ຜູ້ບໍລິຫານ ສະຖາບັນການເງິນຈຸລະພາກ 2 ຄົນ ຖືກຕັດສິນຈໍາຄຸກ ຖານສໍ້ໂກງ

ສານແຂວງອຸດົມໄຊ ຕັດສິນຈໍາຄຸກນາງ ພອນວິໄລ ອະດີດຫົວໜ້າ ໜ່ວຍບໍລິການສະຖາບັນການເງິນຈຸລະພາກ ທີ່ບໍ່ຮັບຝາກເງິນ ໄຊນິຍົມ ຢູ່ເມືອງສິງ ແຂວງຫຼວງນໍ້າທາ ຕະຫຼອດຊີວິດ ແລະທ້າວ ຂັນທະລີ ອະດີດອໍານວຍການສະຖາບັນການເງິນຈຸລະພາກ ທີ່ບໍ່ຮັບຝາກເງິນ ໄຊນິຍົມ ແຂວງອຸດົມໄຊ 8 ປີເຄິ່ງ ຖານໄດ້ຮ່ວມມືກັນສໍ້ໂກງເງິນສະຖາບັນການເງິນ ແລະເງິນປະຊາຊົນຫຼາຍ ກວ່າ 10 ຕື້ກີບ ໃນມື້ວັນທີ 13 ມິຖຸນາທີ່ຜ່ານມາ.

ກ່ຽວກັບເລື່ອງທີ່ວ່ານີ້ ວິທຍຸເອເຊັຽເສຣີ ໄດ້ພະຍາຍາມຕິດຕໍ່ໄປຍັງ ສະຖາບັນການເງິນຈຸລະພາກ ທີ່ບໍ່ຮັບຝາກເງິນ ໄຊນິຍົມ ແຂວງອຸດົມໄຊ ແຕ່ບໍ່ສາມາດຕິດຕໍ່ໄດ້.

ແຕ່ເຖິງຢ່າງໃດກໍຕາມ ອະດີດພະນັກງານສະຖາບັນການເງິນດັ່ງກ່າວ ຢູ່ເມືອງໄຊ ແຂວງອຸດົມໄຊ ກໍໄດ້ເວົ້າຕໍ່ວິທຍຸເອເຊັຍເສຣີ ໃນມື້ວັນທີ 16 ກໍລະ ກົດນີ້ວ່າ ການສໍ້ໂກງຂອງ ສອງຄົນທີ່ວ່ານັ້ນ ມີມາແຕ່ດົນແລ້ວ ກ່ອນຈະຖືກກວດສອບ ແລະຖືກຈັບໃນປີ 2020.

“ມັນກໍເລື້ອງຕັ້ງແຕ່ 2020 ພຸ້ນນ່າ 2020-2021 ພຸ້ນນ່າເລີ້ມສໍ້ກົງແຕ່ດົນແລ້ວ ແຕ່ວ່າເລີ້ມກັກຕົວຫັ້ນລະແມ່ນ 2020-2021 ຫັ້ນແຫລະ ແມ່ນແຫລະຫາກໍ່ມາຕັດສິນປີນີ້ຫັ້ນແຫລະ.”

ອີງຕາມສໍານວນຄະດີ ຂອງນາງ ພອນວິໄລ, ນາງໄດ້ເລີ່ມຕິດການພະນັນຫຼາຍຢ່າງ, ນາງໄດ້ຍັກຍອກ ສໍ້ໂກງ ເອົາເງິນຂອງສະຖາບັນການເງິນ ແລະຂອງປະຊາຊົນ ໂດຍໄດ້ເຮັດເອກະສານປອມ ດ້ວຍເອົາລາຍຊື່ ແລະປະຫວັດ ຂອງ ລູູກຄ້າເງິນກູ້ເກົ່າ ມາປະກອບເປັນເອກະສານ ຂອງລູກຄ້າໃໝ່ ແລ້ວສົ່ງໃຫ້ສໍານັກງານໃຫຍ່ ອະນຸມັດເງິນໃຫ້ ຈໍານວນ 128 ບັນຊີ ເປັນເງິນທັງໝົດ 4,072,614,​028 ກີບ. ໃນຈໍານວນ 128 ບັນຊີນັ້ນ ເປັນບັນຊີຂອງລູກຄ້າ ຢູ່ໜ່ວຍບໍລິການເມືອງສິງ 101 ບັນຊີ.

ແລະທ້າວ ຂັນທະລີ ເປັນຜູ້ເຊັນໃບຢັ້ງຢືນເງິນ 2 ບັນຊີ ຈໍານວນເງິນ 1,000,000,000 ກີບ ແລະໄດ້ແນະນໍາໃຫ້ນາງ ພອນວິໄລ ໂອນເງິນເຂົ້າບັນຊີຂອງ ທ້າວ ພູລົມ ຈໍານວນ 500.000.000 ກີບ, ຜູ້ກ່ຽວເອົາເງິນໄປໃຊ້ສ່ວນຕົວ 500,000,000 ກີບ.

ປະຊາຊົນຢູ່ເມືອງສິງ ແຂວງຫຼວງນໍ້າທາ ຜູ້ນຶ່ງເວົ້າວ່າ ໜ່ວຍບໍລິການຂອງສະຖາບັນການເງິນດັ່ງກ່າວ ທີ່ຕັ້ງຢູ່ເມືອງສິງ ໄດ້ປິດໄປແລ້ວ ຍ້ອນເກີດກໍລະນີສໍ້ໂກງ ແລະຜູ້ເສຍຫາຍ ຊຶ່ງສ່ວນຫຼາຍແມ່ນປະຊາຊົນເມືອງສິງນັ້ນ ໄດ້ຮັບເງິນທົດແທນຄືນແລ້ວ.

“ກ່ອນໂຄວິດພຸ້ນນີ້ ກ່ອນໂຄວິດ ຫລາຍຕື້ຢູ່ ບໍ່ມີໆ ສ່ວນຫລາຍຢູ່ເມືອງສິງນີ້ແຫລະ ຄືນແລ້ວເຂົາທົດແທນຄືນແລ້ວ ແມ່ນແລ້ວໆ ໄດ້ຄືນແລ້ວ ບ້ານເຮົາກໍມີແຕ່ວ່າເຂົາໄດ້ແລ້ວ ໄດ້ຄົບ.”

ກ່ຽວກັບເລື່ອງດັ່ງກ່າວ ປະຊາຊົນບ້ານໜອງແມງດາ ເມືອງໄຊ ແຂວງອຸດົມໄຊ ເວົ້າວ່າ ຕົນກໍໄດ້ຍິນຂ່າວການຕັດສິນທີ່ວ່ານັ້ນຢູ່ ແຕ່ບໍ່ຮູ້ລາຍລະອຽດ. ສ່ວນວ່າ ສະຖາບັນການເງິນດັ່ງກ່າວ ຢູ່ເມືອງນີ້ ຍັງເປີດໃຫ້ບໍລິການຢູ່.

“ໄດ້ຍິນຢູ່ໆ ເຈົ້າເປີດແນ່ ຄືວ່າເປີດຢູ່ ແຕ່ວ່າບໍ່ແນ່ໃຈຄືກັນ ເພາະເຮົາບໍ່ໄດ້ໃຊ້ຫັ້ນນ່າ ມັນກໍມີຫລາຍທະ ນາຄານ ສະຖາບັນການເງິນນ້ອຍໆ ກໍມີ 2-3 ນີ້ແຫລະ ປະມານ 2 ຫາ 3.”

ການທີ່ສານ ຕັດສິນຈໍາຄຸກນາງ ພອນວິໄລ ຕະຫຼອດຊີວິດ ນັ້ນ ອີງຕາມຄໍາເວົ້າຂອງທະນາຍຄວາມຜູ້ນຶ່ງ ແລ້ວແມ່ນຄາດວ່າ ນາງອາດຈະກະທໍາຜິດຫຼາຍຢ່າງ ແລະເຮັດໃຫ້ມີຄວາມເສຍຫາຍຢ່າງຫຼວງຫຼາຍ ແລະເຮັດຈົນເປັນອາຈິນ ຍ້ອນວ່າ ກົດໝາຍ ມາດຕາ 233 ກໍານົດໂທດ ພຽງແຕ່ 3 ປີຫາ 8 ປີ.

“ຢູ່ໃນກົດໝາຍລາວ ມາດຕາ 233 ການສໍ້ກົງມັນໂທດຊິບໍ່ສູງປານນັ້ນ ໂທດສູງສຸດກໍແມ່ນ 3 ຫາ 8 ປີຫັ້ນນ່າໂທດທາງດ້ານກົດໝາຍ ຫລືວ່າເພິ່ນຊິໃສ່ຂໍ້ຫາຢ່າງອື່ນບໍ່ ຢ້ານມີຫລາຍຂໍ້ຫາຢູ່ໃນຫັ້ນ ຢ້ານມີຄະດີແບບລັກສະນະຍັກຍອກ ຊັບຂອງບໍລິສັດອິຫຍັງບໍ່ ຢ້ານກະທໍາຜິດຫລາຍມາດຕາຢູ່ໃນນັ້ນຫັ້ນ.”

ແມ່ນແຕ່ ມາດຕາ 236 ຂອງປະມວນກົດໝາຍອາຍາ ກໍານົດໄວ້ບົດລົງໂທດສູງສຸດພຽງແຕ່ເຖິງ 10 ປີ ໃນກໍລະນີ ກໍ່ຄວາມເສຍຫາຍຢ່າງຫຼວງຫຼາຍ, ເປັນອັນຕະລາຍຕໍ່ຊີວິດ ແລະສຸຂະພາບ.

ທີ່​ຜ່ານ​ມາ ກໍ​ມີຄະ​ດີ​ສໍ້ໂກງ​​ໃຫຍ່ ທີ່​ເປັນ​ຂ່າວ​ໂດ່ງ​ດັງ ກໍມີຫຼາຍຄະດີ ເຊັ່ນ ຄະດີ​ສໍ້​ໂກງ ປີ 2021 ທີ່ມີ​ການ​​ລະ​ດົມ​ທຶນ​ຮັບ​ຝາກ ຜ່ານ​ແອັບ SHBC ສ້າງ​ຄວາມ​ເສຽ​ຫາຍຫຼາຍກວ່າ 2 ຕື້ກີບ.

ປີ 2020 ແອັບ Gingo ລົງ​ທະ​ບຽນ​ຮັບ​ເປີ​ເຊັນ ຖ້າ​ແນະ​ນຳ​ລູກ​ຄ້າໃຫ້ ສ້າງ​ຄວາມ​ເສຍ​ຫາຍ ຫຼາຍກວ່າ 500 ລ້ານກີບ.

ປີ 2017 ບໍ​ລິສັດ ພີ​ເອ​ສ ລະ​ດົມ​ຮັບ​ຝາກ​ເງິນ ໂດຍໃຫ້​ດອກ​ເບັ້ຍ 6% ຕໍ່​ເດືອນ ເຮັດໃຫ້​ເສຍ​ຫາຍ 900 ຕື້​ກີບ. ແລະໃນ​ປີດຽວກັນນີ້ ບໍ​ລິ​ສັດ ASEAN Face ຮັບ​ຝາກ​ເງິນ ໂດຍໃຫ້​ດອກ​ເບ້ຍ 30% ຕໍ່​ເດືອນ ເຮັດໃຫ້​ເສຍ​ຫາຍ 16 ລ້ານໂດ​ລ້າສະຫະລັດ.

ໃນ​ປີ 2015 ບໍ​ລິ​ສັດ ແມ້ກີ້ ຮັບ​ຝາກ​ເງິນ ໂດຍ​ໃຫ້​ດອກ​ເບັ້ຍ 6% ຕໍ່​ເດືອນ ສ້າງ​ຄ​ວາມ​ເສຍຫາຍ 16 ລ້ານໂດ​ລ້າສະຫະລັດ.