བོད་ནང་གི་ཛ་དྲག་གནས་སྟངས་གསལ་བཤད་གནང་འདུག

ཕྱི་དྲིལ་བཀའ་བློན་མཆོག་གིས་ཨི་ཊ་ལིའི་གྲོས་ཚོགས་གོང་མའི་ནང་བོད་དོན་ཉན་ཞིབ་སྐབས་བོད་ནང་གི་ཛ་དྲག་གནས་སྟངས་གསལ་བཤད་གནང་འདུག

དེ་ཡང་ཕྱི་ཟླ་བཅུ་གཉིས་པའི་ཚེས་ལྔ་ཉིན་གྱི་སྔ་དྲོར་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས། ཨི་ཊ་ལིའི་གྲོས་ཚོགས་གོང་མའི་འགྲོ་བ་མིའི་ཐོབ་ཐང་གོང་འཕེལ་དང་། སྲུང་སྐྱོབ་ཀྱི་དམིགས་བསལ་ཚོགས་ཆུང་ནང་བོད་དོན་ཉན་ཞིབ་གནང་བའི་སྐབས་ཀྱི་གནས་ཚུལ་སྐོར་འདི་གའི་རླུང་འཕྲིན་ཁང་གིས་བཀའ་བློན་མཆོག་ལ་བཅར་འདྲིའི་སྐབས་བརྗོད་དོན། སྐབས་དེར་བོད་ནང་གི་ཛ་དྲག་གནས་སྟངས་དང་། ལྷག་དོན་བོད་ནང་འགྲོ་བ་མིའི་ཐོབ་ཐང་དང་འབྲེལ་བའི་དཀའ་ངལ་ག་རེ་ཡོད་མེད། དེ་བཞིན་རང་ལུས་མེ་བསྲེགས་སོགས་ཀྱི་གནས་སྟངས་ཐད་གསལ་བཤད་བྱེད་རྒྱུའི་གོ་སྐབས་བྱུང་ཟེར། དེ་བཞིན་བཀའ་བློན་མཆོག་ནས་བོད་ནང་ཆབ་སྲིད་ཀྱི་དམ་དྲག་དང་། རིག་གཞུང་ཁོར་ཡུག་གཏོར་བཤིག བོད་མི་རྣམས་དཔལ་འབྱོར་ཟུར་ཕུད་ཀྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པ་རྣམས་གསལ་སྟོན་གནང་ཡོད་པ་མ་ཟད། ལྷག་པར་དུ་བོད་ནང་མེ་འཁོར་འགྲིམ་འགྲུལ་ལྕགས་ལམ་བཟོས་བ་དེས་ས་གནས་བོད་མི་ཚོར་ཁེ་ཕན་གང་ཡང་མེད་པར། བོད་ཀྱི་ཐོན་ཁུངས་རྣམས་རྒྱ་ནག་ནང་དབོར་དྲེན་དང། རྒྱ་མི་འབོར་ཆེན་བོད་ནང་གནས་སྤོས་བྱ་རྒྱུའི་ལག་ཆ་ཞིག་ཆགས་ཡོད་པ་མ་ཟད། བོད་ནང་གི་ཁེ་ལས་ཚོང་པའི་སྦྱིན་བདག་བརྒྱ་ཆའི་བདུན་ཅུ་ཙམ་རྒྱ་རིགས་ཡིན་པ་དང་།  གཞུང་གི་ལས་བྱེད་ཀྱི་བརྒྱ་ཆ་ལྔ་བཅུ་ཙམ་རྒྱ་རིགས་ཡིན་པའི་གནས་སྟངས་སོགས་ངོ་སྤྲོད་གསལ་བཤད་གནང་ཡོད་། དེ་བཞིན་ཕྱི་དྲིལ་བཀའ་བློན་བདེ་སྐྱིད་ཆོས་དབྱིངས་མཆོག་གིས་ཕྱི་ལོ་ཉིས་སྟོང་དགུ་ལོ་ནས་ད་བར་བོད་མི་༡༢༠ལྷག་གིས་སྐུ་ལུས་མེར་སྲེག་བཏང་ཡོད་པ་དང་། ཁོང་རྣམ་པ་ཚོས་བོད་ལ་རང་དབང་དང་།  བོད་མིའི་དབུ་ཁྲིད་༧གོང་ས་༧སྐྱབས་མགོན་ཆེན་མོ་མཆོག་བོད་ལ་ཕྱིར་ལོག་ཕེབས་རྒྱུའི་མདུན་པ་བཏོན་ཡོད་པས་། བོད་མིའི་སྒྲིག་འཛུགས་ཀྱིས་བོད་རྒྱ་མི་རིགས་གཉིས་ལ་ཕན་པའི་དབུ་མའི་ལམ་གྱི་སྲིད་བྱུས་ལག་བསྟར་བྱས་ཏེ། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་གྱི་སྒྲོམ་གཞིའི་འོག་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་སྐྲུན་ཐབས་ཀྱི་ལངས་ཕྱོགས་བཟུང་ཡོད་པ་གསལ་སྟོན་གནང་ཡོད།

གསར་འགོད་པ་མཆི་མེད་དང་ལྕགས་མོ་འཚོ།