ဟံသာဝတီ ဦးအုန်းကြိုင်ကို သတင်းမီဒီယာကောင်စီဥက္ကဋ္ဌ တင်မြှောက်

• 
  2018-09-08

သတင်းမီဒီယာကောင်စီ ဥက္ကဋ္ဌ ရာထူးတာဝန်ကို သတင်းစာဆရာကြီး ဟံသာဝတီ ဦးအုန်းကြိုင်ကို ဒီနေ့ ရွေးချယ် တင်မြှောက်လိုက်ပါတယ်။

ရန်ကုန်မြို့ အလုံလမ်းမှာရှိတဲ့ Summit Park View ဟိုတယ်မှာ ဒီနေ့ကျင်းပတဲ့ သတင်းမီဒီယာကောင်စီ အလုပ် အမှုဆောင်အဖွဲ့ဝင် ရွေးချယ်ပွဲကနေ ရွေးချယ်လိုက်တာဖြစ်ကြောင်း သတင်းမီဒီယာကောင်စီအဖွဲ့ဝင် ဒေါ်သင်းသင်းသာ က RFA ကို ပြောပါတယ်။

"ဥက္ကဋ္ဌက ဟံသာဝတီ ဦးအုန်းကြိုင်၊ ဒု ဥက္ကဋ္ဌ (၁) က ဆရာ ဒေါက်တာ မျိုးသန့်တင်၊ ဒုတိယ ဥက္ကဋ္ဌ (၂) က ဦးကျော်နိုင် (ထက်မြတ်)၊ လောလောဆယ် ရွေးပြီးသွားတာက အတွင်းရေးမှူးက ဦးကျော်စွာမင်း၊ တွဲဖက်အတွင်းရေးမှူး (၁) က ဦးမြင့်ကျော်၊ တွဲဖက်အတွင်းရေးမှူး (၂) က ကိုသာလွန်ဇောင်းထက်။ ဆက်ပြီးတော့ စာရင်းစစ် နဲ့ ဘဏ္ဍာရေးမှူး ဆက်ရွေးနေတယ်ပေါ့နော်"

ဒုတိယ ဥက္ကဋ္ဌ ၁ အဖြစ် ဒေါက်တာ မျိုးသန့်တင်၊ ဒုတိယ ဥက္ကဋ္ဌ ၂ ဦးကျော်နိုင် (ထက်မြတ်)၊ အတွင်းရေးမှူး ဦးကျော်စွာမင်း၊ တွဲဖက်အတွင်းရေးမှူး ၁ ဦးမြင့်ကျော်၊ တွဲဖက်အတွင်းရေးမှူး ၂ သာလွန်ဇောင်းထက်နဲ့ ဘဏ္ဍာရေးမှူး၊ စာရင်းစစ်ဆိုပြီး စုစုပေါင်း အမှုဆောင်အဖွဲ့ဝင် ၈ ဦးကို ရွေးချယ်တင်မြှောက်ခဲ့တာဖြစ်ပါတယ်။

နိုင်ငံတော် သမ္မတ၊ ပြည်သူ့လွှတ်တော် နဲ့ အမျိုးသားလွှတ်တော် ဥက္ကဋ္ဌ တို့က အဆိုပြုထားတဲ့ သတင်းမီဒီယာ ကောင်စီအဖွဲ့ဝင် ၁ ဦးစီနဲ့ သတင်းမီဒီယာနယ်ပယ်အသီးသီးကို ကိုယ်စားပြု ရွေးချယ်ခံထားရသူတွေအပါအဝင် စုစုပေါင်း ၂၉ ဦးထဲက အလုပ်အမှုဆောင် အဖွဲ့ဝင် ၈ ဦးကို ရွေးချယ်ခဲ့တာပါ။

ဒီနေ့ ရွေးချယ်တင်မြှောက်လိုက်တဲ့ သတင်းမီဒီယာကောင်စီ အမှုဆောင်အဖွဲ့စာရင်းကို နိုင်ငံတော် သမ္မတ ထံ ပေးပို့ပြီး အတည်ပြုချက် ရယူရမှာဖြစ်ပါတယ်။

သတင်းမီဒီယာ ကောင်စီ ဥက္ကဋ္ဌ အဖြစ် ရွေးချယ်တင်မြှောက်ခံရတဲ့ ဟံသာဝတီ ဦးအုန်းကြိုင်ဟာ ၁၉၄၅ ခုနှစ်မှာ ဟံသာဝတီ သတင်းစာတိုက်မှာ စတင်ဝင်ရောက်လုပ်ကိုင်ခဲ့သူဖြစ်သလို ပဉ္စမအကြိမ် အမျိုးသား သတင်းဆု ပေးအပ်ပွဲမှာ သတင်းသူရဲကောင်းဆု ရရှိခဲ့သူဖြစ်ပါတယ်။