ရတနာပုံတက္ကသိုလ်ပါမောက္ခချုပ်ကို အရေးယူပေးဖို့ ဗကသကျောင်းသားတွေ စာပို့မည်

• 
  2018-12-13

ကျောင်းအတွင်း လုံခြုံရေး တာဝန်ယူပေးရေး အပါအဝင် တောင်းဆိုထားတဲ့ အချက် ၃ ချက်ကို ဖြေရှင်းပေးတာ မရှိတဲ့အတွက် ပါမောက္ခချုပ်ကို အရေးယူပေးဖို့ သက်ဆိုင်ရာဝန်ကြီးဌာနကို ဒီနေ့ စာပေးပို့သွာမယ်လို့ တက္ကသိုလ် ဗကသက စည်းရုံးရေးမှူး ကိုရဲမျိုးဆွေက ပြောပါတယ်။

အဲဒီတောင်းဆိုချက်တွေ ပြုလုပ်မပေးရင် နေ့စဉ်ဆန္ဒပြပွဲတွေ ဆက်လုပ်သွားမယ်လို့လည်း ရတနာပုံ တက္ကသိုလ်ကျောင်းရှေ့မှာလုပ်တဲ့ ဒီနေ့ ဆန္ဒပြပွဲအပြီးမှာ ပြောပါတယ်။

တက္ကသိုလ် ဆရာ၊ ဆရာမတွေကို ကျောင်းတွင်းလုံခြုံရေးစောင့်ခိုင်းတာဟာ လုံးဝမဖြစ်သင့်တဲ့အတွက် အခုလို တိုင်ကြားတာဖြစ်တယ်လို့လည်း ကိုရဲမျိုးဆွေက ပြောပါတယ်။

ကျောင်းတွင်းလုံခြုံရေး တာဝန်ယူပေးရေး၊ သန့်ရှင်းရေးဝန်ထမ်းတွေကို တိုးမြှင့်ခန့်ထားပေးရေးနဲ့ ပျက်စီးနေတဲ့ သန့်စင်ခန်းတွေကို အမြန်ဆုံးပြုပြင်ပေးရေးအတွက် ဗကသ ကျောင်းသားတွေက တောင်းဆိုနေတာဖြစ်ပြီး ဒီနေ့  ၄ ကြိမ်မြောက် ဆန္ဒပြတာဖြစ်ပါတယ်။

ဒီ ၂၀၁၇ နဲ့ ၂၀၁၈ ခုနှစ်အတွင်းမှာ ရတနာပုံတက္ကသိုလ်ကျောင်းက ကျောင်းသားတွေရဲ့ တန်ဖိုးမြင့် ယိုးဒယား ဆိုင်ကယ် အစီး ၇၀ ကျော် ပျောက်ဆုံးခဲ့တယ်လို့ သိရပါတယ်။

ဒီသတင်းကို RFA သတင်းထောက် မခေမဏီဝင်း ပေးပို့လိုက်တာပါ။