၄၈ ဦး ဆွေးနွေးပွဲ NLD ထုတ်ပြန်တဲ့အကြောင်း မေးမြန်းချက်

နိုင်ငံ့အကြီးအကဲတွေနဲ့ မနေ့က တွေ့ဆုံဆွေးနွေးရာမှာ အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်က ပြည်ထောင်စုအစိုးရအနေနဲ့ ဖွဲ့စည်းပုံ အခြေခံဥပဒေပြင်ဆင်ရေးအပေါ် ဆန္ဒထက်သန်မှုမရှိကြောင်းနဲ့ ၆ပွင့်ဆိုင်တွေ့ဆုံဆွေးနွေးပွဲ ကျင်းပပေးဖို့ကို ရှောင်ရှားခြင်း မပြုသင့်ကြောင်း ဆွေးနွေး ခဲ့တယ်လို့ အန်အယ်လ်ဒီပါတီက ဒီနေ့ ကြေညာချက် ထုတ်ပြန်လိုက်ပါတယ်။

အန်အယ်လ်ဒီပါတီ ဗဟိုအလုပ်အမှုဆောင်ကော်မတီဝင် ဦးဉာဏ်ဝင်းကို RFA သတင်းထောက် ကိုကျော်သူ က ဆက်သွယ် မေးမြန်းထားပါတယ်။

အန်အယ်လ်ဒီပါတီ ဗဟိုအလုပ်အမှုဆောင်ကော်မတီဝင် ဦးဉာဏ်ဝင်းနဲ့ မေးမြန်းချက်အပြည့်အစုံ

ကျော်သူ။    ။ အန်ကယ်လ်တို့ ဒီနေ့ NLD ကစတိတ်မန့်ထုတ်တဲ့ဟာကလေ အဲ့ဒါနဲ့ ပတ်သက်ပြီးပြောပြပေးပါဦးဗျ။

ဦးဉာဏ်ဝင်း။        ။ ကျနော်တို့မနေ့ကတွေ့တာနဲ့ ပတ်သက်ပြီးတော့ ရှင်းလင်း ဖော်ပြတဲ့စာပါပဲ၊ ကျနော်တို့ ကြေညာချက်ထုတ်ရတဲ့ တကယ့်ရည်ရွယ်ချက် ကတော့ ပြည်သူတွေသိရအောင်လို့ တွေ့ဆုံတဲ့နေရာမှာ ဘာတွေလုပ်တယ်၊ ပြည်သူတွေ နားလည်ရအောင် ကျနော်တို့အရှိကို အရှိတိုင်း ကြေညာချက်ကို ထုတ်လိုက်တာပါ။

ကျော်သူ။    ။ ဒီခေါင်းစဉ်တစ်ခုမှာဆိုရင် ဒီမိုကရေစီအသွင်ကူးပြောင်းရေးနဲ့ ပြုပြင်ပြောင်းလဲမှုဆက်လက်ဖြစ်ထွန်းရေးအပေါ်မှာ ပြုပြင်ပြောင်းလဲလိုတဲ့ ဆန္ဒအား နည်းတယ်၊ နောက်ဖွဲ့စည်းပုံအခြေခံဥပဒေပြောင်းလဲရေးနဲ့ ပတ်သက်ပြီးတော့ ပြည်ထောင်စုအစိုးရက ဆန္ဒထက်သန်မှုမရှိတာတို့ အဲ့လိုမျိုးတွေပါတယ်ပေါ့လေ၊ အဲ့အပေါ်မှာရော အန်ကယ်လ်တို့ရဲ့သဘောထားက ဘယ်လိုလဲဗျ။

ဦးဉာဏ်ဝင်း။        ။ ဒီဟာတွေအကုန်လုံး အချက် ၃ ချက်နဲ့ပြနေတယ်၊ ဒီအချက် ၃ ချက်လုံးကကျနော်တို့ ဖိတ်စာစရတည်းက အဲ့ဒီပေါ်မှာပါလာတဲ့ အဓိက အချက်တွေကို ကျနော်တို့က ဆွေးနွေးပြီးတော့ ဒါပါတီတစ်ခုလုံးက သဘောထားလို့ပြောလို့ရပါတယ်။

ကျော်သူ။    ။ ဒီလိုတွေ့ဆုံမှုတွေဟာ ရှေ့ဆက်ပြီးတော့ နောက်လုပ်ဦးမယ်လို့ လဲပြောနေတယ်၊ နောက်ပိုင်းထပ်ပြီးတွေ့ဆုံမယ်ဆိုရင် အကျိုးရလာဒ်တွေ ဘယ်လိုဖြစ်လာနိုင်မလဲ အန်ကယ့်သုံးသပ်ချက်လေး သိပါရစေခင်ဗျာ။

ဦးဉာဏ်ဝင်း။        ။ ဒီလိုပုံစံမျိုးနဲ့ကတော့ အကျိုးရလာဒ်ကနဲနဲဝေးမယ်၊ ကျနော်တို့ဒီလိုပဲမြင်ပါတယ်၊ ဒါပေမယ့် နောက်ထပ်တွေ့ဆုံဖို့ ကျနော်တို့ ဆန့် ကျင်နေတာမဟုတ်ပါဘူး၊ အမြဲတမ်းကြိုဆိုတယ်၊ ဒီထက်ပိုမိုကောင်းမွန်တဲ့ ပုံစံနဲ့ ဆွေးနွေးပွဲမျိုးဖြစ်သင့်တယ်၊ အပြန်အလှန်ဆွေးနွေးပွဲ ဒီပေါ်ကနေပြီးတော့ အကောင်း ဆုံးရွေးယူတဲ့နည်း၊ ဒါမျိုးပဲကျနော်တို့လိုချင်တယ်၊ ချပေးတယ်၊ ဆွေးနွေးတယ်၊ ဒါပြီးရင်ပြန်ကြ၊ နောက်တစ်ခါ ပြန်တွေ့ ဒီလိုတော့ ကျနော်တို့ အချိန် ကြန့်ကြာမယ်၊ အကျိုးနည်းမယ် ဒီလိုတော့ ကျနော်တို့ထင်ပါတယ်။

ကျော်သူ။    ။ အန်တီကလဲပြောတယ်ပေါ့လေ၊ ၆ ပွင့်ဆိုင်တွေ့ဆုံဖို့တောင်းထားတယ်၊ ဒါပေမယ့် မနေ့ကဆိုရင် ၄၈ ဦး တွေ့ဆုံတယ်ပေါ့၊ လူတွေလဲအရမ်းများ သွားတယ်၊ အဲ့ဒီအပေါ်မှာရော အန်ကယ်တို့ ဘယ်လို့မြင်ပါလဲဗျ။

ဦးဉာဏ်ဝင်း။        ။ ကျနော်တို့အဲ့မှာပြောချင်တာက အပြန်အလှန်ဆွေးနွေးပြီးတော့ အရေးကြီးတဲ့အချက်တွေကို သဘောတူညီချက်ရမှ ကျနော်တို့ အမျိုး သားပြန်လည်ညှိနှိုင်းရေးကိုဖြစ်နိုင်မယ်၊ ဒီလိုမဟုတ်ပဲနဲ့ တွေ့ရုံ၊ ပြောရုံနဲ့တော့ တိုးတက်မှုအလွန်နည်းတယ်လို့ ပြောချင်ပါတယ်။

ကျော်သူ။    ။ ဟုတ်ကဲ့အန်ကယ်လ်၊ အခုလိုဖြေကြားပေးလို့ ကျေးဇူးတင်ပါတယ်။

ဦးဉာဏ်ဝင်း။        ။ ကောင်းပါပြီ၊ ကောင်းပါပြီ။