གནས་ཚུལ་རྟོག་ཞིབ་ཀྱི་སྐུལ་མ།

༄༅༎ཕྱི་ཟླ་༡༡ཚེས་༡༣རེས་གཟའ་མིག་དམར་གྱི་ཉིན་ཉི་ཧོང་གི་གྲོས་ཚོགས་འཐུས་མི་ ༡༣༠ ཙམ་གྱིས་ཉི་ཧོང་གི་གྲོས་ཚོགས་ནང་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུས་ཤིང། སྐབས་དེར་༸གོང་ས་མཆོག་ནས་བོད་ནང་གི་དངོས་ཡོད་གནས་ཚུལ་རྟོག་ཞིབ་སླད་གྲོས་ཚོགས་ཀྱི་འཐུས་མི་ཚོ་དངོས་སུ་བོད་ནང་ཕེབས་དགོས་པའི་སྐུལ་མ་གནང་འདུག
གྲོས་ཚོགས་ཀྱི་འཐུས་མི་དེ་དག་གི་ཁོངས་སུ་ཉེ་ཆར་བསྐྱར་དུ་ཉི་ཧོང་གི་ཕྱོགས་འགལ་ཚོགས་པ་གཙོ་བོའི་འགོ་འཁྲིད་དུ་འདེམས་ཐོན་བྱུང་བ་ཉི་ཧོང་གི་སྲིད་བློན་ཟུར་པ་ཤིན་ཛོ་ཨ་བེ་མཆོག་ཀྱང་ཆེད་བཅར་ཞུས་ཡོད་ཅིང། ༸གོང་ས་མཆོག་གིས་ངས་ཉི་ཧོང་གྲོས་ཚོགས་ཀྱི་འཐུས་མི་ཚོགས་པ་བོད་སྤྱི་དང་ལྷག་པར་དུ་བོད་མི་གཅིག་རྗེས་གཉིས་མཐུད་ཀྱིས་རང་ལུས་མེར་སྲེག་གཏོང་བའི་ཧ་ལས་པའི་ཡིད་སྐྱོའི་དོན་རྐྱེན་འབྱུང་བཞིན་པའི་ས་གནས་ཁག་ཏུ་ཕེབས་དགོས་པའི་རེ་འདུན་ཞུ་རྒྱུ་ཡིན་ཅེས་དང།  གལ་ཏེ་ཕྱིའི་ཡུལ་གྲུ་ཁག་གི་གྲོས་ཚོགས་ཀྱི་འཐུས་མི་ཚོས་ས་ཁུལ་དེ་དག་ནང་གི་དངོས་ཡོད་གནས་ཚུལ་འགྲེལ་བརྗོད་བྱེད་ཚེ་རྒྱ་ནག་གི་འགོ་འཁྲིད་ཚོས་ཀྱང་དངོས་ཡོད་གནས་ཚུལ་ཤེས་རྟོགས་སྲིད་པ་ཞིག་རེད་ཅེས་བཀའ་གནང་འདུག།