ရိုဟင်ဂျာ နှစ်ရာကျော်ပါတဲ့ စက်လှေ စစ်တွေမြို့အနီး ဖမ်းဆီးခံရ
ရိုဟင်ဂျာ ၂၂၈ ဦး ပါလာတဲ့ စက်လှေတစ်စီးကို ရခိုင်ပြည်နယ် စစ်တွေမြို့အနီးမှာ မြန်မာရေတပ်က မနေ့မနက်ပိုင်းမှာ ဖမ်းဆီးခဲ့တဲ့အကြောင်း စစ်ကောင်စီ ထိန်းချုပ်တဲ့ နိုင်ငံပိုင်မြန်မာ့ရုပ်မြင်သံကြားက ကြေညာပါတယ်။
- 2021-11-29
-
-
-
ရိုဟင်ဂျာ ၂၂၈ ဦး ပါလာတဲ့ စက်လှေတစ်စီးကို ရခိုင်ပြည်နယ် စစ်တွေမြို့အနီးမှာ မြန်မာရေတပ်က မနေ့မနက်ပိုင်းမှာ ဖမ်းဆီးခဲ့တဲ့အကြောင်း စစ်ကောင်စီ ထိန်းချုပ်တဲ့ နိုင်ငံပိုင်မြန်မာ့ရုပ်မြင်သံကြားက ကြေညာပါတယ်။
စက်လှေပေါ်က ရိုဟင်ဂျာတွေထဲမှာ ကလေးက ၃၃ဦး၊ အမျိုးသမီး ၁၂၅ဦး၊ အမျိုးသား ၇ဝ တို့ ပါဝင်ပြီး လှေလုပ်သား မြန်မာလူမျိုး ငါးဦးကိုလည်း ဖမ်းဆီးခဲ့တယ်လို့ဆိုပါတယ်။ ဒီလူတွေဟာ ဘယ်ဒေသကနေ လာပြီး ဘယ်ကိုသွားကြမလဲဆိုတာကို မသိရပါဘူး။
ဒီအကြောင်းကို အသေးစိတ်သိနိုင်ဖို့ စစ်ကောင်စီရဲ့ ပြောခွင့်ရပုဂ္ဂိုလ်ကို Reuters သတင်းဌာနက ဆက်သွယ်ခဲ့ပေမယ့် အကြောင်းမပြန်ဘူးလို့ဆိုပါတယ်။ ဒါပေမယ့် ဒေသဆိုင်ရာ အစိုးရအရာရှိတစ်ဦးကတော့ ရိုဟင်ဂျာတွေ စက်လှေနဲ့အဖမ်းခံခဲ့ရတဲ့ကိစ္စဟာ မှန်ကန်တယ်လို့ အတည်ပြုချက်ပေးပါတယ်။ အသေးစိတ်ကိုတော့ မပြောပါဘူး။
မြန်မာ့ရုပ်မြင်သံကြားမှာပြသတဲ့ ပုံအရ သစ်သားစက်လှေပေါ်မှာ လူတွေအပြည့် တင်ဆောင်လာတာကို မြင်ရပါတယ်။ ပြီးခဲ့တဲ့ ၂ဝ၂ဝပြည့်နှစ်တုန်းက အခုလိုပဲ ရိုဟင်ဂျာတွေ စက်လှေနဲ့ မလေးရှားနိုင်ငံကို ထွက်သွားတဲ့အခါ ပင်လယ်ထဲမှာ သတင်းပတ်အတော်ကြာအောင်မျောနေပြီး စက်လှေမှာပါလာတဲ့ ရိုဟင်ဂျာ အနည်းဆုံး ၃၂ ဦး သေဆုံးခဲ့ရပါတယ်။