ຈີນຈະສ້າງເຂື່ອນນ້ຳເນີນ1 ນ້ຳເນີນ3

ທາງການລາວ ໄດ້ເຊັນ ບົດບັນທຶກ MOU ສຶກສາ ສຳຣວດ ຄວາມ ເປັນໄປໄດ້ ໃນ ການກໍ່ສ້າງ ເຂື່ອນ ນ້ຳເນີນ1 ແລະ ນ້ຳເນີນ3 ກັບ ບໍຣິສັດ Indochina Consulting ຂອງຈີນ ເມື່ອ ວັນທີ 26 ສິງຫາ 2014 ຊຶ່ງການ ປະເມີນ ເບື້ອງຕົ້ນ ຄາດວ່າ 2 ໂຄງການ ນີ້ ຈະສົ່ງ ຜົລກະທົບ ຢ່າງ ຫຼວງຫຼາຍ ຕໍ່ ປະຊາຊົນ. ຕາມຄຳເວົ້າ ຂອງ ເຈົ້າໜ້າທີ່ ກະຊວງ ພລັງງານ ແລະ ບໍ່ແຮ່:

"ນ້ຳເນີນນີ້ ຂອງ ບໍຣິສັດ ອິນໂດຈາຍນາ ນີ້ ມັນຕັ້ງຢູ່ເ ມືອງ ຫົວເມືອງ ກັບ ຂອງ ຊຽງຂວາງ ຊາຍແດນ ກັນ ອັນນີ້ ຕົວນີ້ ຕໍ່ MOU ມີ ຜົລກະທົບ ຫຼາຍ ຖືວ່າມີ ຜົລກະທົບ".

ທ່ານເວົ້າວ່າ ທາງ ກະຊວງ ພລັງງານ ແລະ ບໍ່ແຮ່ ໄດ້ ພິຈາຣະນາ ເບິ່ງ ຂໍ້ມູລ ຈາກ ການ ສຶກສາ ສຳຣວດ ທັງ 2 ເຂື່ອນ ນັ້ນແລ້ວ ຄາດວ່າ ຈະຕ້ອງ ໂຍກຍ້າຍ ປະຊາຊົນ ຈາກພື້ນທີ່ ເປັນ ຈຳນວນຫຼາຍ ແຕ່ ປັຈຈຸບັນ ຍັງບໍ່ໄດ້ ມີການປຶກສາ ຫາຣື ກັບຊາວບ້ານ ເພື່ອຕົກລົງ ຄ່າທົດແທນ ແຕ່ຢ່າງໃດ ເທື່ອ.

ໂຄງການເຂື່ອນ ນ້ຳເນີນ1 ຈະມີກຳລັງ ການຜລິດ 124 ເມັກກາວັດ ມີອ່າງເກັບນ້ຳ ຂນາດ 17 ກິໂລແມັຕ ມົນທົນ ຕັ້ງຢູ່ ແຂວງ ຊຽງຂວາງ ຄາດວ່າ ຈະໃຊ້ທຶນ ໃນ ການກໍ່ສ້າງ 188 ລ້ານ ໂດລາ ສະຫະຣັດ ຫາກ ກໍ່ສ້າງແລ້ວ ຈະເກີດ ນ້ຳຖ້ວມ 5 ບ້ານ 174 ຄອບຄົວ ຕ້ອງໂຍກຍ້າຍ.

ໂຄງການ ເຂື່ອນ ນ້ຳເນີນ3 ເປັນ ເຂື່ອນ ໄຟຟ້າ ຂນາດ 60 ເມັກກາວັດ ມີ ອ່າງເກັບນ້ຳ ຂນາດ 12 ກິໂລແມັຕ ມົນທົນ ຕັ້ງຢູ່ ແຂວງ ຫົວພັນ ຄາດວ່າ ຈະໃຊ້ທຶນ ກໍ່ສ້າງ 110 ລ້ານ ໂດລາ ສະຫະຣັດ. ຍັງບໍ່ມີ ການເປີດເຜີຍ ເຣື່ອງ ຜົລກະທົບ ແລະ ແຜນໂຍກຍ້າຍ ປະຊາຊົນ ເທື່ອ.

ເຈົ້າໜ້າທີ່ ເວົ້າວ່າ ຍັງ ບໍ່ຈະແຈ້ງ ເທື່ອວ່າ ຈະ ເຣີ່ມກໍ່ສ້າງ ເມື່ອໃດ ແຕ່ໃນຂັ້ນ ຕໍ່ໄປ ຈະມີການ ເກັບຂໍ້ມູລ ເພີ່ມຕື່ມ ເພື່ອປະເມີນ ມູລຄ່າ ການຊົດເຊີຍ ທີ່ ຈະຈ່າຍ ໃຫ້ ປະຊາຊົນ ທີ່ໄດ້ ຮັບ ຜົລກະທົບ.