ཉི་ཧོང་དུ་ནང་ཆོས་དང་ཚན་རིག་སྐོར་བཀའ་བསྡུར།

• 
  2011-11-04

༄༅༎སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ཚེས་༣ཉིན་ཉི་ཧོང་གིས་ཕྱི་དངོས་པོའི་འཕེལ་རྒྱས་དང་ ནང་སེམས་ཀྱི་བདེ་སྐྱིད་ཟུང་འབྲེལ་ཐུབ་ན་ ཨི་ཤི་ཡའི་མངའ་ཁུལ་དེ་བས་བདེ་ཐང་དང་བཞི་བདེ་བརྟན་ལྷིང་ལྡན་པ་ཞིག་སྐྲུན་ཐུབ་རྒྱུ་ཡིན་པ་བཀའ་སྩལ་གནང་བའི་སྐོར་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་འདུག་
༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ཚེས་༣ཉིན་ཉི་ཧོང་གི་ཕུ་ཇི་ཏ་ཀོ་ཀན་སློབ་གྲ་ཆེན་མོའི་སློབ་སྤྱིས་སྣེ་ཁྲིད་པའི་དཔོན་རིགས་རྣམས་དང་ལྷན་དུ་ནང་ཆོས་དང་ཚན་རིག་སྐོར་བཀའ་བསྡུར་གནང་ཡོད་པ་དང་ དེའི་ཐོག་༧གོང་ས་མཆོག་ནས་ མགོན་པོ་གང་ཉིད་ཕྱི་ལོ་༡༩༦༧ལོར་ཐོག་མར་ཉི་ཧོང་དུ་ཆིབས་བསྒྱུར་བསྐྱངས་པའི་སྐབས་ནས་བཟུང་ ཉི་ཧོང་དེ་བཞིན་ཕྱི་དངོས་པོའི་འཕེལ་རྒྱས་ཤུགས་ཆེ་ལྡན་པའི་ཁར་ རིག་གཞུང་ཕུན་གསུམ་ཚོགས་པའི་རྒྱལ་ཁབ་ཅིག་ཡིན་པར་བརྟེན་ཉི་ཧོང་གིས་ཕྱི་དངོས་པོའི་འཕེལ་རྒྱས་དང་ ནང་སེམས་ཀྱི་བདེ་སྐྱིད་གཉིས་ཟུང་འབྲེལ་བྱ་ཐབས་བྱ་དགོས་པ་དང་ ༧གོང་ས་མཆོག་ཉི་ཧོང་དུ་ཆིབས་བསྒྱུར་བསྐྱངས་པའི་སྐབས་ ནང་སེམས་ཀྱི་བདེ་སྐྱིད་བསྐྲུན་ཐབས་སྦྱོང་བརྡར་བྱ་རྒྱུར་འདོད་མོས་བྱེད་མཁན་ཇེ་མང་དུ་འགྲོ་བཞིན་འདུག་ཅེས་བཀའ་སྩལ་འདུག དེ་བཞིན་༧གོང་ས་མཆོག་ནས་མ་འོངས་ནང་ཆོས་སློབ་གཉེར་གནང་མཁན་དང་ ཉི་ཧོང་གི་ཀོ་ཡ་སན་སློབ་གྲ་ཆེན་མོའི་དབར་གོ་རྟོགས་སྤེལ་རེས་ཀྱི་ལས་རིམ་གོ་སྒྲིག་གནང་རྒྱུའི་དགོངས་འཆར་བཏོན་གནང་བ་དང་འབྲེལ་ བོད་མི་ཚོས་ནང་ཆོས་ཀྱི་ཤེས་ཡོན་དང་ ཉམས་མྱོང་ཉི་ཧོང་མི་མང་དང་མཉམ་སྤྱོད་བྱ་འདོད་ཆེན་པོ་ཡོད་པ་དང་ དེ་དང་ཕྱོགས་མཚུངས་ཁྱེད་ཚོང་ཀྱང་ང་ཚོ་དང་མཉམ་དུ་ཉམས་མྱོང་སྤེལ་རེས་བྱ་དགོས་ཀྱི་རེད་ཅེས་དང་  དེ་མིན་༧གོང་ས་མཆོག་ནས་ཉི་ཧོང་གི་གཞོན་སྐྱེས་ཚོར་དབྱིན་སྐད་སོགས་སྐད་ཡིག་གཞན་སྦྱོང་རྒྱུ་དེ་གལ་འགངས་ཆེན་པོ་ཡིན་པའི་དགོངས་འཆར་བཏོན་གནང་ཏེ་ ཉི་ཧོང་གི་གཞོན་སྐྱེས་ཚོས་དབྱིན་ཡིག་སློབ་སྦྱོང་བྱས་ནས་འཛམ་གླིང་ནང་གི་དབུལ་པོའི་ཡུལ་ཁག་ལ་ཕན་ཐོགས་པའི་ལས་དོན་སྤེལ་ཐུབ་བ་ཞིག་དགོས་པ་བཀའ་སྩལ་གནང་འདུག   ༧གོང་ས་༧སྐྱབས་མགོན་ཆེན་པོ་མཆོག་ནས་བཞུགས་ཞག་བཞིའི་རིང་ཀོ་ཡ་སན་དུ་བཀའ་བསྡུར་དང་བཀའ་སློབ་སོགས་མཛད་འཆར་གྲུབ་ནས་ ཕྱི་ཚེས་༤ཉིན་གྱི་སྔ་དྲོ་ཉི་ཧོང་ནང་ས་ཡོམ་གྱི་གནོད་ཚབས་ཆེ་ཤོས་ཕོག་སའི་ས་གནས་གྲས་སེན་ཌའེ་སུ་ཞབས་སོར་འཁོད་གནང་མཛད་འདུག