ວັນຢຸດເຂື່ອນໂລກ 14 ມີນາ

ໃນວັນຢຸດ ເຂື່ອນ ໂລກ 14 ມີນາ, ຊາວໄທ 8 ແຂວງ ລຸ່ມນໍ້າຂອງ ທ້ອນໂຮມ ເປີດການ ເສວະນາ ຣະດົມ ຕໍ່ຕ້ານ ການສ້າງເຂື່ອນ ໄຊຍະບຸຣີ, ໃນຫລາຍ ແຂວງ ຢູ່ໄທ.

ທ່ານ ອິດທິພົນ ຄໍາສຸຂ ຜູ້ຕາງໜ້າ ເຄືອຂ່າຍ ປະຊາຊົນ 8 ແຂວງ ລຸ່ມ ແມ່ນໍ້າຂອງ ເປິດເຜີຍວ່າ ກຸ່ມຊາວໄທ ທີ່ ບໍ່ເຫັນພ້ອມ ນໍາການສ້າງ ເຂື່ືອນ ໄຊຍະບຸຣີ ໄດ້ພ້ອມໃຈກັນ ຣະດົມ ຈັດກິຈກັມ ໃນຫລາຍແຂວງ ຂອງໄທ ໃນມື້ນີ້ ວັນທີ 14 ມິນາ ໂດຍຈະມີການ ຈັດເວທີ ອະພິປາຍ ບັນຫາ ທີ່ ບາງກອກ, ແຂວງອຸບົນ, ແລະ ແຂວງເລີຍ ຈະມີ ນັກ ວິຊາການ ແລະ ຊາວບ້ານ ແຄມຂອງ ເຂົ້າຮ່ວມ:

“ ທ່ານວ່າ ວັນຢຸດ ເຂື່ອນໂລກ ທີ່ ຈຸລາລົງກອນ ມະຫາວິທຍາລັຍ ໃນ ບາງກອກ) ຈະມີເວທີ ເສວະນາ ອາພິປາຍ ເຣື້ອງ ເຂື່ອນ ໄຊຍະບຸຣີ ມີທີ່ ຊຽງຄານ ກໍມີກິຈກັມ ແລ້ວ ກໍອາດຈະມີ ເວທີ ອະພິປາຍ".

ທ່ານ ອິດທິພົນ ເວົ້າຕື່ມວ່າ ທີ່ ມະຫາວິທຍາລັຍ ຈຸລາລົງກອນ ໃນບາງກອກ ມີການ ອ່ານ ຖແລງການ ຂອງຜູ້ ບໍ່ເຫັນພ້ອມ ກັບການສ້າງ ເຂື່ອນ ໄຊຍະບຸຣີ ໃນກໍຣະນີ ຣັຖບານລາວ ຣະເມິດ ມະຕິ MRC ມຸ້ງໜ້າ ກໍ່ສ້າງ ເຂື່ອນແຫ່ງນີ້. ຂນະດຽວກັນ ຈະມີການ ປະຊຸມ ເຖິງເຣື້ອງ ການຍື່ນຟ້ອງ ຕໍ່ສານ ປົກຄອງ ຂອງໄທ ໃຫ້ ຣັຖບານໄທ ຍົກເລີກ ການຊື້ ໄຟຟ້າ ຈາກເຂື່ອນ ໄຊຍະບຸຣີ ອີກເທື່ອນຶ່ງ, ໂດຍຈະມີ ນັກວິຊາການ ແລະ ສະມາຊິກ ຣັຖສພາໄທ ຮ່ວມ ສົນທະນາ.
ໃນເວລາ ດຽວກັນ ຢູ່ແຂວງ ອຸບົນຣາຊທານີ ແລະ ແຂວງເລີຍ ພາກອິສານ ກໍມີ ກິຈກັມ ເບີດເວທີ ອະພິປາຍ ຄວາມຮູ້ ແລກປ່ຽນ ຄວາມຄິດ ຄວາມເຫັນ ຂອງຊາວບ້ານ ແລະ ນັກວິຊາການ ເຖີງຜົນ ກະທົບ ຂອງເຂື່ອນ ໄຊຍະບຸຣີ ທີ່ຈະມີ ຕໍ່ ປະຊາຊົນ ລຸ່ມ ແມ່ນໍ້າຂອງ ໂດຍຍົກເອົາ ບັນຫາ ເຂື່ອນຂອງຈີນ ມາເປັນ ຕົວຢ່າງ.

ທ່ານ ອິດທິພົນ ເວົ້າວ່າ ເຄືອຂ່າຍ ຈະເດີນໜ້າ ຄັດຄ້ານ ເຂື່ອນ ໄຊຍະບຸຣີ ຕໍ່ໄປເລື່ອຍໆ ເຖີງແມ່ນວ່າ ການຍື່ນຫນັງສື ເຖີງ ນາຍຍົກ ຣັຖມົນຕຣີໄທ, ຣັຖບານໄທ, ຣັຖບານລາວ ຈະບໍ່ສົນໃຈ ໃຫ້ຄວາມ ສຳຄັນ ຫຼື ດໍາເນີນ ການກວດສອບ ຈາກ ຜູ້ມີ ອໍານາດ ກໍຕາມ.