༧གོང་ས་མཆོག་རྒྱ་གར་ལྷོ་ཕྱོགས་སུ་ཆིབས་བསྒྱུར་ཞབས་སོར་འཁོད་གནང་བ།

༄༅། །བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས། ཨ་རིའི་ཁུལ་གྱི་མཛད་འཆར་ཁག་ལེགས་གྲུབ་ཀྱིས་རྒྱ་གར་དུ་ཆིབས་བསྒྱུར་ཞབས་སོར་འཁོད་གནང་གྲུབ་པ་དང་། ད་རིང་ཕྱི་ཚེས་ ༡ ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འབྲས་སྤུངས་བླ་སྤྱིར་༸ཞབས་སོར་བདེ་བར་འཁོད་གནང་མཛད་འདུག ཐོག་མར་༧གོང་ས་མཆོག་འབྲས་སྤུངས་བླ་སྤྱིའི་འདུ་ཁང་དུ་རྟེན་གཙོ་རྣམས་ལ་ཆོས་མཇལ་དང་གནས་གཟིགས་ཕེབས་རྗེས། དུས་ད་ལྟ་བར་དུ་རྒྱུན་འཛིན་བྱེད་པའི་དཔལ་ནཱ་ལེནྡྲའི་ཆོས་བརྒྱུད་འཛིན་པའི་བོད་ཀྱི་ནང་ཆོས་ནི་རིག་གཞུང་གི་རྩ་བ་ཡིན་པ་དང་། དེང་སྐབས་དཔལ་ནཱ་ལེནྡྲའི་མཁས་པས་མཛད་པའི་ལེགས་བཤད་དེ་དག་འཛམ་གླིང་སྤྱི་ལ་ཕན་པ་སྒྲུབ་ཐུབ་པ་བྱ་རྒྱུ་གལ་ཆེན་པོ་ཡིན་སྐོར་བཀའ་སློབ་བསྩལ་གནང་མཛད་འདུག ཕྱི་ཚེས་༢ ནས་ ༥ བར་མགོན་པོ་གང་ཉིད་ཀྱིས་དེ་ཕྱོགས་སུ་དགེ་འདུན་པ་བརྒྱ་ཕྲག་འགའ་ཤས་ལ་བསྙེན་རྫོགས་སྒྲུབ་པ་གནང་རྒྱུ་རེད་འདུག།

གསར་འགོད་པ་རིག་ལྡན་སྒྲོལ་མ།