ອະນາມັຍໂລກເຕືອນຣະວັງ ໂຣຄເອດສທີ່ດື້ຢາ

ເຈົ້າຫນ້າທີ່ ຣະດັບສຸງ ຈາກຫ້ອງການ ຕ້ານໂຣຄເອດສ ອົງການ ອະນາມັຍໂລກ ຖແລງ ໃນມື້ວັນ ພຣະຫັດວ່າ ເຊື້ອໂຣຄເອດສ ທີ່ດື້ຢາ ຕ້ອງມີການ ຕິດຕາມ ແລະ ສີ້ງຊອມ ຢ່າງໃກ້ຊິດ ເຖີງແມ່ນວ່າ ໃນເວລານີ້ ມັນຍັງບໍ່ເປັນ ບັນຫາໃຫຍ່ ກໍຕາມ.

ທ່ານ Gottfried Hirnschall ຫົວຫນ້າ ຫ້ອງການ ຕ້ານໂຣຄເອດສ ອົງການ ອະນາມັຍໂລກ ໄດ້ກ່າວ ຕໍ່ຫນັງສືພີມ ຊິນຮົວ ຂອງຈີນ ໃນຊ່ວງທີ່ມີ ການປະຊຸມ ກ່ຽວກັບ ໂຣຄເອດສ ເປັນເວລາ 6 ວັນ ທີ່ກຸງປັກກິ່ງ ທີ່ເລີ້ມຂື້ນ ໃນວັນທີ 22 ກໍຣະກະດາ ວ່າ ພວກເຮົາຕ້ອງ ຕິດຕາມ ແລະເຝົ້າຣະວັງ ພວກເຮົາ ຕ້ອງສີ້ງຊອມ ເບີ່ງ ວິວັທນາການ ແລະ ວິຈັຍ ກ່ຽວກັບ ໂຣຄເອດສ ທີ່ດື້ຢາ ຢ່າງໃກ້ຊິດ.

ທ່ານວ່າ ໃນຂນະທີ່ ຢາຕ້ານໂຣຄເອດສ ຊນີດ ART ໄດ້ຊ່ອຍຊີວີດ ຜູ້ຕິດເຊື້ອ ຫລາຍລ້ານຄົນ ຫລັງຈາກທີ່ ຖືກປະກາດໃຊ້ ແລະ ຜົລດີ ຂອງຢາດັ່ງກ່າວ ຍັງສືບໄປ ຢ່າງຕໍ່ເນື່ອງ ແຕ່ຍັງມີ ບາງກໍຣະນີ ການດື້ຢາ ຂອງໂຣຄ ດັ່ງກ່າວ ບໍ່ສາມາດ ຫລີກລຽງໄດ້.

ອິງຕາມ ຂໍ້ມູນຂອງ ທ່ານ Hirnschall ໃນທ້າຍປີ 2011 ມີຜູ້ຕິດເຊື້ອ hiv ກວ່າ 8 ລ້ານຄົນ ໄດ້ກີນຢາຕ້ານ ເອດສ ART ໂດຍສະເພາະ ໃນປະເທດລາຍ ໄດ້ຣະດັບ ກາງ ແລະ ຈຳນວນ ດັ່ງກ່າວ ໄດ້ເພີ້ມຂື້ນ 26 ເທົ່າ ໃນປີ 2003. ອົງການ ອະນາມັຍໂລກ ໄດ້ເລີ້ມ ການສຳຣວດ ກ່ຽວກັບ ການດື້ຢາ ຂອງໂຣຄເອດສ ຫລັງຈາກ ທີ່ ຫລາຍປະເທດ ໃຊ້ຢາ ດັ່ງກ່າວ.

ທ່ານ Hirschall ກ່າວ ໃນຖແລງການວ່າ ອັດຕຣາ ການດື້ຢາ ຂອງໂຣຄເອດສ ທີ່ເກີດຂື້ນໃນ ປະເທດ ຜູ້ຕິດເຊື້ອ ລາຍໄດ້ ຣະດັບກາງ ເພີ້ມຂື້ນ ຣະຫວ່າງປີ 2003 ຫາປີ 2009 ປະມານ 6% ແລະ ທົ່ວໄປໃນໂລກ ເພີ້ມຂື້ນ ປະມານ 5% ໃນຈຳນວນ ຜູ້ຕິດເຊື້ອ.