PJ ပတ်စ်ပို့ အမျိုးအစားတွေကို PV ပြောင်းခွင့် စစ်ကောင်စီ ပိတ်ပင်
ပြည်ပထွက်အလုပ်လုပ်ခွင့် နိုင်ငံကူးလက်မှတ် PJ (Passport for Job) ကနေ အလည်အပတ် နိုင်ငံကူးလက်မှတ် (Passport for Visit) ပြောင်းလဲလျှောက်ထားတာတွေကို ဇွန်လ ၆ ရက်နေ့ကစပြီး စစ်ကောင်စီက ပိတ်လိုက်ပါတယ်။
-
RFA Burmese
2024-06-07 -
-
-
ပြည်ပထွက်အလုပ်လုပ်ခွင့် နိုင်ငံကူးလက်မှတ် PJ (Passport for Job) ကနေ အလည်အပတ် နိုင်ငံကူးလက်မှတ် (Passport for Visit) ပြောင်းလဲလျှောက်ထားတာတွေကို ဇွန်လ ၆ ရက်နေ့ကစပြီး စစ်ကောင်စီက ပိတ်လိုက်ပါတယ်။
မေလ ၁ ရက်ကစလို့ အသက် ၂၃ နှစ်ကနေ ၃၁ နှစ်အကြား အမျိုးသားတွေကို ပြည်ပထွက် အလုပ်လုပ်ခွင့် ပိတ်ပင်လိုက်တဲ့နောက် PJ နိုင်ငံကူးလက်မှတ်ကိုင်ထားသူတွေဟာ PV ကို ပြောင်းလဲလျှောက်ထားပြီး အလည်အပတ်ဗီဇာနဲ့ ပြည်ပထွက်ဖို့ကြိုးစားကြပါတယ်။
ဒါကြောင့် အခုလို ပိတ်လိုက်တာလို့ နိုင်ငံကူးလက်မှတ် ဝန်ဆောင်မှုပေးနေသူတစ်ဦးက RFA ကို ပြောပါတယ်။
“PJ နဲ့ကျတော့ ပြည်ပမှာအလုပ်လုပ်ခွင့် အသက်ကန့်သတ်လိုက်တော့ သွားချင်တဲ့သူတွေ သွားမရတော့ဘူး၊ အဲဒါနဲ့ PV ကို ပြောင်းလျှောက်ကြတာ။ PV နဲ့ ထွက်ပြီးအလုပ်လုပ်ကြတယ်လို့ စစ်ကောင်စီဘက်က ယူဆထားပုံရတယ်။ အဲဒါကြောင့် အခု ပြောင်းခွင့်ပိတ်လိုက်တာ”
အခုလို ပြောင်းလဲလျှောက်ထားခွင့် ပိတ်လိုက်တာကြောင့် ပြည်ပထွက်ပြီး အလုပ်လုပ်မယ့်သူတွေ ပိုပြီးအခက်အခဲဖြစ်လာတယ်လို့ ပြောပါတယ်။
အခုလိုပြောင်းလဲခွင့် ပိတ်ပင်လိုက်တာကို မြန်မာနိုင်ငံကူးလက်မှတ် ထုတ်ပေးရေးရုံးရဲ့ အင်တာနက်စာမျက်နှာမှာ တရားဝင် ထုတ်ပြန်တာ မရှိသေးဘဲ လက်မှတ်ထုတ်ပေးရေးရုံးမှာသာ စာကပ်ပြီး ကြေညာထားတာပါ။ ဒါနဲ့ပတ်သက်လို့ မြန်မာနိုင်ငံကူးလက်မှတ်ထုတ်ပေးရေးရုံး (ရန်ကုန်) ကို RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေကြားတာ မရှိပါဘူး။
ပြည်သူ့စစ်မှုထမ်းဥပဒေကို အသက်သွင်းပြီးနောက်မှာ အသက် ၁၈ နှစ်ကနေ ၃၅ နှစ်အကြား စစ်မှုထမ်းဖို့ အကျုံးဝင်သူအများအပြား နိုင်ငံကို စွန့်ခွာနေကြပါတယ်။
တစ်ဖက်မှာလည်း စစ်ကောင်စီက ပြည်သူ့စစ်မှုထမ်းဥပဒေကို အလျင်အမြန်အကောင်အထည်ဖော်နေပြီး စစ်မှုထမ်းအပတ်စဉ် ၂ ခုအထိ ခေါ်ယူထားပါတယ်။ နောက်ထပ် စစ်မှတ်ထမ်းအပတ်စဉ် (၃) ခေါ်ယူဖို့ကိုလည်း ကျေးရွာတွေနဲ့ ရပ်ကွက်တွေမှာ လူစုဆောင်းတာတွေလုပ်နေပါတယ်။