ຊາວບ້ານຫ້ວຍຫິບຍັງລໍາບາກ

ຊາວບ້ານຫ້ວຍຫິບ ເມືອງນານ ແຂວງຫລວງພຣະບາງ ຊຶ່ງເປັນບ້ານຈັດສັນ ຂອງໂຄງການກໍ່ສ້າງເຂື່ອນໄຟຟ້າໄຊຍະບູຣີ ເປີດເຜີຍວ່າ ປັດຈຸ ບັນ ທາງໂຄງການໄດ້ຍ້າຍທຸກບ້ານ ຊຶ່ງມີປະຊາຊົນຢູ່ປະມານ 4,000 ຄົນ ນັ້ນອອກຈາກເຂດທີ່ ໂຄງການກວມເອົານັ້ນໝົດແລ້ວ ແຕ່ມີບັນ ຫາຢູ່ວ່າ ທີ່ດິນທໍາກິນ ຂອງຊາວບ້ານບໍ່ພຽງພໍ ດັ່ງນັ້ນ ຈຶ່ງຕ້ອງການຄ່າຊົດເຊີຍ ຈາກທາງໂຄງການຕື່ມອີກ:

"ຢູ່ຫ້ວຍຫິບນີ້ໄປ ໂຍກຍ້າຍ ບ້ານປາກເນີນແລ້ວ ກໍໄປໂຍກຍ້າຍ ບ້ານໂຄກໃຫຍ່ ແລ້ວກໍຫ້ວຍເດື່ອ ໝົດແລ້ວ ມັນຫຍຸ້ງຍາກກ່ຽວກັບມັນບໍ່ມີ ດິນພຽງນະ ແບບເປັນດິນພູຊັນ ແລ້ວບັດນີ້ ມີແຕ່ເຮົາເຮັດສວນ ເຮັດໄຮ່ທັມດາ ຈະໃຫ້ພໍມັນກໍບໍ່ພໍ ແຫລະຖ້າຈະຄິດສະເພາະ ແຕ່ວ່າເຂົ້າ ຊັ້ນນະ".

ທ່ານເວົ້າຕື່ມອີກວ່າ ບ້ານຫ້ວຍເດື່ອ ແລະບ້ານໂຄກໃຫຍ່ ທີ່ຍ້າຍມາຢູ່ໃໝ່ນີ້ ຈະໄດ້ຮັບຄ່າຊົດເຊີຍ ຈາກທາງໂຄງການ 1 ປີ. ໃຫ້ເຂົ້າສານຜູ້ ໃຫຍ່ 20 ກິໂລ ແລະເດັກນ້ອຍ 15 ກິໂລຕໍ່ເດືອນ. ມີການສົ່ງເສີມເຮັດສວນຄົວ, ລ້ຽງປາ ແລະໝູ. ແຕ່ຊາວບ້ານ ຕ້ອງການຢືມເງິນ ທະນາ ຄານ ເພື່ອລົງທຶນລ້ຽງສັດ ແລະຢາກໃຫ້ທາງໂຄງການຈັດສັນດິນປູກຝັງໃຫ້ ເພື່ອຈະຜລິດພໍກຸ້ມຄອບຄົວ ຂະນະທີ່ ການຊົດເຊີຍໃຫ້ຊາວບ້ານ ນັ້ນບໍ່ກຸ້ມກິນ.

ບ້ານຫ້ວຍຫິບປະກອບດ້ວຍ 4 ບ້ານຄື: ບ້ານຫ້ວຍຫິບ ຊຶ່ງເປັນບ້ານເດີມ ແລະບ້ານປາກເນີນ, ບ້ານໂຄກໃຫຍ່ ແລະບ້ານຫ້ວຍເດື່ອ ທີ່ຍ້າຍ ມາຢູ່ແລ້ວໃນເດືອນ ສິງຫາ 2013. ທາງໂຄງການປະເມີນວ່າ ຊາວບ້ານຈະສາມາດ ຕັ້ງຕົວໄດ້ ພາຍໃນອີກ 5 ປີ.

ເຖິງຢ່າງໃດກໍຕາມ ຊາວບ້ານກໍເວົ້າວ່າ ນອກຈາກບັນຫາຄ່າຊົດເຊີຍ ນັ້ນແລ້ວ ຊາວບ້ານຍັງຢາກໃຫ້ ທາງໂຄງການ ຮີບຈ່າຍເງິນຄ່າຊົດເຊີຍ ໄມ້ ແລະຜົລຜລິດ ໃນບ້ານເກົ່ານໍາດ້ວຍ ຍ້ອນວ່າ ຫລາຍຄົນຍັງບໍ່ທັນໄດ້ຮັບ.