ເຂື່ອນດອນສະໂຮງຈະເລີ້ມສ້າງ ທ້າຍປີ 2014

ທ່ານ ວິຣະພົນ ວິຣະວົງ ຣັຖມົນຕຣີຊ່ວຍວ່າການ ກະຊວງພະລັງງານແລະບໍ່ແຮ່ ຂອງລາວ ກ່າວຕໍ່ນັກຂ່າວໃນເວລາໄປຢ້ຽມຢາມ ສະຖານທີ່ ບ່ອນສ້າງເຂື່ອນດອນສະໂຮງ ໃນມື້ວັນທີ່ 10 ເດືອນ ພຶສຈິກາ 2013 ນີ້ວ່າ:

ທ່ານເວົ້າວ່າ:“ພວກເຮົາຫວັງວ່າ ຈະເຊັນສັນຍາ ໃຫ້ແລ້ວໝົດທຸກສະບັບພາຍໃນຕົ້ນປີໜ້າ ເຊັ່ນສັນຍາຊື້ຂາຍໄຟຟ້າ ຂໍ້ຕົກລົງກ່ຽວກັບການໃຫ້ ສັມປະທານ ແລະຂໍ້ຕົກລົງກ່ຽວກັບການເງິນ. ຫລັງຈາກນັ້ນ ຈະເຊັນສັນຍາ ສະບັບທີ່ສຳຄັນໃນກາງປີໜ້າ ໃນຣະຫວ່າງເດືອນມິຖຸນາແລ້ວຈະ ເລິ້ມສ້າງເຂື່ອນ ໃນທ້າຍ ປີ 2014 ຫລືຕົ້ນປີ 2015.”

ຕໍ່ຄຳຖາມທີ່ວ່າ ເຂື່ອນດອນສະໂຮງຈະສົ່ງຜົນກະທົບແນວໃດບໍ່? ທ່ານວິຣະພົນ ວິຣະວົງ ກ່າວຕອບວ່າ“ເປັນໄປບໍ່ໄດ້ການພັທນາຈະບໍ່ສົ່ງຜົນ ກະທົບ ແຕ່ທາງການລາວຈະຊົດເຊີຍໃຫ້ແກ່ຜູ້ທີ່ໄດ້ຮັບ ເຄາະຮ້າຍຕາມ ມາຕຖານສາກົນທຸກຢ່າງ. ເຊັ່ນບັນຫາຊາວບ້ານຈະຫາປາບໍ່ໄດ້ຫຼາຍ ຄືເກົ່ານັ້ນ ທາງການລາວຈະສົ່ງເສີມໃຫ້ພວກເຂົາ ມີອາຊີບທົດແທນພາຍຫລັງ.”

ແຕ່ອົງການຮັກສາສິ່ງແວດລ້ອມສາກົນ ຕ້ອງຕິໂຄງການສ້າງເຂື່ອນດອນສະໂຮງນີ້ວ່າ ຈະເປັນເຂື່ອນຕັນທາງຂື້ນລົງຂອງປາ ທຳຣາຍສິ່ງແວດ ລ້ອມ ແລະ ທັມມະຊາດ ຂອງລຳແມ່ນ້ຳຂອງ. ອົງການແມ່ນໍ້າສາກົນ ຖແລງວ່າຣັຖບານລາວ ລະເມີດກົດຣະບຽບ ຂອງຄະນະກັມມາທິການ ແມ່ນ້ຳຂອງ ແລະຍັງບໍ່ທັນສຶກສາ ສຳຣວດເຖິງຜົນກະທົບຢ່າງຄັກແນ່ເທື່ອ.