༧གོང་ས་མཆོག་གིས་དུས་འཁོར་དབང་ཆེན་ཐེངས་༣༣པ་དབུ་བཙུཊ་འདུག

༧གོང་ས་མཆོག་གིས་དུས་དབང་གི་སྔོན་འགྲོའི་ཆོས་བཤད་དེ་གལ་ཆེ་བར་དགོངས་པ་བཞེས་བཞིན་ཡོད་པ་གསུངས་འདུག
དེ་ཡང་༧གོང་ས་སྐྱབས་མགོན་ཆེན་པོ་མཆོག་ལ་དཔལ་དུས་ཀྱི་འཁོར་ལོའི་དབང་ཆེན་གྱི་སྦྱིན་བདག་གཙོ་གྲས་ལ་དྭགས་ནང་པའི་ཚོགས་པ་དང་། དགོན་ཚོགས། ཀོང་པོ། ཇོ་ནང་བཅས་ནས་ཇི་ལྟར་གསོལ་འདེབས་ཞུས་དོན་ལྟར་སྤྱི་ལོ་༢༠༡༤ ཟླ་༧ ཚེས་༣ ཉིན་ལ་དྭགས་ཞི་བའི་ཚལ་ཕོ་བྲང་གི་ཐང་ཆེན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པ་དབུ་འཛུགས་མཛད་ཡོད་པ་དང་། སྔོན་འགྲོའི་གསུངས་ཆོས་སྐབས་དེར་འདུས་དད་ལྡན་ཆོས་ཞུ་བ་འབུམ་གཅིག་བརྒལ་བར་༧གོང་ས་མཆོག་གིས། དེ་རིང་འདི་གར་འདུས་པའི་ཆོས་ཞུ་བ་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཡོད། སྤྱིར་བཏང་དཔལ་དུས་ཀྱི་འཁོར་ལོའི་དབང་ཆེན་དེ་སྔགས་བླ་མའི་རྒྱུད་སྡེ་གཞན་དང་མི་འདྲ་བར། མང་ཚོགས་རྒྱ་ཆེན་པོར་གནང་རྒྱུའི་ཕྱག་སྲོལ་ཞིག་ཡོད། ངོས་ཀྱིས་གླིང་རིན་པོ་ཆེའི་སྐུ་མདུན་ནས་དུས་འཁོར་དབང་ཆེན་ཞུས་པ་རེད། དེ་ནས་རིམ་གྱིས་བོད་ནང་དུས་འཁོར་དབང་ཆེན་ཐེངས་གཉིས་དང་། རྒྱ་གར་དུ་སླེབས་ནས་ཁྱོན་བསྡོམས་དུས་འཁོར་དབང་ཆེན་ཐེངས་༣༠གནང་ཡོད། ངོས་ཀྱིས་དུས་ཀྱི་འཁོར་ལོའི་ཉམས་ལེན་དམིགས་བསལ་བྱེད་ཐུབ་པ་དེ་འདྲ་མེད། འོན་ཀྱང་ལས་དང་སྨོན་ལམ་གྱི་འབྲེལ་བ་ཡོད་པ་ཞིག་ཆགས་ཡོད། རྒྱ་གར་དུ་སླེབས་ནས་དུས་འཁོར་དབང་ཆེན་ཐེངས་དང་པོ་རྡ་རམ་སཱ་ལར་གནང་བ་རེད། སྐབས་དེའི་དུས་འཁོར་དབང་ཆེན་ཚར་རྗེས་ངོས་ལ་རྨི་ལམ་དུས་འཁོར་གྱི་དཀྱིལ་འཁོར་སྒང་ལ་བསྡད་ཡོད་པ་ཞིག་བཏང་བྱུང་། དེ་ནས་དུས་འཁོར་དབང་ཆེན་ཐེངས་མང་པོ་གནང་དགོས་པའི་ཚོར་བ་བྱུང་། ད་ལྟའི་བར་དུས་འཁོར་དབང་ཆེན་མང་པོ་ཞིག་གནང་བ་རེད། དེའི་དགེ་མཚན་གཅིག་དུས་འཁོར་དབང་ཆེན་གྲགས་པ་ཆེན་པོ་ཡིན་པར་བརྟེན་མི་མང་པོ་འཛོམས་ཀྱི་ཡོད། ངོས་ཀྱིས་སྐབས་དེར་དགོས་པ་ཆེན་པོ་བརྩིས་ཡོད་པ་ནི་སྔོན་འགྲོའི་ཆོས་བཤད་སྐབས་ནང་ཆོས་ངོ་སྤྲོད་བྱ་རྒྱུ་དེ་རེད། དེར་བརྟེན་མི་མང་ལ་དུས་འཁོར་དབང་ཆེན་ཡོད་ཅེས་བརྗོད་ན་མི་མང་པོ་འདུས་ཡོང་གི་འདུག དེའི་དམིགས་ཡུལ་གཙོ་བོ་ནི་ནང་ཆོས་ངོ་སྤྲོད་བྱ་རྒྱུ་དེ་རེད་ཅེས་གསུངས་འདུག
ད་དུང་དེང་སང་འཛམ་གླིང་ནང་ཆོས་ཁས་ལེན་མཁན་མི་དུང་ཕྱུར་དྲུག་ཅུ་ཡོད་པ་དང་། ཆོས་ཁས་མི་ལེན་མཁན་དུང་ཕྱུར་བཅུ་ལྷག་ཡོད་པ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་མཁན་གཅིག་གྱུར་རེད། དེར་བརྟེན་འགྲོ་བ་མིའི་བཟང་སྤྱོད་ནི་འཛམ་གླིང་གི་མི་ཚང་མར་འབྲེལ་བ་ཡོད་པ་ཞིག་ཆགས་ཡོད་ཅེས་དང་། ཆོས་ཞུ་བ་ཚོར་དུས་དབང་གི་སྟ་གོན་ངོ་མ་དེ་སེམས་པས་བྱེད་དགོས་ཀྱི་ཡོད་པར་བརྟེན། སངས་རྒྱས་ཆོས་ཚོགས་མ་བསགས་ཏེ་སྐྱབས་འགྲོ་དང་སེམས་བསྐྱེད་ཀྱི་སྐོར་ལ་བསམ་བློ་གཏོང་དགོས་སྐོར་སོགས་གསུངས་འདུག

གསར་འགོད་པ་ཚེ་དབང་དངོས་གྲུབ།