ထိုင်းရောက် မြန်မာအလုပ်သမားတွေကြား ကိုဗစ်ကူးစက်မှု မြင့်တက်နေဆဲ

• လုဆိုင်း
  2021-01-07

ထိုင်းနိုင်ငံမှာ အနီရောင်အဆင့် သတ်မှတ်ထားတဲ့ စမွတ်ဆာခွန်ခရိုင် မဟာချိုင်က မြန်မာရွှေ့ပြောင်းလုပ်သားတွေကြား၊ ကိုဗစ်ရောဂါပိုး ကူးစက်မှုတွေ မြင့်တက်နေဆဲ ဖြစ်ပြီး ပိုးတွေ့ မြန်မာရွှေ့ပြောင်းအလုပ်သမား တစ်ထောင်ကျော်လောက်ကို ယာယီကုသဆောင်မှာ စောင့်ကြည့်စစ်ဆေးနေပါတယ်။

မြဝတီမြို့ တဖက်ကမ်း မဲဆောက်မြို့ အပါအဝင် ခရိုင်တခုလုံးကိုလည်း ဇန်နဝါရီ လ ၃၁ ရက်နေ့ထိ အသွားအလာ ကန့်သတ်ထားဆဲ ဖြစ်ပါတယ်။ မဲဆောက်မြို့မှာ ကိုဗစ်ပိုးကူးစက်သူ ၁၇ ဦးအထိ ရှိလာခဲ့လို့ မြို့ကို အနီရောင်အဆင့်ထိ သတ်မှတ်ထားပါတယ်။ ကူးစက်ခံရသူတွေထဲမှာ မြန်မာရွှေ့ပြောင်း အလုပ်သမားတွေ အများဆုံး ပါဝင်နေပါတယ်။

မဲဆောက်အပါအဝင် ၂၈ ခရိုင်ကို အသွားအလာကန့်သတ်ထားပေမယ့် ထိုင်းမြန်မာနယ်စပ် မြဝတီ-မဲဆောက် ချစ်ကြည်ရေး တံတားပေါ်ကနေ နှစ်နိုင်ငံကုန်စည် စီးဆင်းမှုတွေတော့ ပုံမှန်ရှိနေကြောင်း သိရပါတယ်။

ထိုင်းနိုင်ငံဟာ ကိုဗစ်ရောဂါကူးစက်မှု ပထမလှိုင်းကို အကောင်းဆုံး ကာကွယ်ထိန်းချုပ်နိုင်ခဲ့ပြီး သေဆုံးသူ ၅၉ ဦးသာ ရှိခဲ့ပေမယ့် အခုဒုတိယလှိုင်းမှာ ဒီနေ့အထိ ကူးစက်မှု ကိုးထောင်ကျော်ရှိခဲ့ပြီး ခုနှစ်ဦး သေဆုံးခဲ့ပါတယ်။

ထိုင်းနိုင်ငံမှာ ဇန်နဝါရီလ ၇ ရက်နေ့က ကိုဗစ်ရောဂါပိုး တွေ့ရှိသူ လူနာသစ် ၃၀၅ ဦး ရှိပြီး ၁၉၃ ဦးမှာ ပြည်တွင်းကူးစက်မှု ဖြစ်ပါတယ်။ ကူးစက်ခံရသူ စုစုပေါင်း ၉၆ဝဝကျော်ရှိပြီး သေဆုံးသူ ၆၇ ဦးအထိ ရှိလာ ခဲ့ပါတယ်။