སྟག་འཚེར་རིན་པོ་ཆེ།

༸གོང་ས་མཆོག་གི་སྐུའི་གཅེན་པོ་སྟག་འཚེར་རིན་པོ་ཆེ་དགོངས་པ་གཞན་དོན་དུ་གཤེགས་པའི་ཡིད་སྐྱོའི་གནས་ཚུལ།

2008.09.05
༸གོང་ས་མཆོག་གི་སྐུའི་གཅེན་པོ་སྟག་འཚེར་རིན་པོ་ཆེ་མཆོག
རང་བཙན་གྱི་དྲ་གནས།
སྒྲ་ལྡན་གསར་འགྱུར།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆེ་མཆོག་གི་སྐུའི་གཅེན་པོ་བགྲེ་ཤོས་སྟག་འཚེར་རིན་པོ་ཆེ་མཆོག་དེ་རིང་བོད་ཟླ་བདུན་པའི་ཚེས་དྲུག་ཕྱི་ཟླ་དགུ་པའི་ཚེས་ལྔ་པ་རེས་གཟའ་པ་སངས་ཉིན་ཨ་མེ་རི་ཀའི་ཤར་ཕྱོགས་ཀྱི་ཉིན་བརྒྱབ་ཆུ་ཚོད་གཉིས་དང་ཕྱེད་ཀ་ཙམ་ཐོག་དགོངས་པ་གཞན་དོན་གཤེགས་ཚུལ་མཛད་འདུག སྟག་འཚེར་རིན་པོ་ཆེ་མཆོག་ཕྱི་ལོ་ ༡༩༢༢ ལོ་སྟེ་ཆུ་ཁྱི་ལོའི་ཟླ་བ་བརྒྱད་པའི་ཚེས་བཅུ་དྲུག་ཉིན་མདོ་སྨད་སྟག་འཚེའི་ཡུལ་དུ་སྐུ་འཁྲུངས་ཤིང་དགུང་གྲངས་གསུམ་ལ་ཕེབས་སྐབས་༸རྒྱལ་དབང་སྐུ་འཕྲེང་བཅུ་གསུམ་པ་ཆེན་པོ་མཆོག་ནས་སྟག་འཚེར་སྐུ་འཕྲེང་ཉེར་གསུམ་པའི་ཡང་སྲིད་དུ་ངོས་འཛིན་གནང་བ་དང་མཚན་ལ་ཏུབ་བསྟན་འཇིག་མེད་ནོར་བུ་ཞེས་བསྩལ་གནང་མཛད་པ་དང༌། དགུང་གྲངས་བརྒྱད་ལ་ཕེབས་སྐབས་ཞྭ་སེར་བསྟན་པའི་མངའ་བདག་རྗེ་ཙོང་ཁ་པ་ཆེན་པོ་མཆོག་གི་སྐུའི་འཁྲུངས་ཡུལ་སྐུ་འབུམ་དགོན་དུ་ཆོས་ཞིགས་གནང་པ་དང་སྐུ་གཞོན་ནུའི་དུས་ནས་དགོན་པའི་ཆོས་ཕྱོགས་ཀྱི་བསླབ་པ་སློབ་གཉེར་ལ་ཐེམ་སྐས་རིན་འཛེགས་ཀྱིས་སྦྱངས་པ་མཐར་ཕྱིན་གནང་སྟེ། དགུང་གྲངས་ཉེར་བདུན་ལ་ཕེབས་སྐབས་དགེ་འདུན་པ་ཞལ་གྲངས་བཞི་སྟོང་ལྷག་ཡོད་པའི་སྐུ་འབུམ་དགོན་པའི་མཁན་པོར་བསྐོ་བཞག་བསྩལ་ཡོད་པ་རེད། སྐབས་དེ་དུས་མདོ་སྨད་སྐུ་འབུམ་དགོན་ནི་བོད་ཤར་ཕྱོགས་ཀྱི་བཤད་སྒྲུབ་ཀྱི་བསྟི་གནས་ཆེ་ཤོས་སུ་ཡོངས་སུ་གྲགས་པ་ཞིག་ཡིན་ཡང་རིན་པོ་ ཆེ་མཆོག་ནས་དགོན་པའི་མཁན་པོའི་མཛད་འགན་བཞེས་ཏེ་བཞུགས་ཡུན་རིན་པོ་བྱུང་མེད་པ་དང་དགོན་པ་ནས་ཞལ་གྱེས་དགོས་བྱུང་ཡོད་པ་རེད། དེ་ནི་ཕྱི་ལོ་ ༡༩༤༩ ལོར་རྒྱ་ནག་དམར་པོའི་གཞུང་གིས་བོད་བཙན་བཟུང་བྱས་སྒོ་བཙུགས་རྗེས་སྐུ་འབུམ་ཁུལ་གྱི་ས་ཁུལ་དེ་དག་ནི་རྒྱ་ནག་གི་དབང་འོག་ཚུད་པའི་བོད་ཀྱི་ས་ཆ་ཆེས་ཐོག་པའི་གྲས་ཤིག་ཡིན་པ་དང་རིན་པོ་ཆེ་མཆོག་རྒྱ་མིའི་དམག་མིས་བཟང་བཙོན་འོག་ཉིན་མཚན་དུས་དྲུག་ཏུ་སྲུང་བྱ་ཧ་ཅང་དམ་པོའི་འོག་བཀག་ཉར་ཞུས་ཤིང་རྒྱ་ནག་དམར་པོ་གཞུང་གིས་རིན་པོ་ཆེ་མཆོག་བོད་ཀྱི་རྒྱལ་ས་ལྷ་སར་ཕེབས་སྟེ་དགུངས་གྲངས་བཅོ་ལྔར་ཕེབས་པའི་སྐུ་གཅུང་པོ་བོད་མིའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ལ་བོད་རྒྱ་ཁོངས་སུ་ངོས་ལེན་གནང་དགོས་པའི་བསྐུལ་མ་ཞུ་རྒྱུ་དང་གལ་ཏེ་གསན་འཇོག་མ་གནང་ཚེ་༸གོང་ས་༸སྐྱབས་མགོན་ཆེན་པོ་མཆོགགི་སྐུ་སྲོག་དཀྲོངས་དགོས་པའི་སློབ་སྟོན་ཞུས་ཤིང་། དེ་ལྟར་གནང་ཚེ་རིན་པོ་ཆེ་མཆོག་ལ་རྒྱ་ནག་གཞུང་ཕྱོགས་ནས་བོད་ཀྱི་དབུ་ཁྲིད་ཀྱི་མཚན་གནས་དབུལ་རྒྱུའི་ཁས་ལེན་ཀྱང་བྱས་ཡོད་པ་རེད། ཟླ་བ་མང་པོའི་རིང་རིན་པོ་ཆེ་མཆོག་ནས་རྒྱ་ནག་གི་རེ་འདུན་དེར་དྭ་ལེན་རྩ་བ་ནས་གནང་མེད་ཀྱང་བོད་ཀྱི་རྒྱལ་ས་ལྷ་སར་ཕེབས་ཏེ་༸རྒྱལ་བ་རིན་པོ་ཆེ་དང་བོད་གཞུང་ལ་རྒྱ་ནག་གིས་བོད་བཙན་བཟུང་བྱ་རྒྱུ་འགོ་བཙུགས་ཟིན་པའི་གནས་ཚུལ་སྙན་སེང་ཞུ་དགོས་གལ་ཆར་དགོངས་ཏེ་མཐར་རྒྱ་ནག་གཞུང་གི་འབོད་སྐུ་དྭང་གནང་ཁུལ་གནང་སྟེ་ཕྱི་ལོ་ ༡༩༤༠ ཐམ་པའི་ལོར་ལྷ་སར་ཕེབས་ཐུབ་པ་བྱུང་ཡོང་པ་རེད། ལོ་དེ་རང་ལ་༸གོང་ས་༸སྐྱབས་མགོན་ཆེན་པོ་མཆོག་ནས་བོད་བསྟན་སྲིད་ཀྱི་དོན་དུ་རྒྱལ་སྲིད་ཆོས་སྲིད་ཀྱི་སྐུ་དབང་བཞེས་ཡོད་པ་རེད། སྟག་འཚེར་རིན་པོ་ཆེ་མཆོགནས་བོད་ནང་རྒྱ་ནག་དམར་པོའི་སྲིད་དབང་འགོག་ཐབས་སླད་རྒྱལ་སྤྱིའི་རྒྱབ་སྐྱོར་དང་ལྷག་པར་དུ་སྟོབས་ཆེན་ཨ་མེ་རི་ཀའི་རྒྱབ་སྐྱོར་ཐོབ་རྒྱུ་ནི་ཧ་ཅང་གལ་འགངས་ཆེ་བར་གཟིགས་ཏེ་ཕྱི་ལོ་ ༡༩༥༢ ལོར་ཨ་མེ་རི་ཀར་ཕེབས་ཤིང་ཕྱི་ལོ་ ༡༩༦༥ ནས་དབུ་བཙུགས་ཏེ་ཨ་རིའི་ནུབ་དཀྱིལ་མངའ་སྡེ་ཨིན་ཌི་ཡ་ནའི་ཆེས་མཐོའི་གཙུག་ལག་སློབ་གཉེར་ཁང་ནས་བོད་ཀྱི་ཆོས་དང་རིག་གཞུང་གི་སློབ་དཔོན་གནང་བ་དང་ཕྱི་ལོ་ ༡༩༧༩ ལོར་རིན་པོ་ཆེ་མཆོག་ནས་ཨིན་ཌི་ཡ་ནའི་གྲོང་ཁྱེར་བ྄ལུ་མིང་ཊན་ནང་བོད་ཀྱི་ཆོས་དང་རིག་གཞུང་བདག་གཅེས་བྱ་རྒྱུའི་ཆེད་བོད་ཀྱི་རིག་གཞུང་བསྟི་གནས་ཁང་ཞེས་པ་ཞིག་གསར་འཛུགས་གནང་བ་དང་༸གོང་ས་༸སྐྱབས་མགོན་རིན་པོ་ཆེ་མཆོག་ས་གནས་དེར་ལན་མང་ཆིབས་བསྒྱུར་༸ཞབས་སོར་འཁོང་གནང་མཛད་ཡོད་པ་མ་ཟད་ ཕྱི་ལོ་ ༡༩༨༧ ལོར་ས་གནས་དེར་སྐུའི་གཅེན་པོ་སྟག་འཚེར་རིན་པོ་ཆེ་མཆོག་ནས་བྱང་ཆུབ་མཆོད་རྟེན་ཞིག་བཞེངས་གནང་མཛད་པ་དེའི་རབས་གནས་ཆེ་ཆིབས་བསྒྱུར་བསྐྱངས་ཡོང་པ་རེད། དེ་རྗེས་སླར་ཡང་ཕྱི་ལོ་ ༡༩༩༧ ལོར་རིན་པོ་ཆེ་མཆོག་ནས་བྱམས་བརྩེ་གླིང་ཞེས་པའི་བོད་དགོན་ཞིག་གསར་བཞེངས་གནང་རྒྱུའི་ཆེ་༸གོང་ས་༸སྐྱབས་མགོན་ཆེན་པོ་མཆོག་ནས་དམངས་རྡོ་རྩིགས་གནང་མཛད་ཡོད་པ་རེད། ཕྱི་ལོ་ ༡༩༩༩ ལོར་༸གོང་ས་༸སྐྱབས་མགོན་ཆེན་པོ་མཆོག་ནས་སྟག་འཚེར་རིན་པོ་ཆེ་བཞུགས་ཡུལ་གྱི་ས་གནས་དེར་དཔལ་དུས་ཀྱི་འཁོར་ལོའི་དབང་ཆེན་སྩལ་གནང་མཛད་ཅིང་༸གོང་ས་༸སྐྱབས་མགོན་ཆེན་པོ་མཆོག་ས་གནས་དེར་ཆིབས་བསྒྱུར་མཐའ་མ་དེ་སྔ་ལོ་ཕྱི་ལོ་ ༢༠༠༧ ལོར་བསྐངས་ཡོད་པ་རེད།

ཡང་རིན་པོ་ཆེ་མཆོག་ལ་ཉེ་ཧོང་བོད་གཞུང་གི་སྐུ་ཚབ་དོན་གཅོད་དུ་ཡ་བསྐོ་བཞག་གནང་ཡོད་པ་རེད། སྟག་འཚེར་རིན་པོ་ཆེ་མཆོག་གི་སྐུ་ཚེ་ཧྲིལ་པོ་བོད་མི་རིགས་ཀྱི་བདེ་དོན་ཆེ་གཏོང་གནང་མཛད་ཅིང་ལྷག་པར་དུ་ཕྱི་ལོ་ ༡༩༩༥ ལོར་རིན་པོ་ཆེ་མཆོག་དང་ཁོང་གི་ཕྱག་རོགས་ཤིག་ནས་རྒྱལ་སྤྱིའི་བོད་རང་བཙན་ལས་འགུལ་ཞེས་པའི་ཚོགས་པ་ཞིག་གསར་འཛུགས་གནང་ཞིང་སྔ་རྗེས་ཚོགས་པ་དེའི་ལས་འགུལ་གྱི་ཆ་ཤ་ཀྱི་ཁོངས་ནས་བོད་རང་བཙན་ཆེ་ཀྱི་གོམ་བགྲོད་རིམ་རིན་པའི་ནང་རིན་པོ་ཆེ་མཆོག་ཐེངས་མ་གསུམ་ཙམ་མཉམ་ཞུགས་གནང་ཞིང་རིན་པོ་ཆེ་མཆོག་ནས་ཕྱི་ལོ་ ༡༩༩༦ ལོར་མེལ་གསུམ་བརྒྱ་ལྷག་དང་ཉིན་གྲངས་ ༥༤ འགོར་བའི་ཨ་མེ་རི་ཀའི་རྒྱལ་ས་ཝ་ཤིང་ཀྲོན་ནས་གྲོང་ཁྱེར་ནིའུ་ཡོར྄ཀ་བར་གྱི་གོམ་བགྲོད་ཀྱི་སྣེ་ལེན་འཁྲིད་གནང་ཡོད་པ་དང་། ཕྱི་ལོ་ ༡༩༩༧ ལོར་ཁེ་ན་ཌའི་གྲོང་ཁྱེར་ཊོ་རོན་ཊོ་ནས་ཨ་རིའི་གྲོང་ཁྱེར་ནིའུ་ཡོར྄་ཁྱེར་བར་སྟེ་མེལ་ ༦༠༠ གོམ་བགྲོད་དེའི་སྣེ་འཁྲིད་ཀྱང་གནང་ཡོད་པ་རེད། ཕྱི་ལོ་ ༢༠༠༢ རིན་པོ་ཆེ་མཆོག་ལ་གྲིབ་སྐྱོན་ལྟ་བུའི་བསྙུན་གཞིང་བཞེས་ཏེ་ཁང་སང་དགོངས་པ་མ་རྫོགས་བར་གནས་སྟངས་དེའི་འོག་འཚོ་བཞུགས་མཛད་ཅིང་རིན་པོ་ཆེ་མཆོག་ནི་བོད་རང་བཙན་གཙང་མའི་ཐོབ་ཐང་རྩོད་དགོས་རྒྱུར་ཡིད་ཆེས་ཆེན་པོ་གནང་མཁན་ཞིག་ཡིན་པ་དང་ཁོང་གི་ལྷག་བསམ་དང་མཛད་རྗེས་ལ་བོད་མི་ཚོས་ཡིད་རངས་ཆེན་པོ་ཞུ་བཞིན་ཡོད་ལ་ད་ཆ་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་ཚུལ་མཛད་པ་དེ་ནི་བོད་མི་ཚོ་རང་མི་རིགས་འཚོ་གནས་ཀྱི་འཐབ་རྩོལ་མཛད་རྗེས་ཆེན་པོ་བཞག་གནང་མཁན་ཞིག་མེད་པར་གྱུར་བར་ཧ་ཅང་བློ་ཕམ་ཡང་བྱེད་ངེས་ཡིན་པ་རེད༎

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎