ບໍ່ແກ້ວ ສົ່ງໂຕຜູ້ຮ້າຍ ຂ້າມແດນ ໃຫ້ທາງການຈີນ
2021.11.16
ບັນຍາກາດ ກາສິໂນ ຄິງສ໌ໂຣມັນສ໌, ວັນທີ່ 26 ຕຸລາ 2021
ນັກຂ່າວ ພົລເມືອງ
ຜແນກຕໍາຣວດ ສືບສວນ-ສອບສວນ ຫ້ອງການຕຳຣວດ ກອງບັນຊາການ ປກສ ແຂວງບໍ່ແກ້ວ ໄດ້ສົ່ງໂຕຜູ້ຮ້າຍຂ້າມແດນຊາວຈີນ ຊື່ທ້າວ ເມີງ ຊິງຮົວ ອາຍຸ 20 ປີ ຜູ້ຕ້ອງຫາໃນຄະດີ ເຂົ້າຮ່ວມຂບວນການ 11 ຄົນ ທຳຮ້າຍຮ່າງກາຍຜູ້ອື່ນ ຢ່າງຮຸນແຮງຊ້ຳແລ້ວຊ້ຳອີກ ຢູ່ເຂດເມືອງຊິນຫົວ ແຂວງຫົວໜານ ປະເທດຈີນ ແຕ່ປີ 2016 ໃຫ້ທາງຈີນ ເມື່ອວັນທີ່ 12 ພຶສຈິກາ 2021 ທີ່ຜ່ານມາ.
ພາຍຫຼັງທີ່ລາວ ມາລີ້ຊ້ອນເຮັດວຽກ ເປັນກັມມະກອນ ຢູ່ພາຍໃນກາສິໂນ ຄິງສ໌ໂຣມັນສ໌ ພາຍໃນພື້ນທີ່ ເຂດເສຖກິຈພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ, ດັ່ງເຈົ້າໜ້າທີ່ດ່ານສາກົລລາວ-ຈີນ ບໍ່ຫານ-ບໍ່ເຕັນ ແຂວງຫຼວງນ້ຳທາ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 16 ພຶສຈິກາ ນີ້ວ່າ:
“ເອົາໂຕຫຼົບໜີ ຈາກການກະທຳຜິດຢູ່ຈີນພຸ້ນນ່າ ແລ້ວມາລີ້ຊ້ອນຢູ່ລາວເດ້ ກັມມະກອນຢູ່ໃນຄາຊິໂນ ສາມຫຼ່ຽມຄຳຫັ້ນນ່າ ລາວກະມາອອກແຮງງານ ປົກກະຕິຫັ້ນແຫຼະ ໃນເມື່ອເຮົາໄດ້ຮັບການ ແຈ້ງຈາກ ສປ ຈີນ ເຮົາກໍຕິດຕາມ ແລະນຳຈັບ ສົ່ງເຂົ້າແນວນັ້ນ ເຮົາມອບໃຫ້ຈີນດຳເນີນຄະດີ ເຮົາມີແຕ່ຈັບສົ່ງກັບຄືນຊື່ໆ.”
ທ່ານກ່າວຕື່ມວ່າ ພາຍໃນກາຊິໂນ ດັ່ງກ່າວນັ້ນ ສ່ວນໃຫຍ່ ຈະມີພະນັກງານ ແລະ ກັມມະກອນ ເປັນຄົນສັນຊາດພະມ້າ ແລະສັນຊາດຈີນ ຫຼາຍກວ່າສັນຊາດລາວ ແລະຈະບໍ່ຮູ້ໄດ້ເລີຍວ່າ ຜູ້ໃດເດີນທາງເຂົ້າມາເຮັດວຽກແບບຖືກ ຫຼືຜິດກົດໝາຍ ເນື່ອງຈາກເຈົ້າໜ້າທີ່ ປກສ ເມືອງຫຼືແຂວງ ບໍ່ສາມາດກວດສອບໄດ້ ອີກທັງເສັ້ນທາງ ການຫຼົບຫຼີກ ໃຫ້ພົ້ນສາຍຕາຂອງເຈົ້າໜ້າ ທີ່ກໍມີຫຼາຍຮູບແບບ. ຊຶ່ງ ທ້າວ ເມີງ ຊິງຮົວ ກໍເປັນນຶ່ງໃນກັມມະກອນ ຂອງກາສິໂນ ຄິງສ໌ໂຣມັນສ໌ (Kings Romans Casino) ແລະໄດ້ພາສາຈີນ ຈຶ່ງເປັນເຣື່ອງງ່າຍ ທີ່ຈະໃຊ້ໜັງສືເດີນທາງ ເຂົ້າມາເຮັດວຽກຢູ່ ພາຍໃນກາສິໂນ ຄິງສ໌ໂຣມັນສ໌, ດັ່ງເຈົ້າໜ້າທີ່ ປກສ ແຂວງບໍ່ແກ້ວ ທ່ານນຶ່ງ ກ່າວວ່າ:
“ຈໍານວນນຶ່ງກໍລັກເຂົ້າມາຫັ້ນແຫຼະ ມັນຈະເຄິ່ງໆກັນນ່າ ບໍ່ຫຼົບຫຼີກກໍມີຢູ່ ມັນກໍກວ້າງຂວາງຢູ່ເດ້ ໄດ້ພາສາຈີນ ກໍໄດ້ປຽບແນ່ ແຕ່ສ່ວນຫຼາຍ ເຂົາກໍເອົາແຕ່ຄົນຮູ້ພາສາຈີນຫັ້ນແຫຼະ.”
ການສົ່ງຜູ້ຮ້າຍຂ້າມແດນ ຢູ່ໃນພາຍໃນແຂວງບໍ່ແກ້ວ ຈະມີແຕ່ຄະດີນ້ອຍໆ ເປັນຕົ້ນຄະດີ ທຳຮ້າຍຮ່າງກາຍ ແລະຄະດີລັກຊັບ ສ່ວນຄະດີໃຫຍ່ໆນັ້ນ ຈະບໍ່ປະກົດໃຫ້ເຫັນ ເນື່ອງຈາກເຈົ້າໜ້າທີ່ທີ່ກ່ຽວຂ້ອງ ບໍ່ສາມາດຈັບໂຕພວກ ທີ່ກໍຄະດີໃຫຍ່ໆນັ້ນໄດ້, ດັ່ງເຈົ້າໜ້າທີ່ ປກສ ເມືອງຕົ້ນເຜິ້ງ ກ່າວວ່າ:
“ມັນບໍ່ຄ່ອຍມີໂຕນີ້ນະ ມັນດົນໆສ່ວນຫຼາຍ ມັນກໍບໍ່ມີດອກ ຄະດີນີ້ມັນຄະດີນ້ອຍຊື່ໆ ຄະດີໃຫຍ່ ມັນກໍຍາກນ່າ ກໍຖ້າເບິ່ງກໍຣະນີມັນນ່າ ມັນແນວໃດຫັ້ນນາ ວ່າມັນຕັດສິນຢູ່ບ່ອນໃດ ກະທໍາຜິດຢູ່ລາວ ກໍດຳເນີນຄະດີຢູ່ລາວ ທາງການຈີນບໍ ຕ້ອງການບໍ່ ກໍມີການປະສານງານເນາະ.”
ໃນຂະນະທີ່ ຊາວບ້ານ ຢູ່ພາຍໃນເມືອງຕົ້ນເຜິ້ງ ກໍຈະບໍ່ຮູ້ເລີຍວ່າ ຢູ່ກາຊິໂນ ຄິງສ໌ໂຣມັນສ໌ ມີຄົນປະເພດໃດແດ່ ເຂົ້າມາເຮັດວຽກ ຫຼືມີການຈັບກຸມຄົນໃດ ຢູ່ພາຍໃນກາຊິໂນ ຄິງໂຣມັນໄດ້ ເນື່ອງຈາກວ່າພາຍໃນເຂດດັ່ງກ່າວນັ້ນ ຖືກຄຸ້ມຄອງ ໂດຍເຈົ້າໜ້າສະເພາະກິຈ ຢ່າງເຂັ້ມງວດ ອີກທັງພະນັກງານ ແລະກັມມະກອນສ່ວນໃຫຍ່ ກໍເປັນຄົນຈີນ, ດັ່ງຊາວບ້ານ ຢູ່ບ້ານພຽງງາມ ເມືອງຕົ້ນເຜິ້ງ ກ່າວວ່າ:
“ກໍມັນຄາດຄະເນບໍ່ໄດ້ ສ່ວນຫຼາຍກະແມ່ນຈີນຫຼາຍ ໂອ້ອອກບໍ່ໄດ້ມັນເຂັ້ມງວດ ຂນາດເຂົ້າ ຕ້ອງໄດ້ກັກໂຕ 14 ວັນ ຊິອອກກໍຄືກັນ.”
ທ້າວ ເມີງ ຊິງຮົວ ໄດ້ເດີນທາງເຂົ້າມາລາວ ແບບຜິດກົດໝາຍ ໂດຍມາຜ່ານ ຊາຍແດນທາງທັມມະຊາດ ແຂວງຫຼວງນ້ຳທາ ແລະໄປລີ້ເຮັດວຽກ ເປັນກັມມະກອນ ຢູ່ກາສິໂນ ຄິງສ໌ໂຣມັນສ໌ ພາຍໃນພື້ນທີ່ ເຂດເສຖກິຈພິເສດ ສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ.