ຍິງລາວຮັບລາງວັນ ຈາກທູຕສະຫະຣັຖ

ເດືອນມີນາ ເປັນເດືອນທີ່ມີ ກາຣສລອງ ບົທບາທສຳຄັນ ຂອງແມ່ຍິງ ໃນທົ່ວໂລກ ຊຶ່ງກໍຮວມ ທັງກາຣ ສລອງຄົບຮອບ 100 ປີ ຂອງວັນ ສະຕຣີສາກົລ ແລະ ເປັນເດືອນສລອງ ຄວາມກ້າຫານ ຂອງສະຕຣີສາກົລ ນຳອີກດ້ວຍ, ຊຶ່ງກໍມີກາຣຈັດ ພິທີສລອງກັນ ໃນຫລາຍໆປະເທສ ທົ່ວໂລກ.

ກ່ຽວກັບພິທີ ກາຣສລອງບົທບາທ ຂອງແມ່ຍິງສາກົລ ດັ່ງກ່າວ ທາງກາຣທູຕ ສະຫະຣັຖ ປະຈຳ ສປປລາວ ກໍມີພິທີກາຣ ມອບຣາງວັນ “ສະຕຣີສາກົລ ຂອງຄວາມກ້າຫານ" ໃຫ້ແກ່ແມ່ຍິງລາວ ເຊັ່ນກັນ ຊຶ່ງຈັດຂຶ້ນທີ່ ບ້ານພັກ ຂອງເອກອັຄຣາຊທູຕ ສະຫະຣັຖ ທີ່ນະຄອນຫລວງ ວຽງຈັນ, ໃນມື້ວັນພຣະຫັດ ຜ່ານມານີ້ ໂດຽແມ່ນ Mme Karen B. Stewart ເອກອັຄຣາຊທູຕ ສະຫະຣັຖ ປະຈຳລາວ ເປັນຜູ້ມອບໃຫ້ແກ່ ຍານາງ ກົມມະລີ ຈັນທະວົງ ແລະ ຍານາງກົງເດືອນ ເນຕຕະວົງ ຊຶ່ງແຕ່ລະຄົນ ໄດ້ມີບົທບາທ ທີ່ສຳຄັນໃນ ສັງຄົມ ປັຈຈຸບັນ.

Mme Stewart ໄດ້ກ່າວຢູ່ໃນພິທີ ຕອນນື່ງວ່າ ສະຫະຣັຖ ໄດ້ເຮັດທຸກ ວິທີທາງ ໂດຍປຣາສຈາກ ຄວາມອິດເມື່ອຍ ເພື່ອໃຫ້ແມ່ຍິງ ມີສິທທິ ແລະ ຄວາມສເມີພາບ ທຸກຢ່າງ ເພາະມີ ຄວາມເຊື່ອໝັ້ນທີ່ວ່າ ຖ້າປະເທສໃດ ໃຫ້ຄວາມສຳຄັນ ແກ່ແມ່ຍິງ ແລະ ເຍົາວະຊົນ ໜຸ່ມນ້ອຍເພສຍິງ ມີສິທຈົນເຕັມ ສັກຍະພາບ ຂອງ ໃຜມັນ ແລ້ວນັ້ນ ປະເທສນັ້ນໆ ຍິ່ງຈະມີຄວາມ ຈະເຣີນກ້າວໜ້າ ໄປໄດ້ດີກວ່າ ປະເທສອື່ນໆ ທີ່ບໍ່ໃຫ້ສິທ ເສຣີພາບ ແກ່ບັນດາແມ່ຍິງ ຢູ່ໃນປະເທສ ຂອງຕົນນັ້ນ ແຕ່ຢ່າງໃດ.

ໃນຂນະດຽວກັນ Mme Stewart ກໍໄດ້ເນັ້ນວ່າ ທາງກາຣ ສະຫະຣັຖ ກໍມີຄວາມມຸ້ງໝັ້ນ ໃນດ້ານເສີມສ້າງ ພລັງອຳນາຈ ຂອງສະຕຣີ ບໍ່ແມ່ນແຕ່ວ່າ ເປັນສິ່ງທີ່ຖືກຕ້ອງ ເທົ່ານັ້ນ ແຕ່ກໍຫາກເປັນສິ່ງ ທີ່ຄວນຈະໃຫ້ ກາຣສົ່ງເສີມ ແລະ ກໍເຊື່ອວ່າ ທາງກາຣລາວ ກໍມີເປົ້າໝາຍ ເຊັ່ນດຽວກັນ.