ལྡི་ལི་ནས་འཛིན་བཟུང་བྱས་བའི་བོད་མི་ལས་འགུལ་བ་རྣམས་གློད་བཀྲོལ་བཏང་འདུག

• 
  2018-10-24

ལྡི་ལིར་རྒྱ་ནག་གི་དཔོན་རིགས་སླེབས་སྐབས་ངོ་རྒོལ་བྱས་རྐྱེན་འཛིན་བཟུང་བྱས་བའི་བོད་མི་ལས་འགུལ་བ་རྣམས་ཉིན་དེར་གློད་བཀྲོལ་བཏང་འདུག
དེ་ཡང་རྒྱ་ནག་གཞུང་གི་སྤྱི་བདེ་ལས་ཁུངས་ཀྱི་བློན་ཆེན་ཀྲོ་ཁེ་ཀྲི་(Zhao Kezhi) དང་། རྒྱ་གཞུང་གིས་བོད་རང་སྐྱོང་ལྗོངས་ཞེས་འབོད་པའི་ས་ཁུལ་དེའི་འགོ་ཁྲིད་ཁག་ཅིག་ལྡི་ལིར་ཡོད་སྐབས།  ཚེས་༢༣་ཉིན་རྒྱ་ནག་གཞུང་ཚབ་མདུན་བོད་དོན་ཆེད་ངོ་རྒོལ་སྐད་འབོད་གནང་མཁན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་༣༥་འཛིན་བཟུང་བྱས་པ་རྣམས་ཉིན་དེའི་ཕྱི་དྲོ་གློད་གྲོལ་བཏང་འདུག
ཚེས་༢༣་ཉིན། བོད་ཀྱི་དབུས་གཞོན་ནུ་ལྷན་ཚོགས་ཀྱི་གོ་སྒྲིག་འོག་རྒྱལ་ས་ལྡི་ལིའི་རི་ཧི་ནི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་༣༥་ཡིས་བོད་རྒྱལ་ཁབ་ཆེན་པོའི་རྒྱལ་དར་འཕྱར་ནས་བོད་ནང་གི་ད་ལྟའི་ཛ་དྲག་གི་གནས་སྟངས་གསལ་ཁ་བཏོན་གནང་སྟེ་རྒྱ་མི་བོད་ནས་ཕྱིར་ལོག་དགོས་པ་དང་། འཛམ་གླིང་མི་མང་གིས་བོད་ལ་རྒྱབ་སྐྱོར་གནང་དགོས་པ་བོད་རང་བཙན་དགོས། བོད་ལ་རང་དབང་དགོས། བོད་མིར་ཞི་བདེ་དགོས་ཞེས་པ་སོགས་རྒྱ་ནག་གཞུང་གི་སྐུ་ཚབ་འཐུས་མིར་ངོ་རྒོལ་སྐད་འབོད་གནང་སྐབས་རྒྱ་གར་གྱི་ཉེན་རྟོག་མི་སྣས་འཛིན་བཟུང་གིས་སྣུམ་འཁོར་ནང་བླུགས་ནས་(Chanakyapuri)ཉེན་རྟོག་ལས་ཁུངས་ནང་དུས་ཡུན་ཕྱག་ཚོད་འགའ་ཤས་རིང་བཀག་ཉར་བྱས་པའི་རྗེས་སུ་གློད་གྲོལ་བཏང་འདུག

གསར་འགོད་པ་སེང་གེ་རི་བསོད་ནམས་ལྷ་མོ།