မစုစုနွေးနဲ့ တောင်သူတွေအပေါ် စွဲဆိုထားတဲ့အမှုတွေ ရုပ်သိမ်းပေး

• 
  2016-04-26

မန္တလေးတိုင်းဒေသကြီး ပြင်ဦးလွင်မြို့နယ်တရားရုံးမှာ တရားမဝင် စီတန်းလှည့်လည်မှု ဆိုင်ရာ ပုဒ်မ ၁၈ နဲ့ တရားစွဲဆိုခံထားရတဲ့ မစုစုနွေး အပါအဝင် ၉ ဦးကို တရားလိုဘက် က အမှုကို ရုပ်သိမ်းပေးလိုက်ပါတယ်။

ပြီးခဲ့တဲ့ ဧပြီလ ၈ ရက်နေ့က အမှုတွေ ရုပ်သိမ်းလိုက်တာဖြစ်ပေမယ့် ဘယ်သူ့ကိုမှ အကြောင်းမကြားတာကြောင့် ဒီကနေ့ ရုံးချိန်းသွားချိန်မှ သိခဲ့ရတာ လို့ မြန်မာနိုင်ငံ တောင်သူလယ်သမားသမဂ္ဂ ဥက္ကဌ မစုစုနွေးက ပြောပါတယ်။

"ပုဒ်မ ၁၈ နဲ့ ၈ ရက်နေ့က ရုပ်သိမ်းလိုက်ပြီဆိုတာကို ကျမအပါအဝင် ၉ ယောက်လုံးကို တစ်ယောက်မှ အကြောင်းမကြားပါဘူး၊ ဒီနေ့မနက် တရားရုံးကို သွားတဲ့အခါကျတော့ ၈ ရက်နေ့တည်းက အမှုကိုရုပ်သိမ်း လိုက်လို့ တရားရုံးကို လာစရာမလိုတော့ဘူး လို့ပြော တယ်၊ တရားရုံးကချမှတ်လိုက်တဲ့အမိန့်ကိုပဲ ကူးပြီးပြန် ပါလို့ပြောတယ်၊ ကျမတို့ ပုဒ်မ ၁၈ ကို ရဲဘက်က ရုပ်သိမ်းလိုက်တဲ့ကိစ္စပေါ့နော်၊ ကျမတို့က တရားသေလား၊ တရားရှင် လားလို့မေးတယ်၊ တရားသူကြီးက ၄၉၄ ( က )အရ၊ ကျမတို့က အာမခံယူထားတဲ့သူတွေဖြစ်တဲ့ အတွက် တရားရှင်လွှတ်တာပါလို့ပြောတယ်"

၂ဝ၁၄ ခုနှစ် မေလက ပြင်ဦးလွင်မြို့နယ် ထုံးဘိုကျေးရွာမှာ အသိမ်းခံထားရတဲ့ လယ်ယာမြေတွေထဲ ဝင်ရောက် တဲ့တောင်သူ ၅ ဦး ရိုက်နှက်ခံရတာနဲ့ ပတ်သက်ပြီး တရားခံကို စုံစမ်းဖော်ထုတ်ပေးဖို့ ဆန္ဒပြတောင်းဆိုတာကြောင့် မစုစုနွေးအပါအဝင် ဒေသခံတောင်သူ ၉ ဦးကို ပြင်ဦးလွင်မြို့နယ် ရဲတပ်ဖွဲ့မှူးရုံးက ရဲမှူးမြင့်သိန်းက တရားလိုလုပ်ပြီး ပုဒ်မ ၁၈နဲ့ တရားစွဲဆိုခဲ့တာ ဖြစ်ပါတယ်။

အမှုနဲ့ပတ်သက်ပြီး တရားလိုပြသက်သေ ၁၇ ဦးရှိတဲ့အထဲက သက်သေ ၂ ဦးကို စစ်ဆေးပြီးချိန်မှာ တရားစွဲဆိုထား တာကို ရုပ်သိမ်းလိုက်တာ ဖြစ်ပါတယ်။