“အာဂျင်တီးနားတရားရုံးနဲ့ ဒေါ်အောင်ဆန်းစုကြည် ဖမ်းဝရမ်း”

၂၀၁၇ ခုနှစ်က ရခိုင်ပြည်နယ်၊ မောင်တောဒေသမှာ ရိုဟင်ဂျာမူဆလင်တွေကို နယ်မြေရှင်းလင်းရေး စစ်ဆင်ရေးလုပ်ပြီး သတ်ဖြတ်မောင်းထုတ်ခဲ့တဲ့အတွက် လူမျိုးတုံးသတ်ဖြတ်မှုစွဲချက်နဲ့ အပြစ်ရှိကြောင်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် အပါအဝင် စစ်ဘက်နယ်ဘက် အရာရှိ ၂၃ ယောက်နဲ့အတူ အဲဒီအချိန်က နိုင်ငံ့အကြီးအကဲ တာဝန်ယူခဲ့တဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်နဲ့ သမ္မတ ဦးထင်ကျော်တို့ကိုပါ အာဂျင်တီးနားနိုင်ငံ တရားရုံးက ပြီးခဲ့တဲ့ ဖေဖော်ဝါရီလ ၁၃ ရက်နေ့က ဖမ်းဝရမ်းထုတ်ဖို့ အမိန့်ချလိုက်ပါတယ်။

လူမျိုးတုံးသတ်ဖြတ်မှု၊ လူသားမျိုးနွယ်အပေါ်ကျူးလွန်တဲ့ ရာဇဝတ်မှုတွေနဲ့ မြန်မာစစ်ခေါင်းဆောင်တွေကို ဗြိတိန်နိုင်ငံအခြေစိုက် မြန်မာရိုဟင်ဂျာအသင်း (BROUK) က ၂၀၁၉ ခုနှစ်မှာ တရားလိုလုပ်ပြီး အာဂျင်တီးနားနိုင်ငံ တရားရုံးမှာ အမှုဖွင့်တိုင်ကြားခဲ့တာပါ။ ဒီအမှုကို ကြားနာမှုတွေလုပ်ခဲ့ပြီးနောက် အခုလို ဖမ်းဝရမ်းထုတ်ဖို့ တရားရုံးဆုံးဖြတ်ချက် ထွက်ပေါ်လာတာ ဖြစ်ပါတယ်။ ဒီအကြောင်းတွေကို ဒီတစ်ပတ် ဆွေးနွေးသွားမှာပါ။

ပါဝင်ဆွေးနွေးမယ့်သူတွေကတော့ တရားလွှတ်တော်ရှေ့နေ ဦးကြီးမြင့်၊ Fortify Rights အဖွဲ့ရဲ့ လူ့အခွင့်အရေးစုံစမ်းစစ်ဆေးမှု အထူးတာဝန်ခံ ဦးဇော်ဝင်း၊ Fortify Rights အဖွဲ့ရဲ့ မြန်မာ့လူ့အခွင့်အရေးဆိုင်ရာ စုံစမ်းစစ်ဆေးရေးတာဝန်ခံ မချစ်ဆိုင်းနဲ့ မြန်မာရိုဟင်ဂျာအသင်းယူကေ (BROUK) ဥက္ကဋ္ဌ ဦးထွန်းခင်တို့ ဖြစ်ပါတယ်။ RFA ဝိုင်းတော်သူ မသီရိမင်းဇင် စီစဉ်တင်ဆက်ထားပါတယ်။