တပ်မတော်သားတွေကို သူခိုး၊ ဓားပြလို့ ရေးတာကြောင့် ဦးသောဘိတကို တိုင်ကြား

• 
  2019-05-23

တပ်မတော်သားအားလုံးကို သူခိုး၊ ဓားပြ၊ သူပုန်တွေ ဆိုပြီး ရေးသားချက်နဲ့ပတ်သက်လို့ ဆရာတော် ဦးသောဘိတ(အလင်္ကာကြယ်) ကို တပ်မတော်က နိုင်ငံတော်အကြည်ညိုပျက်စေမှု ပုဒ်မ ၅၀၅(ခ) နဲ့ အရေးယူပေးဖို့ အမရပူရမြို့နယ်တရားရုံးထံ လျှောက်ထားတာလို့ တရားလိုဖြစ်သူက ဒီနေ့ ပြောလိုက်ပါတယ်။

တပ်မတော်သားအားလုံးဟာ နိုင်ငံ့ဝန်ထမ်းဖြစ်တာကြောင့် နိုင်ငံတော်အစိုးရကို စော်ကားသလိုဖြစ်နေတယ်လို့ တရားလိုဖြစ်တဲ့ အလယ်ပိုင်းတိုင်းစစ်ဌာနချုပ်က ဒုတိယဗိုလ်မှူးကြီး အောင်မျိုးကျော်က ဒီနေ့ ရုံးချိန်းအပြီးမှာ သတင်းထောက်တွေကို ပြောပါတယ်။

တပ်မတော်က နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)နဲ့ ဆရာတော် ဦးသောဘိတ (အလကာၤကြယ်) ကို အရေးယူပေးဖို့ အလယ်ပိုင်းတိုင်းစစ်ဌာနချုပ်က ဒုတိယဗိုလ်မှူးကြီး အောင်မျိုးကျော်က တရားရုံးထံ တင်ထားပေမယ့် လိုအပ်ချက်တွေ ရှိနေတာကြောင့် တရားရုံးက ရဲတပ်ဖွဲ့ကို စစ်ဆေးခိုင်းထားတယ်လို့ သိရပါတယ်။

ဒါနဲ့ပတ်သက်လို့ လာမယ့် ဇွန်လ ၆ရက်နေ့မှာ အမရပူရမြို့နယ်တရားရုံးက ဆုံးဖြတ်မယ်လို့ သိရပါတယ်။

ဆရာတော်ကို အလယ်ပိုင်းတိုင်းစစ်ဌာနချုပ်က ဒုတိယဗိုလ်မှူးကြီးမျိုးခိုင်ဝင်း ကလည်း ဆက်သွယ်ရေးဥပဒေပုဒ်မ ၆၆ (ဃ) နဲ့ အမှုဖွင့်ထားပါတယ်။

ဆရာတော်ကို အရင်စွဲဆိုထားတဲ့ ဆက်သွယ်ရေးဥပဒေပုဒ်မ ၆၆ (ဃ) အမှုမှာ တရားလိုဖြစ်တဲ့ အလယ်ပိုင်းတိုင်း စစ်ဌာနချုပ်က ဒုတိယဗိုလ်မှူးကြီးမျိုးခိုင်ဝင်း ကို တပ်မတော်က ကိုယ်စားလှယ်လွဲှစာပေးပို့တာ နောက်ကျခဲ့တဲ့ အတွက် စစ်ဆေးချိန်မှာ တင်ပြနိုင်ခဲ့ခြင်းမရှိဘူးလို့ သိရပါတယ်။

ဒီအပေါ်မှာ ဆရာတော်ဘက်က ကန့်ကွက်ထားပေမယ့် ဆရာတော့်ရဲ့ကန့်ကွက်မှုကို ခရိုင်တရားရုံးက ပယ်ချခဲ့ ပါတယ်။ ဒါကြောင့် တိုင်းတရားရုံးထံ ဆက်လက်တင်ပြကန့်ကွက်သွားမယ်လို့ ရှေ့နေ ဒေါ်ရွက်နုအောင်က ပြောပါတယ်။

လူမှုကွန်ယက်စာမျက်နှာမှာ ဆရာတော်ဦးသောဘိတရဲ့ ရေးသားချက်တွေက တပ်မတော်နဲ့ တပ်မတော်သားတွေ အပေါ် ဂုဏ်သိက္ခာကျဆင်းစေတဲ့ ပုတ်ခတ်ရေးသားမှုတွေဖြစ်တယ်ဆိုပြီး ဆရာတော်ဟာ ၂၀၁၈ ခုနှစ် စက်တင်ဘာ လကတည်းက ဆက်သွယ်ရေးဥပဒေပုဒ်မ ၆၆(ဃ) နဲ့ တရားရင်ဆိုင်နေရတာဖြစ်ပါတယ်။