ရိုးရာမပျက် ဆက်လက်လုပ်ကိုင်နေကြတဲ့ မီးပုံးလုပ်ငန်း

ဒီမီးပုံးတွေလုပ်တဲ့အခါ ဝါးနဲ့စက္ကူကို အခြေခံပြီး ဝါးခွဲ၊ ဝါးဖြတ်၊ ဝါးချိုး၊ ဝါးရိုက်၊ စက္ကူကပ်၊ ပန်းချီဆွဲ စတာတွေကို တစ်ဆင့်ချင်းစီ လုပ်ရတာပါ။ ပုံမှန်လုပ်နေကျ မီးပုံးပုံစံတွေကတော့ ကြယ်၊ မြခွက်၊ ဗန်ဒါရွက်၊ အဝိုင်း၊ လေးထောင့်၊ ဘီလူးမမျက်ကွင်း စတဲ့ ပုံစံတွေပါ။

အရုပ်ပုံစံတွေ အနေနဲ့ ကြက်ဖ၊ ဒေါင်း၊ ငါး၊ ယုန်၊ ဇီးကွက်နဲ့ ဂျိုကာ စတဲ့ပုံတွေကို လုပ်ကြပြီး မှာယူတဲ့အရုပ်ပေါ်မူတည်ပြီး လုပ်ပေးရတာလည်း ရှိတယ်လို့ မီးပုံးလုပ်သူတွေက ပြောပါတယ်။ ကုန်ဈေးနှုန်းတက်ပေမဲ့ မီးပုံးလုပ်ငန်းကိုတော့ ရိုးရာမပျက် ဆက်လက်ထိန်းသိမ်းပြီး လုပ်နေကြတာလို့လည်း မီးပုံးလုပ်သူတွေက ပြောပါတယ်။

လွန်ခဲ့တဲ့ ၁၀ နှစ်ကျော်ကတည်းက တရုတ်လုပ်မီးပုံးတွေ ပေါ်လာပေမဲ့ မြန်မာ့လက်မှု မီးပုံးတွေကတော့ လက်ရှိအချိန်အထိ ရောင်းနေရဆဲ ဖြစ်ပါတယ်။ အရင်က ဗားကရာဝန်းကျင်မှာ အလုပ်သမားအများအပြားနဲ့ မီးပုံးလုပ်ငန်းကို လုပ်ကြပေမဲ့ အခုတော့ တစ်ပိုင်တစ်နိုင်ပဲ လုပ်နိုင်ကြတော့တယ်လို့ မီးပုံးလုပ်သူတွေက ပြောပါတယ်။

လက်ရှိမှာ မီးပုံးတွေကို မြန်မာငွေ ၁၅၀၀ ကျပ်ကနေ တစ်သောင်းကျော်အထိ ပုံစံပေါ်မူတည်ပြီး ဈေးအမျိုးမျိုးနဲ့ ရောင်းနေကြပါတယ်။