ແຜນພັທນາເສຖກິດສາມຫຼ່ຽມ

ນາຍົກ ຣັຖມົນຕຣີ ລາວ ທ່ານ ທອງສີງ ທັມມະວົງ ນາຍົກ ຣັຖມົນຕຣີ ກຳພູຊາ ທ່ານ ຮຸນເຊນ ແລະ ນາຍົກ ຣັຖມົນຕຣີ ວຽດນາມ ທ່ານ ຫງຽນ ຕັນ ເຢີນ ໄດ້ ສັນຍາ ກັນ ໃນ ມື້ສຸດທ້າຍ ຂອງ ກອງປະຊຸມ ຄັ້ງທີ 8 ຂອງ ໂຄງການ ພັທນາ ເສຖກິດ ສາມຫລ່ຽມ ທີ່ ນະຄອນ ຫລວງ ວຽງຈັນ ວ່າ ຈະໃຫ້ ຄວາມຮ່ວມມື ກັນຢ່າງ ໃກ້ຊິດ ໃນການ ຈັດ ຕັ້ງ ປະຕິບັດ ແຜນການ ພັທນາ ເສຖກິດ ສາມຫລ່ຽມ ຢ່າງ ຈີງຈັງ.

ທ່ານ ນາຍົກ ທັງສາມ ໄດ້ຕົກລົງ ກັນວ່າ ຈະສືບຕໍ່ ການ ບັງຄັບໃຊ້ ສົນທິ ສັນຍາ ສອງຝ່າຍ ແລະ ຫລາຍຝ່າຍ ທີ່ ມີຢູ່ໃນ ປັດຈຸບັນ ໃນແຜນການ ດັ່ງກ່າວ ເພື່ອ ສ້າງຄວາມ ສະດວກ ໃນການ ຂົນສົ່ງ ສີນຄ້າ ແລະ ການໄປມາ ຄ້າຂາຍ ຂອງ ປະຊາຊົນ ໃນສາມ ປະເທດ ສປປລາວ ກຳພູຊາ ແລະ ວຽດນາມ ໃຫ້ ດີຂ໊ື້ນ.

ນອກຈາກ ນັ້ນ ບັນດາ ຜູ້ນຳຈາກ ສາມ ປະເທດ ຍັງໄດ້ ລົງນາມ ໃນ ຖແລງການ ຮ່ວມ ເພື່ອສ້າງ ຕັ້ງແຜນ ປະຕິບັດ ງານ ໃນຂອບ ຄວາມຮ່ວມມື ໃນສົກ ປີ 2015-16 ໂດຍ ສະເພາະ ໃນ ບັນຫາ ການປາບປາມ ແລະ ສະກັດກັ້ນ ການແຜ່ລາມ ຂອງ ໂຣຄ ຕິດຕໍ່ ແລະ ການຕ້ານ ອາຊຍາກັມ ຂ້າມຊາດ. ໃນນັ້ນ ມີທັງ ການຄ້າ ມະນຸດ ແລະ ການຄ້າ ຢາເສບຕິດ ຕາມແນວ ຊາຍແດນ.

ໃນຂນະ ດຽວກັນ ວຽດນາມ ກໍມີແຜນ ການ ຈະລົງທືນ ໃນ ກຳພູຊາ ໃຫ້ໄດ້ 5 ຕື້ ໂດລາ ແລະ ໃນ ລາວ 2 ຕື້ ໂດລາ ໃນ ປີຫນ້າ. ໂຄງການ ເສຖກິດ ສາມຫລ່ຽມ ກວມເອົາ 13 ແຂວງ ຂອງ ສາມ ປະເທດ ທີ່ ສປປລາວ ມີ ແຂວງ ສາຣະວັນ ອັດຕະປື ເຊກອງ ແລະ ຈຳປາສັກ.