດຄືນໝົດ.”
ເຖິງແນວໃດກໍຕາມ ເມື່ອປີ 2019 ທີ່ຜ່ານມາ ກົມນະໂຍບາຍການຄ້າຕ່າງປະເທດ ກະຊວງອຸດສາຫະກັມ ແລະການຄ້າ ໄດ້ຣາຍງານວ່າ ຣັຖບານລາວ ກຳລັງທົບທວນຄືນກ່ຽວກັບກົດໝາຍວ່າດ້ວຍທີ່ດິນ ທີ່ຈະໃຫ້ຄົນຕ່າງປະເທດ ເປັນເຈົ້າຂອງກັມມະສິດອະສັງຫາຣິມະຊັບຢູ່ປະເທດລາວ ແລະສາມາດຊື້-ຂາຍໄດ້ທຸກພື້ນທີ່ ບໍ່ຈຳກັດສະເພາະໃນເຂດເສຖກິຈພິເສດບຶງທາດຫຼວງ ທັງນີ້ ກໍເພື່ອເປັນການດຶງດູດໃຫ້ນັກລົງທຶນຕ່າງປະເທດ ເຂົ້າມາລົງທຶນໃນດ້ານອະສັງຫາຣິມະຊັບຢູ່ລາວເພີ່ມຂຶ້ນ.