ຣັຖບານລາວທົບທວນສັນຍາ ຕລາດ ຫຼັກຊັພ

ການ ທົບທວນ ສັນຍາ ຣະຫວ່າງ ຣັຖບານ ລາວ ກັບ ບໍຣິສັດ ຕລາດ ຫລັກຊັບ ໄດ້ມີຂຶ້ນ ໃນເດືອນ ຕຸລາ ທີ່ຜ່ານ ແລະ ໄດ້ມີ ການ ເຊັນຄືນ ໃໝ່ ເກືອບ ທຸກ ສະບັບ. ອີງຕາມ ແຫລ່ງຂ່າວ ຈາກ ນະຄອນ ຫລວງ ວຽງຈັນ.

ແຫລ່ງຂ່າວ ຜູ້ທີ່ ບໍ່ ປະສົງ ອອກຊື່ ໄດ້ກ່າວ ຕໍ່ ນັກຂ່າວ ເອເຊັຽເສຣີ ວ່າ ທຸກໆ ເອກກະສານ ແມ່ນປ່ຽນ ໃຫ້ ທ່ານ ບຸນປອນ ບຸດຕະນະວົງ ຮອງ ນາຍົກ ຣັຖມົນຕຣີ ເປັນຜູ້ ຮັບ ຜິດຊອບ ວຽກງານ ເສຖກິຈ ເປັນຜູ້ ເຊັນຄືນ ໃໝ່ ເກືອບ ທັງໝົດ. ໃນ ເບື້ອງຕົ້ນ ເອກກະສານ ທີ່ເປັນ ສັນຍາ ກັບ ຕລາດ ຫລັກຊັບ ນັ້ນແມ່ນ  ທ່ານ ສົມສະຫວາດ ເລັ່ງສະຫວັດ ຮອງ ນາຍົກ ຣັຖມົນຕຣີ ເປັນ ຜູ້ເຊັນ.

ແຫລ່ງຂ່າວ ຍັງແຈ້ງ ອີກວ່າ ການທົບທວນ ນັ້ນ ແມ່ນເພື່ອ ໃຫ້ ສອດຄ່ອງ ກັບ ສະພາບການ ຄວາມ ເປັນຈິງ ໄດ້ມີການ ດັດແກ້ ສັນຍາ ຄືນ ບາງມາຕຣາ ເພື່ອໃຫ້ ແທດເໝາະ ກັບ ຄວາມ ເປັນຈິງ. ບາງ ມາດຕຣາ ມັນອາດ ຈະປິດ ສຳລັບ ນັກ ລົງທຶນ ໂພດ ແຕ່ບາງ ມາດຕຣາ ມັນກໍເປີດ ໃຫ້ ນັກລົງທຶນ ຫລາຍໂພດ. ຕລາດ ຫລັກຊັບ ຢູ່ໃນ ປະເທດ ລາວ ເປີດໃຊ້ ບໍຣິການ ໃນປີ 2011 ເປັນ ຕົ້ນມາ ໂດຍ ແມ່ນ ບໍຣິສັດ ຈາກ ປະເທດ ເກົາຫລີໃຕ້ ເປັນ ຜູ້ລົງທຶນ.