མིའི་སེམས་ཀྱི་འགྱུར་བ་ཞེས་པའི་བརྗོད་གཞིའི་ཐོག་བགྲོ་གླེང་།

• 
  2015-09-17

༄༅།    །བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དེང་སྐབས་དབྱིན་ཡུལ་ནང་ཆིབས་བསྒྱུར་མཛད་འཕྲིན་སྐྱོང་བཞིན་པ་ལྟར། འདི་ཚེས་ ༡༦ དང་ ༡༧ བཅས་ཉིན་གཉིས་རིང་མགོན་པོ་གང་ཉིད་ཀྱིས་དབྱིན་ཇིའི་སྙན་གྲགས་ཆེ་བའི་ Cambridge གཙུག་ལག་སློབ་གཉེར་ཁང་དུ་ཤེས་རབ་གོང་འཕེལ་དང༌། མིའི་སེམས་ཀྱི་འགྱུར་བ་ཞེས་པའི་བརྗོད་གཞིའི་ཐོག་གི་བགྲོ་གླེང་ཚོགས་འདུར་ལྷན་ཞུགས་མཛད་འདུག གོང་ཞུས་བགྲོ་གླེང་ཚོགས་འདུ་གོ་སྒྲིག་གནང་མཁན་དབྱིན་ཇིའི་ཡེ་ཤུའི་ཆོས་དཔོན་ཟུར་པ་ Archbishop of Canterbury Robert Williams ཡིན་པ་དང༌། བགྲོ་གླེང་ཚོགས་འདུར་མཉམ་ཞུགས་གནང་མཁན་མི་སྣ་གྲགས་ཅན་མང་པོ་ཡོད་པ་རྣམས་ཚོགས་ཆུང་སོ་སོར་ཆ་བགོས་ཀྱིས། བརྗོད་གཞི་གཙོ་བོ་ཤེས་རབ་གོང་འཕེལ་དང༌། མིའི་སེམས་ཀྱི་འགྱུར་བ་ཞེས་པ་གཞིར་བཞག་པའི་ཐོག་ནས་ཁོར་ཡུག་དང༌། རིག་རྩལ་འཕྲུལ་རིགས། རང་དབང༌། འཕྲོད་བསྟེན། ཤེས་ཡོན། རྩོད་རྙོག་འདུམ་འགྲིག་དང༌། དེ་བཞིན་སྤྱི་ཚོགས་ཀྱི་མཐུན་རྐྱེན་སོགས་ཀྱི་གནད་དོན་ཐོག་དགོངས་ཚུལ་བརྗེ་ལེན་གནང་ཡོད་པ་དང༌། ཐེངས་འདིའི་བགྲོ་གླེང་ཚོགས་འདུའི་ཐོག་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་གནང་བའི་ནང༌། དུས་ཚོད་ནི་ག་དུས་ཡིན་ནའི་འགྱུར་བ་འགྲོ་བའི་རང་བཞིན་ཆགས་ཡོད། ང་ཚོས་འདས་པའི་གནས་ཚུལ་ལ་བཟོ་བཅོས་རྒྱག་ཐུབ་ཀྱི་མེད་ཀྱང༌། མ་འོངས་པ་ག་འདྲ་བཟོ་དང་མི་བཟོ་ང་ཚོའི་ལག་ཏུ་ཡོད། ད་ལྟའི་གནས་སྟངས་ག་རེ་ཆགས་ཡོད་རེད་ཟེར་ན། གནས་སྟངས་ལ་འགྱུར་བ་འགྲོ་བཞིན་ཡོད་ཀྱང༌། ང་ཚོའི་བསམ་བློ་གཏོང་སྟངས་རང་འཇགས་བསྡད་པའི་རྐྱེན་གྱིས་ང་ཚོར་འཕྲད་བཞིན་པའི་དཀའ་ངལ་མང་པོ་ཞིག་ང་རང་ཚོ་རང་གིས་བཟོས་པ་ཆགས་ཀྱི་ཡོད། ང་ཚོར་འཕྲད་བཞིན་པའི་དཀའ་ངལ་དེ་དག་སེལ་དགོས་ན། དམིགས་ཡུལ་ངེས་ཅན་དང་བསམ་བློ་རྒྱ་ཆེ་ཙམ་དགོས་རྒྱུ་གལ་ཆེན་པོ་རེད་ཅེས་བཀའ་གནང་འདུག་ལ། ཡང་༧གོང་ས་༧སྐྱབས་མགོན་ཆེན་པོ་མཆོག་འདི་ཚེས་ ༡༨ ཉིན་དབྱིན་ཇིའི་རྒྱལ་ས་ལོན་ཌོན་དུ་ཆིབས་ཞལ་བསྒྱུར་གནང་མཛད་རྒྱུ་ཡིན་འདུག།

གསར་འགོད་པ་ངག་དབང་ཆོས་འཕེལ།