༸གོང་ས་མཆོག་ཨི་ཊ་ལིར་ཞབས་སོར་འཁོད་པ།

༄༅༎བོད་མིའི་བླ་ན་མེད་པའི་དབུ་ཁྲིད་༸སྤྱིར་ནོར་༸གོང་ས་༸སྐྱབས་མགོན་ཆེན་པོ་མཆོག་ ཨི་ཊ་ལིའི་ནང་ཚོགས་རྒྱུའི་འཛམ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ལྔ་པའི་ཚོགས་མགོན་དུ་ཞབས་སོར་འཁོད་རྒྱུ་ཡིན་འདུག ༸གོང་ས་༸སྐྱབས་མགོན་ཆེན་པོ་མཆོག་འདི་ཚེས་༡༦ཉིན་ ཨི་ཊ་ལིའི་ལྷོ་ཕྱོགས་ཏི་རོལ་(Tyrol) ནང་ཞབས་སོར་འཁོད་སྐབས་ས་གནས་ཀྱི་དབུ་ཁྲིད་  ལུའིསེ་ ཌུན་ཝལ་ཌར་(Durnwalder) གྱིས་གནམ་ཐང་དུ་ཕེབས་བསུར་བཅར་གནང་ཡོད་པ་དང་།མགྲོན་ཁང་དུ་ཕེབས་སྐབས་ས་གནས་ཀྱི་ཡུལ་མི་དང་བོད་མི་ཚོས་ཕེབས་བསུ་ཞུས་གནང་འདུག་ ལྷོ་ཊིརོལ་གྱི་སྲིད་འཛིན་ ཌུན་ཝལ་དར་གཙོས་པའི་ས་གནས་གཞུང་གི་མཛད་གཙོ་ཆ་ཚང་༸གོང་ས་མཆོག་མཇལ་འཕྲད་དང་ཉིན་དགུང་གསོལ་སྟོན་འདེགས་འབུལ་ཞུ་རྒྱུ་ཡིན་འདུག་ ལྷོ་ཊིརོལ་ནི་བྱང་ཨི་ཊ་ལིའི་རང་སྐྱོང་ལྗོངས་ཀྱི་ས་ཁུལ་ཞིག་ཡིན་པ་དང་ལོ་མང་གོང་ནས་བོད་ཀྱི་རྩ་དོན་ལ་ཐུགས་སྣང་ཆེན་པོ་གནང་མུས་ཡིན་པ་རེད།འདི་ཚེས་༡༨ཉིན་རྒྱལ་ས་རྭོམ་ལ་ཐོན་གནང་གིས་འཛམ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ལྔ་པའི་ཚོགས་མགོན་དུ་ཞབས་སོར་འཁོད་དེ་གསུངས་བཤད་གནང་རྒྱུ་ཡིན་འདུག་ ཐེངས་འདིའི་ཉིན་གཉིས་ཀྱི་ཚོགས་ཆེད་འདི་བཞིན་ཨི་ཊ་ལིའི་གྲོས་ཚོགས་འོག་མའི་ནང་འཚོགས་རྒྱུ་ཡིན་པ་ལྟར་གྲོས་ཚོགས་འོག་མའི་ གཙོ་འཛིན་ གྭིའན་ཕེརྔེ་ཀོ་ ཕི་ཎི་ (Gianfranco Fini) ཡིས་ཕེབས་བསུ་དང་སྣེ་ལེན་གནང་གི་འདུག་ ༸གོང་ས་མཆོག་འདི་ལོ་ཕྱི་ཟླ་གཉིས་པའི་རྭོམ་དུ་ཆིབས་བསྒྱུར་སྐབས་གྲོང་ཁྱེར་གྱི་ཆབ་འབངས་ཀྱི་མཚན་གནས་ཀྱང་ཕུལ་ཡོད་རེད།འདི་ཚེས་༡༩ཉིན་༸གོང་ས་མཆོག་རྒྱ་གར་ལ་ཕྱིར་ཕེབས་གནང་གཏན་འཁེལ་ཡོད་འདུག།