ຄົນລາວ ເຊື້ອສາຍຈີນ, ວຽດນາມ ຈະຈັດງານປີໃໝ່ ໃຫ້ຍິ່ງໃຫຍ່
2023.01.19
ຊາວລາວເຊື້ອສາຍຈີນ ແລະ ວຽດນາມ ໃນນະຄອນຫຼວງວຽງຈັນ ພວມຈັບຈ່າຍ ຊື້ເຄື່ອງຂອງ ເພື່ອກະຕຣຽມ ສລອງບຸນປີໃໝ່ຈີນ ປະຈຳປີນີ້ (TS), ວັນທີ 20 ມົກກະຣາ ປີ 2023.
RFA
ໃນວັນທີ 22 ມົກກະຣາ ທີ່ຈະມາເຖິງນີ້, ຄົນລາວເຊື້ອສາຍຈີນ ແລະ ເຊື້ອສາຍວຽດນາມ ແລະ ພາກສ່ວນກ່ຽວຂ້ອງຂັ້ນເມືອງ ແລະ ແຂວງ ມີແຜນຈະຈັດງານບຸນປີໃໝ່ ຫຼື ຕຣຸດຈີນ ແລະ ຕຣຸດວຽດ ປະຈຳປີ 2023 ຢ່າງຍິ່ງໃຫຍ່ ຫຼັງຈາກບໍ່ໄດ້ຈັດມາ 2 ປີ ຍ້ອນການຣະບາດຂອງໂຄວິດ-19.
ຢູ່ນະຄອນຫລວງວຽງຈັນ, ຈະມີການເຊີດສິງໂຕໄປຕາມແຫຼ່ງຊຸມຊົນ ເພື່ອເປັນສິຣິມຸງຄຸນ ໃນວັນຂຶ້ນປີໃໝ່ຊາວຈີນ ແລະ ຊາວວຽດ ພ້ອມດຽວກັນນັ້ນ ກໍຈະເປີດພື້ນທີ່ ຢູ່ວັດສະມາຄົມຈີນ ຫຼື ວັດຈີນ ຢູ່ບ້ານດົງປ່າແຫຼບ ເມືອງຈັນທະບູລີ ນະຄອນຫລວງວຽງຈັນ ເພື່ອໃຫ້ປະຊາຊົນ ສາມາດເຂົ້າມາເຮັດບຸນ ໄດ້ຕາມປົກກະຕິ.
ຊາວນະຄອນຫລວງວຽງຈັນ ທີ່ເຮັດວຽກນຳມູລນິທິຈີນ ວຽງຈັນ ໄດ້ກ່າວຕໍ່ວິທຍຸ ເອເຊັຽ ເສຣີ ວ່າ:
“ພວກເຮົາກໍຈະແຫ່ເປັນປົກຕິຢູ່ແລ້ວ ຫັ້ນນ່າເນາະ ຕາມບ້ານເຮືອນ ຜູ້ທີ່ເອົາເຊີດເອົາຫຍັງເນາະ ແລ້ວກໍໄຫວ້ຕາມທີ່ສັກກາຣະບູຊາ ຂອງໄທເຮົາ ເຄີຍເຮັດມາຫັ້ນນ່າ ມັນກໍຈະຈັດໃຫຍ່ກວ່າປີ ໂຄວິດ-19 ພວກເຮົາຈຳກັດ ຈຳກັດຄົນເນາະ ພື້ນທີ່ຂອງມູລນິທິ ມັນກໍຈະມີວັດ ມັນກໍຈະໄຫວ້ເປັນປົກກະຕິຢູ່ລະ ມີຊາວຈີນ ຊາວລາວ ເຮົາມາຮ່ວມກັນໄຫວ້ຢູ່ ຢູ່ວັດ ຢູ່ມູລນິທິຫັ້ນນ່າເນາະ.”
ສ່ວນວ່າ ງານຕຣຸດຈີນ, ຕຣຸດວຽດ ຢູ່ນະຄອນໄກສອນ ພົມວິຫານ ຢູ່ແຂວງສວັນນະເຂດ ກໍຈະມີກິຈກັມ ທີ່ຊື່ວ່າ ສວັນຫັນສາ ຫຼື Savan Fun Fest ແລະ ຄາດວ່າ ຈະມີນັກທ່ອງທ່ຽວໄທຍ ເຂົ້າມາທົ່ວ ແຂວງສວັນນະເຂດ ເປັນຈຳນວນຫຼາຍ.
ທີມງານເຊີດສິງໂຕ ແຂວງສວັນນະເຂດ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽ ເສຣີ ວ່່າ:
“ຈັດໃຫຍ່ເລີຍປີນີ້ ປີນີ້ ເພິ່ນຊິຈັດໃຫຍ່ ກຸດຈີນ ກຸດວຽດ ແລ້ວກໍຈະຈັດງານຟັນເຟສ ເດ້ ສວັນຫັນສານີ້ເດ້ ປີນີ້ ເພິ່ນເປີດປະເທດຫຼາຍ ຂນາດຍັງບໍ່ທັນເປີດງານຫັ້ນນ່າ ມີແຕ່ເປີດປະເທດຊື່ໆ ຄົນມາທ່ຽວຝັ່ງພີ້ຫຼາຍ ເພາະວ່າ ມັນເປັນເມືອງເກົ່າ ຂ້ອນຂ້າງ Classic ແດ່ ຄົນໄທຍມາທ່ຽວຫຼາຍໄດ໋ ໂອ້ຍ ຄົນມາແຕ່ຊົນບູຣີ ກຸງເທບ ມາອຶກກະທຶກ ຄຶກໂຄມ.”
ຢູ່ແຂວງຫລວງພຣະບາງ ກໍຈະມີການສະແດງຟ້ອນ ແລະ ການເຊີດສິງໂຕ ຍ້ອນວ່າ ບໍ່ໄດ້ຈັດມາດົນ. ຊາວຄ້າ-ຂາຍ ທ່ານນຶ່ງ ຢູ່ແຂວງຫລວງພຣະບາງ ໄດ້ກ່າວຕໍ່ວິທຍຸ ເອເຊັຽ ເສຣີ ວ່າ:
“ຕາມທີ່ໄດ້ຍິນ ພວກທາງສະມາຄົມຈີນ ຂະເຈົ້າຈະເຮັດໃຫຍ່ໜ້ອຍນຶ່ງ ປົກຕິຂະເຈົ້າ ຊິມີກິນລ້ຽງແມ່ນຫຍັງ ມີຮ້ອງເພງ ມີການສແດງການຟ້ອນ ການແມ່ນຫຍັງ ການເຊີດສິງໂຕແມ່ນຫຍັງ ເພາະວ່າ ໂຕນີ້ແຫ່ສິ່ງໂຕ ເມື່ອປີໃໝ່ ກຸດຈີນ ຂະເຈົ້າຈະແບບກິນເຂົ້າ ສາມັກຄີຫັ້ນນ່າ ຢູ່ທາງສະມາຄົມ ຈະເຈົ້າກິນເຂົ້າສາມັກຄີຢູ່ທາງໂຮງຮຽນ ແລະ ຂະເຈົ້າຈະໄດ້ຈັດງານຟ້ອນ ຮ້ອງເພງແມ່ນຫຍັງ ແລ້ວກໍເຊີດສິງໂຕແມ່ນຫຍັງໄປນຳ.”
ກ່ອນໜ້າ ທີ່ຈະມີການແຜ່ຣະບາດ ຂອງໂຄວິດ-19, ຊາວຈີນ ນິຍົມຂີ່ຣົຖສ່ວນໂຕ ເດີນທາງຈາກປະເທດຈີນ ເຂົ້າມາທ່ຽວລາວ. ປັດຈຸບັນ ເຖິງວ່າ ທາການຈີນ ມີການປະກາດເປີດປະເທດ ຢ່າງເປັນທາງການໃນວັນທີ 8 ມົກກະຣາ 2023 ທີ່ຜ່ານມາ, ແຕ່ ກໍຍັງບໍ່ສາມາດຄາດຄະເນໄດ້ວ່າ ຈະມີຊາວຈີນຫຼາຍປານໃດ ເດີນທາງເຂົ້າມາລາວ ເພື່ອສລອງປີຈີນປີນີ້.
ເຈົ້າໜ້າທີ່ ເຮັດວຽກດ້ານການສົ່ງເສີມ ການທ່ອງທ່ຽວ ຢູ່ ແຂວງພາກເໜືອ ຜູ້ທີ່ບໍ່ປະສົງອອກຊື່ ແລະ ຕຳແໜ່ງ ໄດ້ກ່າວວ່າ:
“ສ່ວນຫຼາຍກໍເປັນຊາວຈີນ ທີ່ມາຄ້າຂາຍ ຫຼືວ່າ ມາລົງທຶນຢູ່ອຸດົມໄຊ ນີ້ [ສ່ວນງານບຸນປີໃໝ່ວຽດ-ຈີນ] ອັນນີ້ ບໍ່ຄ່ອຍມີ ເຮົາຢູ່ອຸດົມໄຊ ສ່ວນຫຼາຍກໍຢູ່ນະຄອນຫລວງມີ [ເບື້ອງອຸດົມໄຊ] ບໍ່ມີທັນຫຼາຍ ເພາະວ່າ ຫາກໍ່ເປີດດ່ານ ວັນທີ 8 ຜ່ານມາ ນີ້ ເນາະ ຍັງບໍ່ທັນເຫັນເຂົ້າມາຫຼາຍເທື່ອ. ໂອ້ ຍັງບໍ່ທັນຮູ້ ຄືຜ່ານມາເນາະ ຊ້ວງກ່ອນໂຄວິດ ຫັ້ນຫຼາຍໆ ຫຼາຍແທ້ມາທ່ຽວລາວ ທ່ຽວອຸດົມໄຊນີ້ນ່າ [ແຕ່ປັດຈຸບັນນີ້] ຄາດຄະເນບໍ່ໄດ້ວ່າ ຊິມາຫຼາຍຫຼືມາໜ້ອຍ.”
ຕາມປົກຕິແລ້ວ ໄລຍະຕຣຸດຈີນ ແລະ ຕຼຸດວຽດ, ສິນຄ້າທີ່ເປັນເຄື່ອງອຸປະໂພກ ບໍຣິໂພກ ຈະມີລາຄາແພງຂຶ້ນ. ແມ່ຄ້າຊາວວຽດນາມ ຢູ່ຕລາດດາວເຮືອງ ນະຄອນປາກເຊ ແຂວງຈຳປາສັກ ໄດ້ກ່າວວ່າ:
“ບໍ່ແນ່ໃຈເດີ ເພາະວ່າ ແຕ່ລະປີ ມັນບຄືກັນເດ້ ຫາກໍ່ແລ້ວໂຄວິດ-19 ເຮົາກໍບໍ່ຮູ້ວ່າ ຄົນເຂົາຊິມີເງິນເດ້ ໄດ້ທ່ຽວ ໄດ້ຫຼິ້ນບໍ່ຊິນ່າ ກໍຂຶ້ນຫຼາຍຢູ່ ມັນກໍອາດຊິເປັນທົ່ວໄປ ເລີຍນີ້ແຫຼະເຄື່ອງກິນບໍ່ ໝາກໄມ້ບໍ່ ອີ່ຫຍັງກໍຂຶ້ນ ຂຶ້ນໝົດນ່າ ຊ້ວງກຸດຈີນນີ້ແຫຼະ.”
ເມື່ອບໍ່ດົນມານີ້, ທ່ານ ສຳເລັດ ເພັດພອນສັກ ຫົວໜ້າຂແນງການພາຍໃນ ຜແນກອຸດສາຫະກັມ ແລະ ການຄ້າ ນະຄອນຫລວງວຽງຈັນ ໄດ້ໃຫ້ສຳພາດຕໍ່ສື່ມວນຊົນລາວວ່າ ໃນໄລຍະສົ່ງທ້າຍປີເກົ່າ ຕ້ອນຮັບປີໃໝ່ ສາກົນ 2023 ຈົນຮອດໄລຍະຕຣຸດຈີນ ແລະ ຕຣຸດວຽດ ໜ່ວຍງານຂອງທ່ານ ໄດ້ແຕ່ງຕັ້ງເຈົ້າໜ້າທີ່ກວດກາການຄ້າ ສຳລັບດຳເນີນການ ເຄື່ອນໄຫວຕິດຕາມລາຄາສິນຄ້າ ໃນຕລາດ ໃນເຂດໂຕເມືອງຂອງນະຄອນຫລວງວຽງຈັນ ເພື່ອປ້ອງກັນບໍ່ໃຫ້ຊາວຄ້າຂາຍ ສວຍໂອກາດຂຶ້ນລາຄາ ແລະ ກັກຕຸນສິນຄ້າ.
ທ່ານ ກ່າວຕື່ມວ່າ ໃນໄລຍະການສເລີມສລອງ ບຸນປີໃໝ່ວຽດ ແລະ ຈີນ ທີ່ ຜ່ານມາສ່ວນຫຼາຍແມ່ນຊີ້ນໝູ ແລະ ຊີ້ນງົວ ມັກມີລາຄາເໜັງຕີງ ຍ້ອນຄວາມຕ້ອງການ ບໍຣິໂພກຫຼາຍ ແຕ່ຄວາມສາມາດ ໃນການຜລິດບໍ່ພຽງພໍ ເຮັດໃຫ້ຕ້ອງນຳເຂົ້າໝູ ຈາກບ່ອນອື່ນ ຈຶ່ງສົ່ງຜົລໃຫ້ລາຄາສູງຂຶ້ນ.