སྒེར་གྱིས་བདག་ཉར་བྱེད་པའི་དྲ་ལམ་སྟེང་དཔལ་འབྱོར་དང་འབྲེལ་བའི་གནས་ཚུལ་ཕྱིར་བསྒྲགས་སོགས་ལ་དོ་དམ་བྱ་རྒྱུ།

རོ་ཨི་ཀྲར་གསར་ལས་ཁང་གིས་གནས་ཚུལ་ནང་གསལ་ལྟར་ན། རྒྱ་ནག་གི་གློག་ལམ་དྲ་འབྲེལ་ལས་ཁང་ནས་ཉེ་སྔོན་སྤྱི་ཚོགས་དྲ་རྒྱའི་ཐོག་སྒེར་གྱི་བདག་ཉར་བྱས་པའི་དྲ་རྒྱ་ཁག་ནས་ཁྲིམས་འགལ་གྱི་སྒོ་ནས་དཔལ་འབྱོར་དང་འབྲེལ་བའི་གནས་ཚུལ་དང་། དཔལ་འབྱོར་དང་འབྲེལ་བའི་སྲིད་ཇུས་ལ་འཁྱོག་བཤད་དང་གོ་ནོར་གྱི་གནས་ཚུལ་བཀོད་སྤེལ་བྱས་སྟེ་མ་རྐང་ཁྲོམས་རར་རྡབ་སིག་བཟོ་ཡི་ཡོད་པའི་རྐྱེན་གྱིས་དྲ་རྒྱ་དེ་ཚོའི་ཐོག་ཞིབ་འཇུག་བྱ་རྒྱུ་ཡིན་པའི་བཀོད་ཁྱབ་བཏང་ཡོད་པ་རེད། ད་རེས་དྲ་རྒྱའི་བཟོ་ཚོང་ལས་ཁང་ཆེ་གྲས་ཚོས་དྲ་རྒྱའི་ཐོག་སྒེར་གྱི་བདག་ཉར་བྱས་པའི་སྤྱི་ཚོགས་དྲ་རྒྱ་ཁག་ལ་སྟངས་འཛིན་བྱ་རྒྱུ་ཐག་གཅོད་དེ་བཞིན་རྒྱ་གཞུང་གི་གསལ་བསྒྲགས་དང་སྟབས་བསྟུན་བྱས་ཡོད་པ་གསལ་འདུག རེས་གཟའ་སྤེན་པའི་ཉིན་Wechat སྐད་འཕྲིན་ཁེ་གཉེར་ལས་ཁང་གིས་སྤེལ་བའི་སྤྱི་བསྒྲགས་གནང་གསལ་ལྟར་ན། དེ་རིང་ནས་ཟུང་ཕྱི་ཟླ་༡༠པའི་ཚེས་༢༥བར་སྒེར་བདག་སྤྱི་ཚོགས་དྲ་རྒྱའི་ཐོག་ཞིབ་འཇུག་བྱ་རྒྱུ་མ་ཟད། དཔལ་འབྱོར་དང་འབྲེལ་བའི་གནས་ཚུལ་ཕྱིར་བསྒྲགས་དང་བཀྲོག་གཏམ་དེ་བཞིན་གནས་ཚུལ་འཁྱོག་བཤད་བྱ་མཁན་གྱི་སྤྱི་ཚོགས་དྲ་རྒྱ་ཡོངས་རྗོགས་སྒོ་བརྒྱབ་རྒྱུ་ཡིན་པ་བརྗོད་འདུག་ལ། དེ་བཞིན་Weibo དང་ Douyin, Kuaishou ་བཅས་དྲ་རྒྱའི་ཁེ་ལས་ཚོས་ཀྱང་དེ་མཚུངས་ཀྱི་གསལ་བསྒྲགས་སྤེལ་འདུག།
གསར་འགོད་པ། དོན་གྲུབ་རྣམ་རྒྱལ།
རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་སྤེལ་མཁན། ཡེ་ཤེས་བཀྲ་ཤིས།