ཏོག་དབྱིབས་རིམས་ནད་ཀྱི་གནས་སྟངས་འཛམ་གླིང་ནང་ད་དུང་ཛ་དྲག་ཡིན་པས་གཟབ་དགོས་ཟེར།

• 2022-04-14

དེ་ཡང་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཆེད་མཁས་པ་ཚོས་(Covid-19)་ཏོག་དབྱིབས་ནད་ཡམས་ཀྱི་གནས་སྟངས་ད་དུང་འཛམ་གླིང་ཁྱོན་དུ་ཛ་དྲག་ངང་གནས་ཡོད་པ་ནན་བརྗོད་གནང་ཡོད་པ་དང་། དེ་ནི་ཚེས་༡༣་ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་(Covid-19)་ཏོག་དབྱིབས་ནད་ཡམས་ཀྱི་སྐོར་ལ་ཛ་དྲག་གི་ཚོགས་འདུ་ཞིག་འཚོགས་སྐབས་ཆེད་མཁས་བ་ཚང་མས་མགྲིན་དབྱངས་གཅིག་གྱུར་གྱིས་ཐག་གཅོད་བྱུང་དོན་བཞིན་གསུངས་བ་ཡིན་འདུག
དེང་སང་འཛམ་གླིང་གི་ས་གནས་གང་སར་(Covid-19)་ཏོག་དབྱིབས་ནད་ཡམས་ཁྱབ་གདལ་གྱི་གནས་སྟངས་ཛ་དྲག་དང་དཀའ་ངལ་ཅན་དུ་གནས་མུས་ཡིན་ཡང་། ཡུལ་ལུང་དང་ས་གནས་མང་པོའི་ནང་ཏོག་དབྱིབས་ནད་ཡམས་སྔོན་འགོག་གི་བྱ་ཐབས་མང་པོ་ཞིག་སྐྱུར་བ་དང་ལྷོད་གཡེང་གི་རྣམ་པ་ཡོད་པ་དེ་ཚོ་ངེས་པར་དུ་མཚམས་འཇོག་གིས་ད་དུང་མུ་མཐུད་ནད་ཡམས་སྔོན་འགོག་གི་བྱ་ཐབས་ལག་ལེན་བྱ་དགོས་པའི་འབོད་སྐུལ་གནང་འདུག
འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཆེད་ལས་སྒྲིག་འཛུགས་ཀྱི་སྤྱི་ཁྱབ་(Didier Houssin)་ཀྱིས་གསར་འགོད་གསལ་བསྒྲགས་སྐབས་གསུངས་པར། ཡུལ་ལུང་མང་པོར་ཏོག་དབྱིབས་ནད་ཡམས་སྔོན་འགོག་གི་བྱ་ཐབས་ཐད་ལྷོད་གཡེང་བྱེད་བཞིན་འདུག ཡིན་ན་ཡང་སྔོན་འགོག་གི་བྱ་ཐབས་སྐྱུར་རྒྱུའི་དུས་ལ་སླེབས་མེད། ནད་ཡམས་སྔོན་འགོག་གི་བྱ་ཐབས་མུ་མཐུད་དུ་ལག་བསྟར་གནང་དགོས་རྒྱུ་གལ་ཆེ་དོན་ཆེན་ཡིན་པའི་འབོད་སྐུལ་ཞུ་རྒྱུ་ཡིན་ཞེས་གསུངས་འདུག
དེ་བཞིན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་སྤྱི་ཁྱབ་དབུ་འཛིན་(Tedros Adhanom Ghebreyesus)་ལགས་ཀྱིས་གསུངས་པར། ང་ཚོས་འདས་པའི་དུས་ཡུན་རིང་ལ་ཏོག་དབྱིབས་ནད་ཡམས་ཀྱི་སྙན་ཐོའི་སྐོར་གྲོས་བསྡུར་མང་པོ་བྱས་པ་བརྒྱུད་ཤེས་རྟོགས་བྱུང་བར། ད་ཆ་རྒྱ་ནག་སོགས་ས་གནས་མང་པོའི་ནང་(Covid-19)་ཏོག་དབྱིབས་རིམས་ནད་དང་། དེའི་རྣམ་པ་འགྱུར་བའི་རིམས་ནད་(Omicron)་སོགས་ཏོག་དབྱིབས་རིམས་ནད་ཀྱི་ནད་རྟགས་མང་པོ་ཐོན་བཞིན་ཡོད་པས། རྩ་བའི་རྒྱལ་སྤྱིའི་ནང་ཐོག་མར་ཏོག་དབྱིབས་ནད་ཡམས་ཐོན་པ་ནས་བཟུང་། ད་སྐབས་ནད་ཡམས་ཁྱབ་གདལ་ཇེ་ཉུང་དུ་འགྲོ་བཞིན་ཡོད་རུང་། ང་ཚོས་ལྷོད་གཡེང་གི་བྱེད་སྟངས་དེ་དོར་དགོས། ད་དུང་ནད་ཡམས་འདི་འཛམ་གླིང་ཁྲོད་གནས་སྟངས་ཛ་དྲག་ངང་གནས་མུས་ཡིན། སྔོན་འགོག་གི་ལས་དོན་མུ་མཐུད་དུ་སྤེལ་དགོས་བའི་ནན་བརྗོད་བྱས་འདུག

གསར་འགོད་པ། ཕྲ་རིང་བསྟན་ནོར།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།