ທະນາຄານໂລກຊ່ອຍລາວ ອີກ 20 ລ້ານໂດລາ

ຜູ້ບໍຣິຫານ ທະນາຄານ ໂລກ ໄດ້ຕົກລົງ ອະນຸມັດ ເງີນຊ່ອຍລ້າ ທີ່ກຸງ ວໍຊີງຕັນ ສະຫະຣັຖ ອະເມຣິກາ ໃນວັນພຣະຫັດ ຜ່ານມາ. ເງີນຊ່ອຍເຫລືອ ດັ່ງກ່າວ ໄດ້ມອບໃຫ້ ຫລັງຈາກ ທີ່ເຫັນ ຄວາມສຳເຣັດ ໃນໂຄງການ ຫລຸດຜ່ອນ ຄວາມທຸກຍາກ ໃນລາວ ຈາກກອງທືນ ຊ່ອຍເຫລືອ ຂອງ ທະນາຄານໂລກ ໃນຣະຍະ ທີ່ຜ່ານມາ ທີ່ເປັນຈຳນວນ ເງີນທັງຫມົດ ກວ່າ 68 ລ້ານ ໂດລາ ເລີ້ມແຕ່ປີ 2004.

ອິງຕາມຖແລງການ ຈາກ ທະນາຄານ ໂລກ ເງີນຊ່ອຍເຫລືອລ້າ ເທື່ອນີ້ແມ່ນ ຈຸດປະສົງ ທີ່ແນໃສ່ ການປະຕິຮູບ ນະໂຍບາຍ ແລະ ຣະບົບກົດຫມາຍ ໃນລາວ ທີ່ຈະສາມາດ ສ້າງຣາຍຮັບ ຈາກການພັທນາ ຊັພຍາກອນ ທັມມະຊາດ ທີ່ຍືນຍົງ ເພີ້ມຂື້ນ ໃນລາວ.

ການບໍຣິຫານ ຈັດການຣາຍຮັບ ຢ່າງມີ ປະສິດທິພາບ ເປັນສີ່ງຈຳເປັນ ໃນການ ບໍຣິການ ປະຊາຊົນ ຄວບຄູ່ໄປກັບ ວຽກງານ ບູຣິມະສິດ ຂອງຣັຖບານ ໃນແຜນການ ພັທນາ ເສຖກິດ ແລະສັງຄົມ ໃນລາວ.

ຍານາງ Genevieve Boyreau ຫົວຫນ້າທີມງານ ທະນາຄານໂລກ ປະຈຳລາວ ກ່າວວ່າ ການຊ່ອຍເຫລືອລ້າ ເພື່ອຫລຸດຜ່ອນ ຄວາມທຸກຍາກ ໃນລາວ ເທື່ອນີ້ ແມ່ນມີຂື້ນ ໃນເວລາທີ່ ສຳຄັນ ໃນຂນະທີ່ ເສຖກິດ ສປປລາວ ກຳລັງ ອາສັຍ ການເຕີບໃຫຍ່ ຈາກຣາຍຮັບ ຈາກ ຊັພຍາກອນ ທັມມະຊາດ ອັນມະຫານສານ ຖ້າມີການ ບໍຣິຫານຈັດການທີ່ດີ ຈະເຮັດໃຫ້ ສປປລາວ ກາຍເປັນ ປະເທດທີ່ ມີຣາຍໄດ້ ຣະດັບກາງ ແບບຍັ້ງຍືນໄດ້.