ဘုရားသုံးဆူရဲစခန်း တိုက်ခိုက်ခံရ
ဘုရားသုံးဆူမြို့ပေါ်မှာ ၂၀၂၃ ခုနှစ်၊ ဖေဖော်ဝါရီလ ၂၅ ရက်နေ့ မနက်ပိုင်း တိုက်ပွဲဖြစ်ခဲ့ပြီး ဘုရားသုံးဆူရဲစခန်း မီးရှို့ခံခဲ့ရပါတယ်။
-
RFA Burmese
2023-02-25 -
-
-
ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့ပေါ်မှာ ၂၀၂၃ ခုနှစ်၊ ဖေဖော်ဝါရီလ ၂၅ ရက်နေ့ မနက်ပိုင်း တိုက်ပွဲဖြစ်ခဲ့ပြီး ဘုရားသုံးဆူရဲစခန်း မီးရှို့ခံခဲ့ရတယ်လို့ ဒေသခံတွေက ပြောပါတယ်။
မနက် ၆ နာရီဝန်းကျင်မှာ ဘုရားသုံးဆူရဲစခန်းကို အမည်မသိအဖွဲ့က တိုက်ခိုက်ခဲ့တာ ဖြစ်ပြီး တိုက်ပွဲအတွင်း နှစ်ဖက်ပစ်ခတ်တဲ့ လက်နက်ကြီးကြောင့် ဒေသခံတစ်ဦး ထိခိုက်ဒဏ်ရာရခဲ့တယ်လို့ လုံခြုံရေးအရ အမည်မဖော်လိုတဲ့ ဒေသခံက RFA ကို ပြောပါတယ်။
"မြို့ပေါ်မှာ မီးခိုးတော့ မြင်ရတာပေါ့။ ဒါပေမဲ့ ခဏပါပဲ အကြာကြီးတော့ မဟုတ်ပါဘူး။ တိုက်ပွဲကတော့ ပြီးသွားပြီ။ ပြည်သူ တစ်ယောက်တော့ နည်းနည်းထိခိုက်မှုရှိတယ်"
မနက် ၆ နာရီဝန်းကျင်ကနေ ၇ နာရီဝန်းကျင်အထိ တစ်နာရီနီးပါးကြာ တိုက်ပွဲဖြစ်ခဲ့ ပြီးနောက် မြို့ပေါ်မှာ လူအသွားအလာ နည်းသွားပေမယ့် စစ်ကောင်စီတပ်ကတော့ လုံခြုံရေးတိုးချတာမျိုး မတွေ့ရဘူးလို့ ဆိုပါတယ်။
ဒဏ်ရာရခဲ့တဲ့ ဒေသခံတစ်ဦးအပါအဝင် တိုက်ပွဲကြောင့် နှစ်ဖက်ထိခိုက်သေဆုံးမှုနဲ့ ပတ်သက်ပြီး RFA အနေနဲ့ သီးခြားအတည်မပြုနိုင်သေးပါဘူး။
ဒီကိစ္စနဲ့ ပတ်သက်ပြီး စစ်ကောင်စီရဲ့ ကရင်ပြည်နယ်ပြောခွင့်ရသူ စီးပွားရေးဝန်ကြီး ဦးစောခင်မောင်မြင့်ကို RFA က ဆက်သွယ်မေးမြန်းခဲ့ပေမယ့် သူ့အနေနဲ့ မသိသေးဘူးလို့သာ ပြန်လည်ဖြေဆိုပါတယ်။
ဇန်နဝါရီလ ၂၃ ရက်နေ့ညကလည်း ဘုရားသုံးဆူမြို့၊ ဘုရင့်နောင်လမ်းပေါ် (၂) ရပ်ကွက်နဲ့ (၃) ရပ်ကွက်မှာရှိတဲ့ လူဝင်မှုကြီးကြပ်ရေးရုံး၊ အထွေထွေအုပ်ချုပ်ရေးရုံး၊ စည်ပင်ရုံးနဲ့ စစ်ဖက်ရေးရာလုံခြုံရေးတပ်ဖွဲ့ (စရဖ) ရုံးတို့ကို ဘုရားသုံးဆူ မြို့ပြပြောက်ကျားတပ်ဖွဲ့က မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။