တပ်မတော်က သိမ်းယူထားတဲ့ မွန်ပြည်သစ်ပါတီ စခန်းကိုပြန်ပေး
တပ်မတော်က သိမ်းယူထားတဲ့ မွန်ပြည်သစ်ပါတီထိန်းချုပ်တဲ့ ဂျပန်ရေတွင်းစခန်းကို ပြန်လည်ပေးအပ်ခဲ့မယ့် အဲ့ဒီစခန်းနဲ့ ကိုက် ၃၀၀ အကွာက ဟင်္သာတိုင်ဂိတ်မှာ ဆက်လက်နေရာယူထားတယ်လို့ မွန်ပြည်သစ်ပါတီ ဗဟိုကော်မတီဝင် နိုင်အောင်မငေးက ပြောပါတယ်။
-
ကျော်လွင်ဦး
2019-12-10 -
-
-
Your browser doesn’t support HTML5 audio
တပ်မတော်က သိမ်းယူထားတဲ့ မွန်ပြည်သစ်ပါတီထိန်းချုပ်တဲ့ ဂျပန်ရေတွင်းစခန်းကို ပြန်လည်ပေးအပ်ခဲ့မယ့် အဲ့ဒီစခန်းနဲ့ ကိုက် ၃၀၀ အကွာက ဟင်္သာတိုင်ဂိတ်မှာ ဆက်လက်နေရာယူထားတယ်လို့ မွန်ပြည်သစ်ပါတီ ဗဟိုကော်မတီဝင် နိုင်အောင်မငေးက ပြောပါတယ်။
တပ်မတော်နဲ့ မွန်ပြည်သစ်ပါတီ တပ်တွေ နီးနီးကပ်ကပ် ရှိနေတာကြောင့် ဒေသခံ စစ်ဘေးဒုက္ခသည်တွေဟာ သူတို့ကျေးရွာကို အားလုံးမပြန်ရဲသေးကြဘူးလို့ ကူညီဆောင်ရွက်ပေးသူတွေက ပြောပါတယ်။
ပြီးခဲ့တဲ့ရက်ပိုင်းက ကရင်ပြည်နယ် ဘုရားသုံးဆူမြို့နယ် ဂျပန်ရေတွင်းကျေးရွာနားမှာ တပ်မတော်နဲ့ မွန်ပြည်သစ် ပါတီတို့ ပစ်ခတ်မှုတွေဖြစ်ခဲ့ပြီး မွန်ပြည်သစ်ပါတီစခန်းကို တပ်မတော်က သိမ်းယူခဲ့ပါတယ်။
ဒီလိုသိမ်းယူခဲ့တဲ့ ဂျပန်ရေတွင်းက မွန်ပြည်သစ်ပါတီစခန်းကို တပ်မတော်က ပြန်ပေးခဲ့ပေမယ့် အဲစခန်းနဲ့ ကိုက် ၃၀၀ အကွာမှာ တပ်မတော်ဘက်က တပ်စွဲထားတယ်လို့ မွန်ပြည်သစ်ပါတီဗဟိုကော်မတီဝင် နိုင်အောင်မငေးက ပြောပါတယ်။
“ အခုလောလောဆယ်တော့ တပ်ကနေပြီးတော့ ဟင်္သာတိုင်စခန်းနားမှာရှိနေတုန်းဘဲ၊ အဲဒီနားက စခန်းတစ်ခု မှာလည်း ရှိနေတုန်းဘဲ၊ နှစ်နေရာခွဲပြီး နေနေတယ်ပေါ့၊ ဒီလို့လက်နက်ကိုင်နှစ်ဖွဲ့ဟာ ကိုက် ၃၀၀အကွာ မှာ နီးနီးကပ်ကပ်ရှိနေတော့ စိုးရိမ်စရာပေါ့နော် အကုန်လုံးတော့ မပြောနိုင်သေးဘူး၊ အခုထိတော့ ဂျပန်ရေတွင်း ပြန်ရောက်ကတည်းက ငြိမ်သက်နေတုန်းဘဲ”
မွန်ပြည်သစ်ပါတီနဲ့ တပ်မတော်တို့ ပစ်ခတ်မှုတွေကြောင့် ဂျပန်ရေတွင်းအပါအဝင် ကျေးရွာ ၃ ရွာလောက်က စစ်ဘေးဒုက္ခသည် တစ်ထောင်နီးပါးဟာ ထိုင်းနိုင်ငံဘက်ကို ထွက်ပြေးခဲ့ရပါတယ်။
မွန်ပြည်သစ်ပါတီက ဂျပန်ရေတွင်းကို ပြန်လည်ရယူပြီး နောက်နေ့မှာဘဲ ထိုင်းနိုင်ငံဘက်က စစ်ဘေးဒုက္ခသည် စခန်းကို ပိတ်သိမ်းလိုက်ပါတယ်။
ဒါပေမယ့် တပ်မတော်နဲ့ မွန်ပြည်သစ်ပါတီ လက်နက်ကိုင်နှစ်ဖွဲ့ဟာ ကိုက် ၃၀၀ အကွာမှာ နီးနီးကပ်ကပ် ရှိနေတာကြောင့် တိုက်ပွဲတွေ ပြန်ဖြစ်မှာစိုးရိမ်ပြီး ဒေသခံရွာသား ထက်ဝက်ကျော်ဟာ နေအိမ်မပြန်ရဲကြသေးဘဲ နယ်စပ်မှာဘဲ ရှိနေသေးတယ်လို့ သူတို့ကိုအကူညီပေးနေတဲ့ မွန်လူ့အခွင့်ရေးဖောင်ဒေးရှင်းအဖွဲ့က နိုင်ကဆော့မွန်ကပြောပါတယ်။
“မွန်တပ်ကတော့ သူတို့အရင်နေတဲ့နေရာကို ပြန်ရောက်သွားပြီပေါ့နော်၊ သူတို့နေတဲ့နေရာနဲ့ ကိုက် ၃၀၀ လောက်အကွာမှာ စစ်တပ်ကလည်း တပ်ချတုန်းဘဲ၊ အင်အား၂၀လောက်နဲ့ ခလရ ၂၈၃က အခြေချထား တုန်းဘဲဆိုတော့ ရွာသားတွေက အားလုံးတော့မပြန်ရဲသေးဘူး၊ တပ်နှစ်ဘက်က ဒီလိုမျိုး နီးနီးကပ်ကပ် ဖြစ်နေတော့ ရွာသားတွေကြောက်နေတာ တိုက်ပွဲပြန်ဖြစ်မှာ သူတို့စိုးရိမ်နေတာ”
မွန်ပြည်သစ်ပါတီ ဂျပန်ရေတွင်းစခန်းနားမှာ တပ်မတော်က တပ်စွဲထားတယ်ဆိုတာနဲ့ ပတ်သက်ပြီး အရှေ့တောင်တိုင်း စစ်ဌာနချုပ်တိုင်းဦးစီး ဗိုလ်မှူးကြီး မောင်မောင်လတ်ကို မေးမြန်းရာမှာတော့ NCA စာချုပ် ထဲမှာပါတဲ့ နေရာတွေကို ဒီဇင်ဘာလ ၃ ရက်နေ့ထဲက ပြန်ပေးထားကြောင်း RFA ကို ဒီနေ့ ပြောပါတယ်။
“ကျနော်တို့က NCA စာချုပ်မှာပါတဲ့နေရာတွေကို သူတို့နေရာသူတို့ ပြန်ပေးထားတယ်ဗျ၊ NCA စာချုပ်မှာပါတဲ့ ဂျပန်ရေတွင်းက သူတို့ ခွဲရုံးစိုက်တဲ့နေရာ ဖြစ်ပါတယ်ဗျ၊ ဟင်္သာတိုင်က NCA စာချုပ်မှာ သူတို့နေရာ မဟုတ်ဘူးလေ”
မွန်ပြည်သစ်ပါတီဟာ တပ်မတော်နဲ့ ၁၉၉၆ ခုနှစ်ကတည်း အပစ်ရပ်ဖို့သဘောတူပြီးနောက်ပိုင်း တပ်မတော်နဲ့ ပစ်ခတ်မှုတွေ ဖြစ်ပွားခဲ့ခြင်းမရှိဘဲ NCA လက်မှတ်ရေးထိုးပြီး ပထမဆုံး ပစ်ခတ်မှုဖြစ်တာဖြစ်ပါတယ်။
တပ်မတော်အနေနဲ့ အခုလိုဆောင်ရွက်ချက်ဟာ NCA စာချုပ်အပေါ် တိုင်းရင်းသားတွေဘက်က ယုံကြည်မှု ကျဆင်းစေနိုင်တယ်လို့ မွန်အရပ်ဘက်အဖွဲ့က မင်းအောင်ထူးကပြောပါတယ်။
“ငြိမ်းချမ်းရေး လိုလားလို့ဖြစ်စေ၊ အခြေအနေ အကြောင်းကြောင်းကြောင့် ဖြစ်စေ၊ တိုင်းရင်းသားလက်နက်ကိုင် တွေကတော့ ပြဿနာမကြီးကြဘူးလို့ ကျနော်ကတော့ ထင်တယ်၊ NCA ကတော့ လမ်းကြောင်းတစ်ခုရှိနေလို့ အားလုံးကဝင်ပါနေရတာ၊ ဒါပေမဲ အပေါ်မှာ တပ်ရဲ့ ပြုမှုပုံတွေက အားလုံးရဲ့ ယုံကြည်မှုကို တဖြည်းဖြည်း ပျက်လာစေတယ်လို့ ကျနော်ကတော့ အဲလို့မြင်တယ်”
အဲဒီနေရာဟာ ထိုင်း၊ မြန်မာနယ်စပ် ဘုရားသုံးဆူနားမှာရှိပြီး နှစ်နိုင်ငံနယ်ခြားမျဉ်း မသတ်မှတ်ရသေးတဲ့ နေရာ တချို့ ကျန်နေပါသေးတယ်။
အဲဒီနေရာကို တပ်မတော်ဘက်က လာချင်တယ်လို့ နိုဝင်ဘာလ ၂၅ ရက်နေ့က မွန်ပြည်သစ်ပါတီဆက်ဆံရေးရုံးကို အကြောင်းကြားတဲ့အတွက် မွန်ပြည်သစ်ပါတီ ဆက်ဆံရေးရုံး တာဝန်ခံက ဗဟိုကော်မတီကိုတင်ပြခဲ့ပြီး တပ်ပုံစံနဲ့ မဟုတ်ဘဲ အရပ်ဝတ်နဲ့ သွားခွင့်ပြုခဲ့တယ်လို့ဆိုပါတယ်။
ဒါပေမဲ့ ၂၇ ရက်နေ့မှာ တပ်မတော်ဘက်က စစ်လက်နက်အပြည့်အစုံနဲ့ ကရင်ပြည်နယ် နယ်ခြားစောင့် BGF တပ်ဖွဲ့ဝင်တွေနဲ့အတူ ရောက်သွားတဲ့အတွက် မွန်ပြည်သစ်ပါတီရဲ့ တပ်ရင်း (၅) အဖွဲ့ဝင်တွေက စပစ်ပြီး နှစ်ဖက်တိုက်ပွဲ ဖြစ်ခဲ့တာလို့သိရပါတယ်။
ပစ်ခတ်မှုတွေဖြစ်ပြီးနောက်မှာ မွန်ပြည်သစ်ပါတီဘက်က စတင်ပစ်ခတ်ခဲ့တဲ့ ဂျပန်ရေတွင်းရွာ မွန်ပြည်သစ်ပါတီ ဂိတ်ကို တပ်မတော်က သိမ်းဆည်းခဲ့တာဖြစ်ပါတယ်။
ဒီကိစ္စတွေကိုဖြေရှင်းဖို့အတွက် အရပ်သားကိုယ်စားလှယ်တွေပါဝင်တဲ့ ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲ စောင့်ကြည့်ရေးကော်မတီ JMC(s) က ပဋိပက္ခဖြစ်တဲ့နေရာကို ဒီလအတွင်းသွားရောက်စစ်ဆေးဖို့ ပြင်ဆင် နေပြီး တွေ့ရှိချက်တွေကို NRPC နဲ့ JMC(U)ကို တင်ပြသွားဖို့ရှိတယ်လို့ နိုင်အောင်မငေးက ပြောပါတယ်ခင်ဗျာ။