အလုပ်မရသေးတဲ့ မြန်မာအလုပ် သမား ၃၀၀ မြဝတီမြို့မှာ အခက်တွေ့နေ
လူထိပ်မိုး အလုပ်အကိုင်ရှာဖွေရေးအေဂျင်စီ တစ်ခုက မြန်မာအလုပ်သမား ၃၀၀ ကို ထိုင်းနိုင်ငံက မုန့်မျိုးစုံ ထုတ်လုပ်တဲ့စက်ရုံမှာ အလုပ်ရမယ် ဆိုပြီး စာချုပ်ချုပ်ခဲ့ပေမယ့် အခုချိန်ထိ အလုပ်မရသေးဘူး လို့ မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် က ပြောပါတယ်။
-
2016-10-03 -
-
-
လူထိပ်မိုး အလုပ်အကိုင်ရှာဖွေရေး အေဂျင်စီတစ်ခုက မြန်မာအလုပ်သမား ၃၀၀ ကို ထိုင်းနိုင်ငံက မုန့်မျိုးစုံ ထုတ် လုပ်တဲ့စက်ရုံမှာ အလုပ်ရမယ်ဆိုပြီး စာချုပ်ချုပ်ခဲ့ပေမယ့် အခုချိန်ထိ အလုပ်မရသေးဘူးလို့ မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ်က ပြောပါတယ်။
အလုပ်ရဖို့ တစ်ဦးကို ငွေကျပ် ၅ သိန်းစီပေးခဲ့ရပြီး လက်ရှိ မြဝတီမြို့မှာ အခက်အခဲတွေ့နေကြတယ်လို့ မြန်မာနိုင်ငံ လုံးဆိုင်ရာ အလုပ်သမားသမဂ္ဂများအဖွဲ့ချုပ် ရွှေ့ပြောင်းအလုပ်သမားဌာနဌာနမှူး ဒေါ်ထွေးထွေးသိန်း က ပြော ပါတယ်။
''သူတို့စာချုပ်ချုပ်ထားတဲ့ အထဲမှာကျတော့ ပို့မယ့်စက်ရုံကတော့ မုန့်မျိုးစုံလုပ်မယ့်လုပ်ငန်းလို့ ပြောတယ်၊ ရှိတဲ့နေရာကကျတော့ စမွတ်စခွန်မှာ၊ သွားခါနီးကျတော့ ကြက်စာစက်ရုံ ဒါမှမဟုတ် ကြာဇံစက်ရုံမှာ လုပ်ချင်တဲ့သူ ကုမ္ပဏီမှာ ခေါ်ပြီးတော့မှ ဝန်ခံကတိလက်မှတ်ထိုးခိုင်းတယ်၊ ကျွန်မတို့အလုပ်သမားတွေကို မေးကြည့် သလောက်တော့ သူတို့တစ်ယောက်ကို ငါးသိန်း ပေးထားရတယ်''
အဲဒီအလုပ်သမား ၃၀၀ ကို ပြီးခဲ့တဲ့ စက်တင်ဘာလ ၁၄ ရက်နေ့ကတည်းက မြဝတီမြို့ကို ပို့ဆောင်ပေးခဲ့တာဖြစ်ပြီး ထိုင်းနိုင်ငံ စမွတ်စခုံခရိုင်က မုန့်မျိုးစုံထုတ်လုပ်ရေးစက်ရုံကို ပို့ဆောင်ပေးမယ်လို့ ပြောပြီး လူထိပ်မိုးအေဂျင်စီ က ခေါ်ယူခဲ့တာဖြစ်ပါတယ်။
အဲဒီစက်ရုံက အလုပ်သမားအသစ် လက်မခံနိုင်တော့တဲ့အတွက် တစ်ခြားစက်ရုံတွေမှာ အလုပ်ရှာပေးမယ် လို့ မြန်မာအလုပ်သမားတွေကို ပြောကြောင်းလည်း သိရပါတယ်။
အလုပ်မရခင် ပြန်မယ်ဆိုရင် ခံဝန်လက်မှတ်ထိုးပြီး ပြန်နိုင်ကြောင်း အဲဒီအေဂျင်စီ တာဝန်ရှိသူတွေက အလုပ် သမားတွေကို ပြောထားပါတယ်။